IGHISYEWUT 8 - PIPÏLIA

¹ Aki akonga Saulö ompö pïchoni kicham kïma nyinte. Asisoni kanisa nyo kimi Yerusalem. Kichopata kong kïlïtï Kïtoyö Pich kighönï, kïghömï Yudea nko Samaria, kïpoto kiyoktoghï.

Kechop kong Saulö kanisa

² Kïtïp nyu pich cho kighönöy Tororöt Stepano, akïlokyï nyinte nyoman.

³ Wölo kinyaril Saulö kanisa, kïwö kïlïtotö kö anka tïkwïl, akuretö kighönï mïrön nko kor, akïtorchï chane chela.

Amtaghata Lökoy cho Karamach ompö Samaria

⁴ Kïpa nyu pich chay kökitoyö kwamta Lökoy cho Karamach.

⁵ Kïwö Pilipo kutang kanasyan nyo mi koro Samaria akwamta ngala Kristo.*

⁶ Kïter söpïchtinö ngalechoni kimwochini chane Pilipo, otini kïlïm chane nyinte akïsïwa kiporun cho kïgh nyinte.

⁷ Ompöwölo kingeta oy pich cho chang cho kipote oy, kuteghyot, akesop pich cho chang cho kimeytoy porwöy nko cho kingwolsot.

⁸ Kïlenyona, ki wow tya ngörekyo pich ompö kanasyanta Samaria.

⁹ Kimöngöy chi nyo kikuro Simon kanasyantanoni, nyo kimi kïpöghisyegho osis cho chang cho kikuwer, akwigh pipö Samaria kïtangany ompö panenyi. Kigh kegh lö ochï chi nyo awes,

¹⁰ kïterchï pich lapay ompö kanasyantanoni nyinte, cho mïnkech nko cho echön. Kïlö pïchoni, “Owesyo Tororöt nyay wow chichï, nyay kïlentöy, ‘Owesyö nyo wow.’ ”

¹¹ Kiter pich nyinte ompöwölo kigh pananoni töngönchin ompö osis cho chang.

¹² Wölo nyini kighan chane Lökoyo Pilipo cho pö Pöyunöto Tororöt nko kaynata Yeso Kristo, kepatisan chane löwïr mïrön nko kor.

¹³ Kughan Simon nyinte tïkwïl, kïkany kepatisan nyinte, kïtöpö nko Pilipo, kïsïwa töngönchin nko kiporut pö owesyö cho echön kwighisyot.

¹⁴ Nyini kïlïm kiyoktoghï cho kimito Yerusalem lö, kitach pipö Samaria ngölyonto Tororöt. Kïlenyona, kuyokyï chane Petro nko Yoana.

¹⁵ Akwotini kitïta chane wölini, kïsoghchï le kighönichay kitach Mïkulögh nyo Tïlil.

¹⁶ Ompöwölo kitomönye kïrökyï Mïkulögh nyo Tïlil ompö pïchoni akonga kökikepatisan chane ompö kaynata Echotyon Yeso.

¹⁷ Atolapay kukana ewunekwa parakungwa, kïtak chane nyu Mïkulögh nyo Tïlil.

¹⁸ Nyini kïsïwa Simon lö, katak kighönichay Mïkulögh nyo Tïlil otini kikana kiyoktoghï ewunekwa parakungwa. Kïlenyona, kwonkoghchï chane ropïyen,

¹⁹ akïlö, “Okonante owesyonete tïkwïl, tömanyïl ato akanaghan ewunechu chi anka kïtïkon, kïtak Mïkulögh nyo Tïlil.”

²⁰ Wölo kïlechï Petro nyinte, “Ipot nko ropïyeniku, ompöwölo kenananyi lö, omuköy onyorï konunöto Tororöt ompö ropïyen!

²¹ Möminye karerantangu anta ghömïchö nyo itïngetenyi ompö ighisyencha, ompöwölo metenatenye mïkulöwungu ompö tawu Tororöt.

²² Kötenö machatengu nyï gha, aisagh Echotyon atömanyïl kïlöstewun ompö kinonut nyo lata nyete.

²³ Ompöwölo kasïwan lö, nyïghitatïnyi ngwonïn aichinyi ratana ngokï.”

²⁴ Kïlenchï Simon Petro nko Yoana, “Ngwangwa osoghwante Echotyon atömönyorwanïn tïkuchoni kamwaghakwa.”

²⁵ Kïkany kuwany kutötoy söwintönengwa, kïmïlisyö Petro nko Yoana akïpa Yerusalem. Akwotini kimi pan, kwomchï Lökoy cho Karamach kanastin cho chang cho pö Samaria.

Pilipo nko chi pö Etopya

²⁶ Wölo kïlenchï malaykayanta Echotyon Pilipo, “Ngeta wïyö tanga wölnö porö, rïpa or nyo ngwïno Yerusalem kugheghöy Kasa.” Or nyo le surkwen.

²⁷ Kïlenyona, kïnget nyu akïwö. Kungwïn chi nyo pö Etopya nyo kile latan* nyo kiwetöy katanyi. Kitïng nyinte pöghisyö nyo wow nyo kighyongchini ropïyeni Kandake, pöytoghin nyo le korka nyo pö Etopya. Kingwïn nyinte kisagh ompö Yerusalem.

²⁸ Kimi kusomönöy kitapu werkoyon Isaya otini kiwetöy.

²⁹ Kïlenchï Mïkulögh nyo Tïlil Pilipo, “Wïyö rika nkarinï pö lïk.”

³⁰ Kurïp Pilipo wölo mi nyinte kïlïm kisomönöy kitapu werkoyon Isaya. Kïtep nyinte lö, “Pköchininyi ngalechoni isomönenyi?”

³¹ Kuyokyï chichay lö, “Pköchinanïn lö ne, ato möminye chi nyo porwanïn?” Kïmwochï Pilipo, kïpus kïwö kïtöpö nkarinyi nko nyinte.

³² Achï Kikirut choni kisomönöy, “Le kech nyo kiretoy kepetöy keyengöy, anta wawa kech nyo sisöy otini kïmutöy put, kïlenyona kimayatnye kutinyi.

³³ Kikireyteghö nyinte, amöminye chi nyo kisöröp. Ekïngo nyo muköy kïmwowï ngala yiyenyi nya? Ompöwölo kikechenga ngwïnyinï söpontanyi.”

³⁴ Kïtep chichay Pilipo lö, “Mwowante lö, ngo chichï ngölono werkoyontonï. Nyinte nya anta chitö anka?”

³⁵ Kutor Pilipo kïngalan kïtowunö köröwontonete pö Kikirut, kïmwochï nyinte Lökoy cho Karamach cho pö Yeso.

³⁶ Akwotini kitökïpetöy chane ompö ara or kwitïta ato mi pögh, kïlö chichay, “Achï pögh. Ne nyo körtoy tömökipatisananïn nya?” [

³⁷ Kïlenchï Pilipo, “Ato ighönenyi ompö mïkulöwungu kïmïkul kumuko kepötisöninyi.” Kuyokwï lö, “Oghönan lö, Yeso Kristo kï Wero Tororöt.”]

³⁸ Kïmir chichay nkarinay kughyö, kïröytö chane kwodeny kïpa wölo mi pögh, Pilipo nko chemokonay, kupatisan nyinte.

³⁹ Kïkany kïngetunö chane wölay mi pögh, kumït Mïkulöwu Echotyon Pilipo. Akimökïsïwanye chichay nyinte ngat, wölo kïwö arenyi nko ngörekyö.

⁴⁰ Kïlö olö Pilipo omi Asoto! Atolapay kïwö kuwerata kanastin löwïr kwomtoy Lökoy cho Karamach, ntökïtenö kwit Kaysaria.