ISAYA 10 - PIPÏLIA

¹ Heywey! Ochech pich cho chikyini pich kiyomisut cho melö pö man nko kikirï cho kiru ngal cho rïmöy piköchan!

² Kachengakwa ompö aranoni pich cho le chopot tömösïch mantangwa, amasekwa piköchan cho le mey mantangwa. Kachengekwa ompö aranoni tïpö mïsïktin nko cho pö pönon!

³ Oghekwa ne ato itï asis nyo kichopokwa? Oghekwa ne ato ipï nyinte rïmöt nyo ngwïno wölo low wölo omitekwa? Orïpchinekwa onö tonyorunö kingarakat? Owïnchinekwa onö sïkönötengwa?

⁴ Kïpörokwa otini osetekwa anta kïrangakwa alïkuna mampustin. Akï kïrkegh keghisyö lenyoni, kïmelö wonyot nörekyo ECHOTYON, wölo tökïghïteghote ewunyi nyo nyete le ye.

Lïku pöytoghinto Asirya sito Tororöt

⁵ Kilö ECHOTYON, “Kïkany nyo le nyi Asirya! Opöghisyegheninyi le lïkïp nyo pö narekat, nyo ochoponan kong pich cho konörekyan.

⁶ Kayontan koro Asirya kïporyeghö punton cho menkïtcha Tororöt, pïch cho kighanïn anarek. Kayontan chane kïpa kïpörï tïkwïn akuritï akïtyakata pikö le norayon nyo mi arawet.”

⁷ Wölo sis wölo möktoy pöytoghinto Asirya. Mököy kïpöröy punton cho chang.

⁸ Ompöwölo kwolöy kegh nyinte lö, “Opisatanyan anka tïkwïl kï pöytoghin!

⁹ Kyarïntan kanastina Kalno nko Karkemis nko kanastina Amat nko Arpad. Kyarïntan tïkwïl Samaria nko Damaska.

¹⁰ Kïle atoni kitïta ewunyan paytaghtina körkeyïntin, körkeyïntin cho kikipat cho chang kïsir körkeyïntino Yerusalem nko cho pö Samaria.

¹¹ Kawuran Samaria nko körkeyïntinechi löwïr, aghchinan tïkwïl lenyoni körkeyïntine walaka cho kïsogho Yerusalem.”

¹² Wölo lentöy Echotyon, “Nyini kawanyan kïgh nyo oghan ompö kutïng pö Sayon nko ompö Yerusalem, achuman nyu pöytoghinto Asirya ompö menötenyi nko ompö kwolötenyi.”

¹³ Kwolöy kegh pöytoghinto Asirya lö, “Kaghan ante. Ochan awes achan ngöghom achan chïrer. Kyanateghan rotyotïno pipö punton asaran chane kaplawachtinekwa! Katïkatan pikö cho tïpisot ngöcherwo paytaghat le chi nyo le nyakan.

¹⁴ Karkegh pipö ngwïny nko pancha tarit. Kyaghamïtan mökosyengwa ompö kwïskwïsyö kïkarkegh nko chi nyo kwöghöy adöstin. Melö kimi kapepcha nyo kipilpil atökwotyeghenanïn, kimöminye kuti tarit nyo kiteghchanïn!”

¹⁵ Wölo kïlö ECHOTYON, “Muköy so oywö kwighöy kegh lö ochï wow kïsir chitö nyo pöghisyegho? Pïchigh so mïsumenö kïsir chitö nyo pöghisyegho? Melö syolöy lïkïp chi, chi nyo syolöy lïkïp.”

¹⁶ Kïlenyona nyu, töni Echotyon, ECHOTYON Kimuktoghin pikachi sömew nyo chopöy kong pikachi cho nöryote. Töni porwoyikwa ma nyo nöghöy kutate.

¹⁷ Lïku löpoyïn pö Israel ma, kïlïkwï Nyinte nyo Tïlil lyopöt nyo pelöy ompö asis akonga kïgh anka tïkwïl akipelöy ompö katokachi nko takalawkachi.

¹⁸ Pelöy wudïn cho okwoghöch nko paren cho kïngoröy kïwïryö lömïs, kïkarkegh nko chepköröngwö nyo wuröy chi.

¹⁹ Ngörïngitu ketï nyoman cho ngötu, nyo muköy ompö monïng ntökuyit.

Mïlisyot cho ngörï

²⁰ Itu osiswö ato melö tökukönöy pipö Israel cho ngötu pipö puntoni walaka cho kimököy kuwuröy chane kuwonyö. Könöy chane lasiny ECHOTYON Tororöt pö Israel nyo Tïlil.

²¹ Mïlonchot pipö Israel cho ngörï wölo mi Tororötïngwa nyo awes.

²² Kïrkegh chang ye pipö Israel le ngayam cho mi nanam, wölo mïlonchot cho ngörï. Mi kiwurata kïköngöy chane akwigho lenyoni ompö man.

²³ Ompöwölo ipu Echotyon, ECHOTYON Kimuktoghin kiwurat nyo ghömu ngwïny kïmïkul.

Mungöy ECHOTYON Asirya

²⁴ Mwochini Echotyon, ECHOTYON Kimuktoghin pikachi cho möngöy Sayon lö, “Mawagh pipö Asirya, kïrkegh kechopekwa kong chane le wölo kidakwa pipö Misri.

²⁵ Ompöwölo tomönye kite kuwonyö kichopatenyan ompö akwa, atökutang nyu kiwuratenyan wölo mi chane.

²⁶ Ani, ECHOTYON Kimuktoghin nyo onyörilöy kong chane kïle pörsyonanya pö pipö Midyan ompö ghatya Sinay. Onyörilan kong Asirya kïle wölanya kyadan Misri.

²⁷ Otyokenokwa pipö Asirya ato itï asistanyan. Melö tökïlïku mïchokingwa nïkisïn nyo okösönekwa ngat ompö pughwayikwo.”

Kepokï pung

²⁸ Kanam pung kanasyanta Ayat! Kewer Mikron! Achinö körorchï tïkukwa Mikmas!

²⁹ Achinö koghyö akuwer tökïruyö Kepa! Kegh pich cho möngöy kanasyanta Rama kïpotonchö, akwigh pipö Saulö cho möngöy kanasyanta Kipea kupertoy.

³⁰ Oteghyenö tya pipö Kalim! Alïma pipö Laisya! Omölyöngunö pipö Anatot!

³¹ Kepertoy tökïsörï kegh pipö Madmena nko cho pö Kepim.

³² Mito asisete pung kanasyanta Nop, mito kusösoko morikwa wöloni akïtopönöy kutïng pö Sayon, nyo mi kanasyanta Yerusalem.

³³ Osïwïyekwa lö rekuno Echotyon, ECHOTYON Kimuktoghin chane ompö wölo mi le mori ket cho kakïtör kïchïnu ompö kiteghat nyo pö otyogh akïmïrisyö. Kïtöröy cho kwolöy kegh tya nko cho koghöch tya ompö chane akerulchï ngwïny.

³⁴ Töröy ECHOTYON chane kïkarkegh nko ket cho mi wuw kwen, cho kïtöro oywö, rultoy chane chi nyo awes kïkarkegh nko ket cho pïchighöch cho mi Lepanon.