ISAYA 13 - PIPÏLIA

¹ Anyï ngölyon nyo ngölono Papilon nyo kimwochï Tororöt Isaya wero Amos.

² Kakïsyolö pentera poryot nyo puryö ket! Oteghchinö pipö lïk, asyol ewunekwo atökuporchï chane lö ketïta ato poryegho chane ortïna kanasyantanoni kwolöy kegh.

³ Kimwochï ECHOTYON pikachi cho owesöch, cho nisonchot kïset lïk nyo tïlil, atökïpa kunyaril kong pich cho kisus nyinte.

⁴ Alïma kiteghat nyo ngwïno kutïngkot, kighumöt nyo pö söpïch pö pich. Kighumöto pipö punton nko pöyunötin cho kighamït kegh! Katat ECHOTYON Kimuktoghin pikachi cho setöy atökïpa kïporyö.

⁵ Pkono chane koro wölo lowöch, wölo teno sörömu ngwïny. Ngwïnöy ECHOTYON ompö nörekyenyi kuwuröy ngwïny kïmïkul.

⁶ Oteghyenö ompö ngwonïn, ompöwölo kalekïtit asispa ECHOTYON ato ipu Kimuktoghin kiwurat.

⁷ Nyörkölölitu nyu atoni ewuno pich kïmïkul, akuwonyö sirmöy pö chi anka tïkwïl.

⁸ Potonchot chane lömïs akïsïch ngwonïn nyo karkegh nko ngwonïn pö lusyogh. Topönöy kegh chane ompö nyökoryö, akïnöghyö tokochwekwa le ma ompö arasï.

⁹ Itu asispa ECHOTYON asis nyo pö ngwonïn, nyo nörekyenyi nko sïngiryenyi. Kighöy ngwïny kïlïkwï surkwen, akewur mwokïyis cho mi wöloni lömïs.

¹⁰ Kimisöy kokelyan anka tïkwïl nyo mi yïm, akemis kïgh anka tïkwïl nyo lïwuno wölnö le mïröt, tuwitu asis otini kapusï, akï möminye löpoyïn nyo lïwuno wöloni arawa.

¹¹ Mwoghöy ECHOTYON lö, “Opunan kiwurat ngwïny, anyörilan kong mwokïyis lömïs ompö ngokikwa. Owonyan menotön nyo pö pich cho le pkatis.

¹² Oghan pich cho ngötu keyar kïsir koltin, akeyar ptangengmöt kïsir koltin cho tïlilöch cho pö Opir.

¹³ Kïlenyona nyu, oghan yïmwöy kïpotonchö, aghan ngwïny kïpotan atökïngeta otini kömi ompö asisoni ongwïnan ECHOTYON Kimuktoghin nko nörekyenyu.

¹⁴ “Pertoy pich atoni cho le pïnot cho möngöy Papilon kutöngöy wölini kipkana. Toytoyot chane le cheptirkich nyo kïyonöy ato kïsökosöy, akïlata kechir cho puryö mösöwon.

¹⁵ Ato kïyon chi ntökenam, kepöröy kïma.

¹⁶ Kinyoknyoköy monekwa cho le tengon lökarpïs otini mi chane kurosöy, kïghömïto tïkwïn korikwa, akesïmnyon korukwa.”

¹⁷ Mwoghöy ECHOTYON lö, “Ongetan pipö Mede tökïpa kïporyeghö Papilon. Melö yitöy chane silpa, amelö ngörekyini chane koltin.

¹⁸ Pöro kïwantis nko kotï monekwa cho le chumwakay. Melö syonchini monïng cho le mnyarkiltin amökïghnye tengon ompö chane.

¹⁹ Pïchigh Papilon kïsir paytagh anka tïkwïl, kwolo kegh pipö Papilonia. Wölo ani ECHOTYON Kimuktoghin nyo oköpïghöy Papilon kïle wölo kyadan Sodoma nko Komora!

²⁰ Melö tökïmi chi nyo möngöy wöloni ngat. Möminye Marapyan nyo tökïpörtochini emenyi wölini kokay, amelö tökïmi mösöwontö nyo tökuyokwïyi kechiryechi korononi ngat.

²¹ Wölo lïku wölo möngöy tïpö wudïn, akïlïkwï wölo teköy pyukïktin panchenikwa. Möngöy korononi cheptusonkoltin, akïlïkwï wölo le kïratis pironchegho oy.

²² Teghyegho suyï wölo kikïtek atökerip kanasyante, teghyegho chepkonöw korikwa cho kipïchighöch cho kipö pöytoghï, kïlekïtit asispa Papilon amelö töketösyini osiswechi!”