ISAYA 28 - PIPÏLIA

¹ Heywey! Wechï kawir paytaghpa Israel. Kösilön ororyö nyo kötïng kintöghoghikwa cho tömesyot le tapïkoy cho kösilonchö. Kinyita mötöwekwa mwagh nyo ngutoy nyo karam, wölo achona chane rusot, kimeghö ompö tamasat.

² Akwanyï tïng ECHOTYON chitö anka nyo le nyakan akwawes, nyo mito kïpsach kïporyeghö chane, chi nyo ngwïnöy le takarïstin, nyo lata rop nyo ipu chepkiriri, nyo lata puseryon nyo awes nyo kighömï kor kïmïkul.

³ Kïtïkotegho kelyön asïyech menöto kintöghoghi choni le ptangengmötin.

⁴ Kikongityot ororyononi silönöy pö kintöghoghichoni le menot nko akwa makany cho le poretay, cho kiwokyini kyomöy lawel otini katodogh nyo pö tagh.

⁵ Itu asis ato kikongityot ECHOTYON Kimuktoghin nko akope nyo pö ororyö nyo pö tapïkoy cho pö pikachi cho le ngötunön.

⁶ Ighöy nyinte pich cho le kirwokï kïpöghisyeghö man, akutö nyakanat chane cho ripöy kukoti kanasyan tömölïtu pung.

Isaya nko werkoyi Yuda cho le ptamasis

⁷ Kitömesyö tïkwïl pikö cho köle werkoy nko tïsï ntömelö tökumuköy kïpestotoy. Kighegh dipay* nko kumïn cho chang tya ntökïwöngisyö. Kitömesyö werkoykö tya ntökupöl kïsïkï ngongut cho kiporchini Tororöt chane. Kïtömesyö tïsï tïkwïl ntökupöl kïmut ngal cho kikipchini chane.

⁸ Kïsömïsitu, akimelö kingötï wölo tïlil nyo le ompö kite.

⁹ Mito chane kugheghchinanïn lö, “Nonöy chichï lö onetöy ngo nya? Ngo nyini mököy lökoyechi? Mïchini lökoyechoni tengon cho tökïmi chö kelat!

¹⁰ Ompöwölo netöy nyinte kirurut keyokyini kegh kirurut, akunetöy kirurut akeyokyini kegh kirurut akunetöy kinetut akeyokyini kegh kinetut, akunetöy kinetut, akeyokyini kegh kinetut, kite ompö wölo, kï kite ompö wölnö?”

¹¹ Wölo atomalïmakwanye ngalechan, kïpöghisyegho Tororöt puntoni walaka kunetokwa ompö kutïw cho molïmekwanye.

¹² Kikonokwa nyinte kimungöt nko payasat, wölo ataghakwa alïma ngalechi.

¹³ Nka nyoni ngwïnöy ECHOTYON kunetokwa keyokyini kegh kirurut akeyokyini kegh kinetut, kite ompö wöl, kï kite ompö wölnö. Kïlenyona, otini petöy chane, kupïtyotoy akïkörtoy kegh löt, atökwilyö akenama chane ngöghöp akerang kïlïkwï mampustin.

Koghpa luch nyo pö Sayon*

¹⁴ Alïma nyu ngölyonto ECHOTYON pïchï le sösï opöyu pïchï omöngöy Yerusalem.

¹⁵ Ompöwölo kyamwaghakwa lö kikiyomisöcha kegh nko meghat akyam ngamata nko ngwen, nyo ato wer mungötö nyo wow, kechïwïtyocha ompöwölo möminye kïgh nyo okönekwa atawïnya kegh kïpoto putintön nko lïsa.

¹⁶ Anyï ye nyu kïgh nyo mwowu Echotyon TORORÖT Kimuktoghin lö, “Otöninan Sayon kogh nyo tighöy kö, kogh nyo kiketyam, kogh nyo töpuno luch nyo pö olyot nyo wow, tighöyonto kö nyo pö man, melö kuskusöy chi nyo ghanate.

¹⁷ Oghan kirwok kïlïkwï kïgh nyo kipimo tighöyonto kö, kïlïku man pörköyö nyo kighïtegho nayat.” Puchtoy takarïs lïsut löwïr cho kotighokwa kegh, akuwur puseryontö nyo lumöy kor kïmïkul wölo kowïngokwa kegh.

¹⁸ Kïwöghököy mis nyo kyamakwa nko meghat kïlïkwï kwïle, akewirta kiyomisötenkwa nyo kyoyomisökwa kegh nko ngwen. Kïrïntonokwa otini ketï mungötö nyo ngwïnöy ngwïny.

¹⁹ Mïghitokwa kïnomnyö mungötononi otini kölïtï. Ompöwölo lïtu otini kayech, akuker lenyoni asista nyo pö odeny. Okömöghekwa ompö mungötononi pöghet nko nangat. Ipu otyogh ompö akwa ngölyon anka tïkwïl nyo ngwïno wölo mi Tororöt.

²⁰ Kikongityonokwa nko chi nyo kïngölono ompö ngötïnyö lö kimukyini kïrï pöröy nyo tangogh tya, kïlö omukyï oghïtö kegh kupöl, akiyenö kegh kupöl.

²¹ Poryot ECHOTYON kïkarkegh nko wölanya kiporyeghö kutïng pö Perasim nko mpöghoghyo Kipyon, atökumï kwigh kïgh nyo mököy kwighöy, kïrkegh köwöngöy pich ighisyewutkachi lö ne! Wongöy ighisyenyi nyo pö töngönchin.

²² Kïlenyona nyu, masas ngalechï orirwokwa! Ato asasakwa, kwoghïghitu tya ompö akwa ochïwïtyenö ompöwölo kyalïman Echotyon, TORORÖT Kimuktoghin lö mököy nyinte kuwuröy ngwïny kïmïkul.

Ngöghomnyo Tororöt

²³ Atera ngölyon nyo omwoghan. Atera, akany kïlïtok yitïn ngalechï omwowokwa.

²⁴ Möminye ngorinto par nyo wetöy kïnomnyö kïngoröy parenyi amakatkat kösïgh.

²⁵ Köngöy otini kewany kïngor parenyi, akusipö mori ket tökïkarer wölo kïlechini kösïgh, kïleta nyu kösïgho onkïy cho kyonyïnito omisyö. Lechini wölay kakarer mori ket kösïgho nkanun, akïlechï cho pö matay wölo kikengotyï, atolapay kïlechï sörömuto parenyi kösïghe walaka.

²⁶ Nkït wölo idoy ighisyenyi, ompöwölo ruröy Tororötïnyi lasiny akunetöy.

²⁷ Melö kilïwo kïgh nyo ngatip kösïgho onkïy amelö kïkötöy kel pö nkari kuweröy wölnö nko wölnö kuwerata kösïgh parak, nyinö kötökighöy lenyoni, kepöghisyeghö lïkïp kelïwö kösïghechoni, akelïwö sitöt onkïy cho kyonyïnito omisyö.

²⁸ Melö kïtïghotïghöy nkanun pat ntökupepesisyö, ompöwölo mi wölo kïpöghisyegho kelyo nkari cho tïkyini ngwïny amenyorönye.

²⁹ Ngwïno ngöghomnyonï tïkwïl wölo mi ECHOTYON Kimuktoghin. Ngöghomöch tötutkachi kokay, akupölisïyi kïtenö osis!