IGHISYEWUT 9 - PIPÏLIA

¹ Wölo kitökïmi Saulö kwotyegho kinetanpa Echotyon ompö pörchö, kïwö wölo mi Tïsin nyo Wow,*

² akïtep nyinte palaltin cho kipöy kïpa kori sowut ompö Damaska, tototöp ntökïnyorï chi anka tïkwïl nyo rïpöy Aranoni pö Echotyon ompö wölini, kumï kïnam chane akïrat, kö kor anta mïrön, akumïtï kïpka Yerusalem.

³ Kimi nyu Saulö pan kïwetöy Damaska, akwotini kirich, kulïwï lenyini löpoyïn nyo kingwïna yïm le kiryal, kulïwchï nyinte wop lapay.

⁴ Kupïtyï ngwïny akïlïm kut nyo kilenchini nyinte, “Saulö, Saulö! Ompö ne techopaninyi kong?”

⁵ Kïtep lö, “Ichinyi ngo nya, Echotyon?” Kïlö, “Ochan Yeso, nyo ichopenyi kong.

⁶ Wölo ngeta wïyö tanga kanasyan, atökemwowun kïgh nyo mïchini ighe.”

⁷ Kughyö akïsisyö lasay pich cho kirutoy nko nyinte, amangalancha chonikïny. Kilïmöy chane ngalana, wölo kimasïwacha chi choni kingölonöy.

⁸ Kïngeta Saulö ngwïny akumukyï kïngany konyichi, wölo kimökïsïwïyinye kïgh. Kïlenyona kenam egh akuretö nyinte ntökwit kanasyanta Damaska.

⁹ Kimemïnye kurosïta ompö osis sömök, akimamnye kïgh anta gha pögh.

¹⁰ Kimito nyu kighönintö akong Damaska nyo kikuro kaynenyi Anania. Kïlenchï Echotyon ompö sïwïyagh nyinte, “Anania!” Kïlö Anania, “Anyï ani kö Echotyon.”

¹¹ Kïmwochï Echotyon lö, “Ngeta wïyö tanga apuke nyo kïkuro Ghïteghote, aitep ompö kö pö Yudas, chi nyo kïkuro Saulö nyo pö Tarso. Ompöwölo mi nyinte kïsoghöy,

¹² aka kïsïwa nyinte chi nyo kïkuro Anania kungwïnöy akukanagh nyinte morichi atökumï kurosïta ngat.”

¹³ Kuyokyï Anania lö, “Echotyon, kyalïmwan pich cho chang chichoni, wölo teno ghöyityö nyo kighchï piköku cho ghöninyi ompö Yerusalem.

¹⁴ Akingwïn ye Damaska nko owesyö nyo ketö tïsï cho echön atökïnam pich lapay cho soghinyi.”

¹⁵ Kïlenchï. Echotyon, “Wïyönyi, ompöwölo kakïlan nyinte atopöghisyeghan, atökuporchï kaynenyan pipö punton nko pöytoghï nko pipö Israel.

¹⁶ Ompöwölo oporchinan nyinte tïkwïn lapay cho mïchini kïsïkö nyinte nyarïl ompö kaynenyan.”

¹⁷ Kïlenyona kïwö Anania, kïlït kö, akukanagh ewunechi Saulö. Kïlenchï, “Tupchenyu Saulö, köyonwanïn Echotyon Yeso, nyoni kichumchinyi ompö or otini kengwïnenyi yi. Köyonwanïn angwïn wölo imitenyi atemuka rosïtena ngat, akenyïghitïn Mïkulögh nyo Tïlil.”

¹⁸ Kïnyini lawel kïchïntegho konyi Saulö tïkwïn cho lata per akurosïta ngat. Atolapay kughyö akepatisan.

¹⁹ Kïkany kuwany kwomisïyï, kïnyorï owesyö. Kumpur Saulö osis cho te nko kighönï cho kimi Damaska.

Omtegho Saulö Damaska

²⁰ Kïnyini lawel kïwö kori sowut akutor kwamta lökoyo Yeso lö, “Nyinte wero Tororöt kï.”

²¹ Kïtangany pich lapay cho kilïm ngalechi akïlö, “Menkanye nyï chichay kipar pich ompö Yerusalem cho kisoghöy Yeso? Akengwïn wöletewöl lö tanam pich cho lata choni tökwïpchï chane tïsï cho echön kïrötote.”

²² Wölo kïsïch owesyö tya amtaghpa Saulö, akwigh pipö Yaudi cho kimönyöy Damaska kïtangany amökumïcha kuyokyï nyinte ngölyon, akuporchï chane lasiny lö, Yeso kï Kristo.

²³ Kïkany kuwer osiswö cho chang, kuryam pipö Yaudi akïmar or nyo tïgho Saulö.

²⁴ Wölo kunkïtï Saulö machatengwa. Ortïn kisyepöy pöghet nko nangat lö tökïpar nyinte.

²⁵ Wölo kïpka ogho pipö Saulö akureytö nyinte ompö köröp kïtïl nayat.

Mi Saulö Yerusalem

²⁶ Kïwö nyu Saulö Yerusalem akumukyï lö, oghömsot nko kighöni walaka. Wölo meghancha lö, nyinte kï kighönin tïkwïl, kiwagh chane nyinte.

²⁷ Wölo kumït Parnapa nyinte kïwö wölo mi kiyoktoghï. Akwomchï chane wölo kisïweghta Saulö Echotyon ompö ara or, akïngölonchï nyinte nko wölo kyamta lökoyo Yeso ompö nyakanan ompö Damaska.

²⁸ Kumpur nyu Saulö nko chane akiwestotö kïghömï Yerusalem kïmïkul,

²⁹ kwomtotoy ompö nyakanan kaynata Echotyon. Kingalan akï tepöy kegh nko pipö Yaudi cho kingölonöy ngala Krik, wölo kïyar chane tïkwïl or nyo kïpar nyinte.

³⁰ Kïkany kunkïtï kighönï lenyoni, kumït Saulö kïröytö kïwö Kaysaria akïyonta kïwö Tarso.

³¹ Kïlenyona nyu, kïnyorï kimïny nko kalya kanisa kïmïkul nyo kimi Yudea nko Kalilaya nko Samaria. Kïtösisyö pich kïchangit cho kighan ompö kingarakata Mïkulögh nyo Tïlil, akïpesïta ompö kiwaghata Echotyon.

Mi Petro Lida nko Yopa

³² Akwotini kirimöy Petro wop lapay wölo kimi chane tïkwïl, kïwö kïrutochï pipö Tororöt cho kimi Lida.

³³ Kïnyorchï wöloni chi nyo kikuro Aynea, nyo kimeyta por, amangetanye pöröy könyis mut nko sömök.

³⁴ Kïlenchï Petro, “Aynea, sopinyi Yeso Kristo. Ngeta aitagh pöroyungu.” Kïnyini lawel, kïnget.

³⁵ Kïsïwa pich lapay cho kimöngöy Lida nko Syaron chichoni, akughan Echotyon.

³⁶ Kimito korka akong Yopa nyo kikuro Tapita, nyo kighanate. (Kikuro kaynenyi ompö ngala Krik Dorkas, nyo ato kïwaghach kï chemïl.) Kighchini pich nyo karam akungöroköy mey.

³⁷ Kuchir ompö osiswechoni akïma. Kewun portanyi aketö kö nyo mi parak.

³⁸ Ompöwölo ki lekïto Yopa Lida, otini kïlïm kighönï lö, mi Petro Lida, kïyonta pich odeny kïpa kïkur nyinte lö, “Ngwangwa nyonchech lawel.”

³⁹ Kïlenyona kïnget, Petro akïwö nko pïchay. Nyini kitïta, kemït kutang kö nyo mi parak. Kïpka mïsïktin kughyongö mösunyi cho kiloksot akuporchini nyinte anankis nko sïro cho kinap Dorkas otini kitökïsöpöy.

⁴⁰ Kiyon Petro chane lapay kïpa sany, akïkïtïng akïsagh, atolapay kïwaghaka wölay mi poray akïlö, “Tapita, ngeta!” Kïyat konyichi, kïkany kïsïwa Petro, kïtöpö ngwïny.

⁴¹ Kughïtö Petro ewunyi kungarak kïnget. Atolapay kikur kighönichay nko mïsïktinechay, atolapay kutö monïngay chane kïsöpöy.

⁴² Kïlïm pich lapay cho kimi Yopa ngalechoni kighisyö, pich cho chang kughan Echotyon.

⁴³ Kïtöpö Petro Yopa osis cho chang nko ighinto angwoy nyo kikuro Simon.