ISAYA 4 - PIPÏLIA

¹ Itu asis ato poryegho korï cho le mut nko odeny mïrön akonga akïlenchï, “Kimuchecha kepöghe kegh akelokyï kegh sïro, wölo kaykay lïkuna santencha tökïngetenecha arasï nyo kïtïpisot kïpuryö ngetat.”

Kïteköy ngat Yerusalem

² Itu asis ato ighöy ECHOTYON kösïghyon anka tïkwïl nko ket anka tïkwïl nyo mi ngwïny kusïl akïpit kïyetï akïpïchighit. Ngörökyini pipö Israel cho le ngötunön akwa cho pitu cho pkono korononi.

³ Kiyitöy nyu chi anka tïkwïl nyo kingötï ompö Sayon* akudong Yerusalem lö tïlil.

⁴ Rwokyini Echotyon akutïlil piko kanasyantenyi akuwun sïmnyonto Yerusalem nko kisön cho kikïmïltegha orinyi.

⁵ Atolapay kïyonï ECHOTYON polta ato le pöghet nko ighöt ato le nangat nko lyopöt ato le nangat kulïwchï kutïng pö Sayon. Lumöy ororyo Tororöt akïkarta kanasyante kïmïkul.

⁶ Körtegho ororyenyi kanasyantanoni kilayat atole pöghet, akïrip kïlïkwï ato ghïpchegho pich akï tïghume ompö chepkiriri nko ompö rop.