ISAYA 30 - PIPÏLIA

¹ Lentöy ECHOTYON, “Heywey! Ochech pich cho pöytoy koro Yuda, ompöwölo kapeny chane ngalechan. Mito chane kïrïpöy tötut cho melö kyotönön chane, akwam mumos cho melö kyomwochan akïtosyï kegh ngokï kïchangit.

² Petöy chane koro Misri lö tökenyorunö kingarakat, amelö kinya kïtepanïn. Kipa chane wöloni lö tökïkartech Parao.

³ Kïlenyona, lïku owesyo Parao kwïle akuwonyechini kiwurat.

⁴ Ompöwölo kïrkegh kökikwitïta pich cho ghyongchini korengwa ompö koroswo puntoni walaka, kanastin cho pö Soan nko Anes cho pö Misri,

⁵ kitökughyongchini kegh pipö Yuda ompö kïgh nyo kigh chane kughan pïchoni mökumuköy ntökeghan, pich cho kipïsyï chane arawet kwen kïpuryö kingarakat.”

⁶ Anyï ngölyon nyo kïmwochini tyonkïn cho pö okumpö ewu tagh kor nyo le surkwen nyo mwochini Tororöt chane lö, “Kirutö pich cho ghyongchini korengwa ompö koroswo puntoni walaka. Kiwerata chane kor nyo ki wow tapan, kor nyo kichang ngötunywö nko moroyut cho kitïng ngwonö nyo wow nko moroyut cho pegho mïröt. Kikasana chane sïkïröy nko tamasay ropöw cho pö olyot nyo wow cho kipetöy kïropchini pich cho kimemukcha kungarak chane.

⁷ Lenye kwïle kingarakata nyo nyoruno chane pipö Misri. Nka nyoni kokuran koro Misri ompö ngötïnyö, ‘Moroy nyo mötïng owesyö.’ ”

Pich cho le tighï

⁸ Kïlenchanïn Tororöt wïyö akirchï kitapï wölo lata pïchï, tökesïwa kokay ompö kikirut wölo ghach chane kïlïkwï.

⁹ Chumpönöy chane nko Tororöt kïtenö osis, mïröy ngat putintön kïnomnyö akïtagh kïlïm kinetut pö ECHOTYON osis lapay.

¹⁰ Köröy chane werkoy kutïw atökïsisyö lenchini, “Mongorwecha ngal cho pö man. Omwowecha tïkwïn cho kïmökecha kelïme. Ongorwecha ngala lïs.

¹¹ Amalteghena kegh arencha, anategha kegh ompö arencha nyo kiweröy. Melö tökemökecha kelïme ngat ngala Tororöt pö Israel nyo Tïlil.”

¹² Kïlenyona mwoghöy Tororöt pö Israel nyo Tïlil lö, “Ompöwölo kasasakwa ngölyon nyo omwowokwa, akön masat nko lïsat.

¹³ Otïngetekwa nyu ngokï. Kikongityonokwa nko nayat nyo kogh nyo kikarera yïm ntökwit ngwïny, akïtomönye kite orulyekwa lawel.

¹⁴ Kïnyökokwa atoni le tör nyo kikinyaknyak ntömelö tökïngötu tïwan nyo le kite nyo kipö ma nyo kinoghöy anta nyo kïrama pögh ompö kö pö pögh.”

¹⁵ Ompöwölo mwoghöy Echotyon TORORÖT Kimuktoghin, Tororöt pö Israel nyo Tïlil nyo pö Israel pich lö, “Kïsörwokwa ato omïlonchekwa, aghananïn. Osïkekwa nyu owesyö atïpï ato tïghume.” Wölo ataghakwa agha lenyoni!

¹⁶ Nyinö kötoghekwa lenyoni, amachakwa osughenö kegh pungkökwa apegha angoletin cho pïrtït, nyoman mïchini osughökwa kegh, lenyoni wölo pïrtïte pïchoni yonokwa kïmolï!

¹⁷ Oryöghekwa kïrkegh kochikwa nyïgwïtyan akonga ompö punyon akonga, akumuköy pung cho le mut ntökutoyokwa kïmïkul. Möngötunye kïgh nyonikïny nyo pö askarinekwa, kïpoto ket nyo mi kutïng nyo kiwusyini pentera!

¹⁸ Akwanyï köngisïyi ECHOTYON tökusyonchokwa. Mito nyinte kïpsach kusyonchokwa ompö wölo ECHOTYON kï Tororöt pö man. Soyönote pich cho könöy nyinte.

Soyönöy Tororöt pikachi

¹⁹ Akwa pipö Sayon,* melö torirsokwa ngat cho omöngöy Yerusalem. Kisyonin Tororöt nyo otini korirchikwa nyinte, kïterwokwa.

²⁰ Akï kïrkegh kïkonokwa Echotyon omisyö nyo pö kömpölelyö nko pögh cho pö nyarïl, wölo möwïngönye kegh nyinte, ompö nyi akunetinyi. Melö itïngetenyi machat ngat nyo iyöröy nyinte.

²¹ Ato imastenyi or iwö ewu tagh anta nyo pö löt, ilïmenyi kut nyo mi lötungu nyo lentöy, “Anyï ore. Rïpa.”

²² Ichengenyi körkeyïntin cho kikïmala silpa nko koltin, aiwirtenyi tïkuchoni le tïkwïn cho le sïmnyon, aitegh lö, “Angetena tawunyan!”

²³ Yokwokwa ECHOTYON asisoni rop kïnomnyö otini kaletekwa kösïghekwo, atökïpityö akïkonokwa ilö nyo wow nko sus cho omöy kyakikwa cho pitöy kïnapasa ompö paren cho pöroyöch,

²⁴ omöy eghina cho ngorsïyi nko sïkïröy musanya nyo kikïrorchï töpoton aketö partin kwanyïnit.

²⁵ Ato itï asisoni kirultoy nïyetko pungkökwa cho koghöch cho kïripsyegho, kuyintegha pögh champilwoy ompö kutïngkot löwïr cho echön nko cho mïnkech.

²⁶ Lïwu arawa kïrelit le asis, kulïwï asis kïnyïl mut nko odeny nyo pö löpoyïntanyi, nyo karkegh nko löpoyïntanyi nko nyo pö osis mut nko odeny. Ighisyot ngalechoni asisoni rötöy ECHOTYON akusop moyoko pikachi cho kinyorunö mungötenyi.

Mungöy Tororöt pipö Asirya

²⁷ Kïsöchini owesyö ECHOTYON nko ororyenyi wölo low. Poru man nko ighot nörekyenyi. Ngölonu nyinte, kïwöghökisyö ngalechi kïpelsyö.

²⁸ Kutïtoy yomat ompö tawunyi nyo karkegh nko puseryon nyo chutöy kïgh anka tïkwïl. Chutöy pipö punton kïlïtöy wölo mi kiwurata atökuwany tötutkökwa cho ghach.

²⁹ Wölo ongörekyokwa cho ochï pipö Tororöt, atum le wölo odokwa nangat ato kyomöy akor nyo tïlil. Ongörekyenö le pich cho kutöy pkurerun akïpetöy kïpustoy Kö pö ECHOTYON Tororöt nyo le ghetöy Israel.

³⁰ Ighöy ECHOTYON chi anka tïkwïl kïlïmöy kutinyi nyo pö töroryö atökuporchï chane wölo nïkis kïlïkwï nörekyenyi. Kïsïwïyi atoni lyopötin nko kiryal nko takarïstin nko rop nyo ipu chepkiriritin.

³¹ Otyot tya pipö Asirya atoni lïmöy kuti ECHOTYON nko nïkisïnto kichopatenyi.

³² Tumöy pipö ECHOTYON cho pöghisyegho tokigh nko pïkantis otini mito nyinte kulïwöy chane kuloyö. Nyinte Tororöt nyo poryegho pipö Asirya.

³³ Kikigh könyisyok wölo kinagha ma nyo wow nyo kïpelo pöytoghinto Asirya. Kiröytö to akïtapes, akenyïghit kwen kutïkumö. Kutini ECHOTYON kimïny nyo ngwïnöy le puseryonto ma nyo pelöy atoni.