IGHISYEWUT 6 - PIPÏLIA

¹ Akwompö osiswechoni ato kimi kïtösisyot kighönï, kïngwïrngwïronchï pipö Yaudi cho kingölonöy kuti pipö Krik pipö Yaudi walaka, ompöwölo kimayangnye kutö mïsïktinekwa tïkwïn cho kinyoru kinomnyö.

² Kïlenyona, kïkur kiyoktoghichay le taman nko odeny kighönï nyoryogh kïmïkul akïlenchï, “Merokonye kepïstö kyamta ngölyonto Tororöt akepechï sïngut pö omis.

³ Kïlenyona tupchenichu, akïla ompö kwenunkwa pich mut nko odeny cho kinkït lö ghönote, akï nyïghitote Mïkulögh nyo Tïlil nko ngöghomnyö atöketönö chane kughyongchï pöghisyonï.

⁴ Wölo kanya kesïngenacha saghat nko amtagh pö Lökoy cho Karamach.”

⁵ Kuten ngölyotononi ompö pïchay lapay, kïlenyona kïkïl Stepano, chi nyo kinyïghitate kighanata nko Mïkulögh nyo Tïlil nko Pilipo nko Prokoro nko Nikanor nko Timon nko Parmena nko Nikola nyo pö Antiokia rwakana kighanata pipö Yaudi.

⁶ Kumït pichoni tawu kiyoktoghï, kïsagh akukanagh ewun parakungwa.

⁷ Kïlenyona kulet tagh ngölyonto Tororöt kïyasta akïtösisyö nyoman ompö Yerusalem kiyitöto kighönï, kughan tuyot nyo wow nyo pö tïsï tïkwïl kighanatanoni.

Kakïnam Stepano

⁸ Stepano, kï chi nyo kinyïghitate pöropchö nko owesyö nyo kigho töngönchin cho echön ompö kwenu pich.

⁹ Wölo pikö walaka cho pö kö pö saghat* nyo kikïkuro pö, “Cho Tyokote,” nko pipö Yaudi cho kipkono Kurene nko Aleksandria nko walaka cho kipkono Kilikia nko Esya kumöl kegh nko Stepano.

¹⁰ Wölo kitö Mïkulögh nyo Tïlil Stepano ngöghomnyö nyo wow, nyo otini kingalan kïmökumïcha kïrïnta nyinte.

¹¹ Kïlenyona, kïngölonchï pich cho te kïmwa lö, “Kakïlïmacha nyinte kïmwoytegho ngal cho ghach Musa nko Tororöt.”

¹² Kumï ompö aranoni kutö sirmoy pich nko poy nko koneti kirurut, kïpka wölo mi Stepano akïnam akumïtyï tawu Kokwö.*

¹³ Atolapay kïkurï pich cho kimïrchï nyinte putintön, lö, “Anyï chi nyo möpïstonye kïmwaytegha ngal cho ghach nyi tïlil nko kirurut.

¹⁴ Ompöwölo kakïlïmacha nyinte kïmwoghöy lö, wuröy Yeso nyo pö Nasaret yeteyi akunyar osïltin löwïr cho kikonecha Musa.”

¹⁵ Kungwïryel Stepano pïchay lapay kimpuröy Kokwö, kïsïwa tokochunyi lö kilata tokochu malaykayan.