ISAYA 32 - PIPÏLIA

¹ Arosa lö itu asistanka pöytoghintö nyo pöytoy ompö konyït nko kintöghoghï cho pöytoy ompö man.

² Kikongityot atoni chi nko wölo kïghïpchegho ompö yomat nko wölo kikolo ompö chepkiriri. Kikongityot chane nko lalwatïn cho yintoy kuweröy kor wölo tïyame, akïkarkegh nko rurwo kogh nyo wow ompö kor nyo ngwan maral.

³ Yotisyot konyikwa nko yitikwa ompö möchutko pikökwa.

⁴ Melö tökïnöreksot chane ngat lawel, wölo rwokyini ompö sïkunöt akïmwa ngölyon nyo ngwïno mïkulöwekwa laras.

⁵ Möminye chi asisoni nyo konyïtöy chi nyo le sölwö anta mwa lö tenate pkatyan.

⁶ Ngölonöy chi nyo le sölwö ngala sölwontön akunonöy tïkwïn cho ghach. Ighöy akïngölonöy tïkwïn cho ghöchini ECHOTYON. Melö pöghöy pich cho amate kömöy anta tö chane pögh cho gheghöy.

⁷ Gha chi nyo le sölwö akwighöy tïkwïn cho pö sölwontön, mïröy putintön atökuwany pich cho mötïng owesyö akïtagha chane kïnyorï mantangwa.

⁸ Wölo ighöy chi nyo le pöropchon ngala pöropchö akughyongo lasiny ngalechoni.

Kirwok nko kiyokunogh

⁹ Atera ngalechan koruchï moripöy kegh, anonekwa lö puryö kïgh nyo susokwa.

¹⁰ Ochikwa pïghyongote otï le ye, wölo meghyonokwa mïkulis ato teno nyete könyinï ngwïnöy, ompöwölo mökïmicha sapipun cho rïröy atopïtökwa.

¹¹ Komitekwa otïpisot nyo karam akï puryö kïgh nyo kesusokwa, wölo opotonchenö ye ompö mïghöt! Akarera sïrokökwo akörmön sarankwachtin.

¹² Arapaka töketwekwo ompö nyarïl ompö wölo kikewur parenikwa cho okwoghöch cho körïr sapipun.

¹³ Kapita kato nko takalaw pareniko piköchan. Orirchinö korïn löwïr cho kingörechegho pich, arirchï kanasyantanay kimi ngörekyö.

¹⁴ Ompöwölo kïpökoktoy kö pö pöytoghin akesurö kanasyante kïtuwit. Kiwuröy keston nko nïyet cho kikïripsyegho akegh kïlïkwï möngot pö tyonkïn kokay. Lïku wölo tisonchegho sïkïröyi wuw akïlïkwï acheypa kechir.

¹⁵ Wölo tökïyonwecha Tororöt mïkulöwunyi ngat. Wöghöko korö wölo tïyame kïlïku paren cho okwoghöch akïrïro omisyö nyo wow.

¹⁶ Kïpöghisyeghö man onkït ompö korononi kïmïkul.

¹⁷ Kïnyorunö korononi kalya nko payasat kokay, ompöwölo ighöy chi anka tïkwïl kïgh nyo pö man.

¹⁸ Chïwutyegho pipö Tororöt kisusut akïtïpï kestonikwa ompö kalya nyo puryö otyogh.

¹⁹ (Wölo ropönchini takarïs wölo le wudïn atökengany kanasyante lö tawanka.)

²⁰ Ngörekyö nyo wow ompö akwa ato nyorï chi anka tïkwïl pögh cho chang cho cholchini nko cho pito suswö atökuyakwï twachi nko sïkïröyichi wop anka tïkwïl.