ISAYA 11 - PIPÏLIA

¹ Kïlenyona, pituno sanakana ghït pö Yese, akuyinu akwa morïna nyo ngwïno ighinkachi.

² Töpo mïkulöwu ECHOTYON parakunyi mïkulögh nyo pö ngöghomnyö nko nyo pö sïkunöt mïkulögh nyo pö kirwokin nko owesyö. Mïkulögh nyo pö kinkïtöt nko nyo wöghöy ECHOTYON,

³ akïmi ngörekyenyi kiwaghat nyo kiwöghöy ECHOTYON. Melö rwoköy kïrïp kegh nko ngal cho sïwïyi, anta chil kïrïp kegh nko ngal cho lïmo pich pat,

⁴ wölo rwokyini mey ompö man akïtiwu pich cho memuktocha kegh. Mungöy ngölyontenyi pipö ngwïny otini kangalan, akïpar mwokïyis ngalanatenyi.

⁵ Lïku man angweto muyenyi nyo röto kegh, akïlïkwï kighanata angwa nyo röto kegh.

⁶ Möngöy suyon osiswechoni nko wawa kech, kïrï möril nko wawa aran. Oketïyi mogh nko ngötïny, akïrang chane monïng nyo mïnïng.

⁷ Oketïyi tïch nko tyonkïn cho echön kïsir möril akïrusot moghekwa tïkwïl ompö kalya. Omöy ngötunywö mopö le tïch.

⁸ Medonye kïgh moroya mnyarkil, kïrkegh köpirönö atolekïtö kö pö mïny.

⁹ Möminye kïgh nyo omöy kïgh ompö kutïngtönyan nyo tïlil, ompöwölo ghömu ngwïny kïmïkul ngöghomnyo ECHOTYON, le pögh cho ghömu nanam.

Mïlisyogh pö pïnot

¹⁰ Itu asis ato ngetuno pöytoghintö nyo rel ara Yese nyo ghyongöy kïlïku kiporunöt ompö pipö punton. Pkonöy pich kïtuyegho kanasyantenyi nyo töror akutö nyinte konyït.

¹¹ Pöghisyegho Echotyon ngat owesyenyi kuyokunö pikachi pïnotön ato itï asisoni kïmïlisyö korengwa cho kidong koro Asirya nko Misri ompö koroswo pipö Patros nko Etopya nko Elam nko Papilonia nko Amat nko koros cho mi nanam cho kiwit pögh.

¹² Atolapay kïsyol ECHOTYON pentera nyo porchini pipö punton lö kaghamït nyinte pipö Israel nko cho pö Yuda cho kitoytoyö kïngetunö luchtin angwan cho pö ngwïny.

¹³ Amelö tökwomchini paytaghpa Israel Yuda nyonyintön ngat, amelö tökïlïku Yuda pung pö Israel.

¹⁴ Pokyini chane kwodeny pipö Pilisti ompö okumpö ta, akïnam cho möngöy kongasis. Poryegho pipö Edom nko cho pö Moap akïrïnta, atolapay kïterchï pipö Amon chane.

¹⁵ Ighöy ECHOTYON Nanam nyo ipöy pögh lalwa Misri kïteny, akïyonï yomat nyo layate kungwïn kïpel lalwa Yuparet kïteny lakaw, kïpoto kori pöghon cho le mut nko odeny cho kosuno pögh, atökumï chi anka tïkwïl kwoghyö antakwagh.

¹⁶ Akïrumunö or nyo wow nyo pkono pipö Israel cho le ngötunön koro Asirya kïkarkegh nko wölo kilïkwï asis nyo kingetunö pikökwa koro Misri.