ISAYA 24 - PIPÏLIA

¹ Ighöy ECHOTYON ngwïny kïtïryolitu akïpïstö kïlïkwï surkwen, akïköpïgh, akutoytoyö pich.

² Nyoru chi anka tïkwïl nyarïlnoni, kö tïsï anta pikö anta sekey anta echotkökwa, pich cho olsïyi nko cho oltoy tïkwïn. Pich cho pösöntoy ropïyen nko cho pösönöy, sïkön nko mey.

³ Kighöy ngwïny kïtïryalit akewu, ompöwölo ECHOTYON nyo kangalan, akwigho lenyoni.

⁴ Kateny ngwïnya akïsilön, möminye owesyö ngwïny kïmïkul, kanïn ngwïnya nko yïm tïkwïl.

⁵ Kesïmnyon pich ngwïny ompöwölo kawaghach chane kirurut pö Tororöt, akïpeny muma* nyo kitöpo kokay.

⁶ Nka nyoni köchïp Tororöt ngwïny. Akunka nyoni kewongwï pïchoni möngöy orinyi, akïngötï cho ngörï.

⁷ Köyomö keti sapipun, kïngörïngitu nyu dipay* tïkwïl. Kewongwï chi anka tïkwïl nyo kingarakate atole tagh,

⁸ akïsisyö tïkukwa cho kipöghisyegho ompö tumwöy cho kisïko chane ngörekyö.

⁹ Melö tökïtumöy ngat ato ghegh chane dipay. Ngwonöchitu dipayka atolentöy chane kïgheghöy.

¹⁰ Kikwangkwang kegh kïgh anka tïkwïl ompö kanasyan, kïpechï pich kïkörchï kegh korikwa tömömi chi nyo lïtu.

¹¹ Riryegho pich ortïna kanasyan, ompöwölo mökïmicha dipay ngat. Kiwö ngörekyö kokay, kikïweghö turönötö ngwïny.

¹² Kitïryalit kanasyante, kikeriy kukotichi kunyorisyö.

¹³ Nka nyoni kïgh nyo igho ompö pipö ngwïny, kikongityot atoni nko ato kakitimtim keti arol akïtökïmito arolka walaka ketït. Akekongityot nko ato kirorotoy sapipun cho le ngötunön.

¹⁴ Tumöy pïchoni köngotï ompö ngörekyö. Mwotïtoy cho mi okumpö ta wölo wow ECHOTYON kïlïkwï, teghyegho chane wölini le nanam,

¹⁵ akïsölöy nyinte walaka cho mi okumpö kongasis, sölöy ECHOTYON Tororöt pö Israel pikö walaka cho möngöy sörömu nanam.

¹⁶ Kïlïmecha tumwöyi sölut cho sölöy ECHOTYON Tororöt pö Israel, cho pkono söremwok pö ngwïny. Wölo melö otïngetan kikönöt! Kyanyasan ntowonyö! Mito pich cho wïchtoy pich kuletöy tagh, akïmitoni pich cho le lïsï kuletöy tagh nko lïsengwa.

¹⁷ Atere pich tïkwïl ngalechan! Köngokwa cho omitö ngwïny kiwaghata nko pïrïmpot nko ngöghöptin.

¹⁸ Atolentöy chi omukyini ochïwïtöy anka ochïwïto pïrïm, kenömo ngöghöp. Ompöwölo yotisyot konyi pögh ompö yïm, kïpotonchö nyu pchörino ngwïny.

¹⁹ Köreroy ngwïnya lö tya, körero akïpasyangana akutimtimö ompö owesyö.

²⁰ Porporyotoy ngwïnya le chi nyo tömösöy, akïpotan le kö nyo kakut chepkiriri. Kikutuny ngokï ngwïny, akïlekïtit kïrul amelö tökïngetöy ngat.

²¹ Itu asis ato mungöy ECHOTYON owesyö anka tïkwïl nyo mi yïm nko pöytoghi ngwïny.

²² Tuyot Tororöt chane löwïr ompö pïrïm le mampustin. Körchini chane chela ntökwitïta asistangwa nyo pö kichopat.

²³ Atolapay kïtuwit arawa tökulïwu asis ngat, ompöwölo lïku ECHOTYON Kimuktoghin pöytoghin. Pöytoy nyinte ompö kutïng pö Sayon* nko ompö Yerusalem, atökïsïwa kintöghoghi pich ororyenyi.