IGHISYEWUT 4 - PIPÏLIA

¹ Akwotini kimi Yoana nko Petro kïngölochini pich kurelï tïsï nko wowïn nyo kighyongchini pich cho kiripöy Kö pö Tororöt* nko Sadukaytin* wölo mi chane,

² kisïnyorïsyö ompöwölo kinetöy akwomchini pich kinetanchay lö, kitutï Yeso kututunö ngwen, kïgh nyo poru lö tutu pich kïsöpchöt ngat.

³ Kïlenyona, kenam pïchay aketorchï chane chela ntökïyech, ompöwölo kökikwimön.

⁴ Wölo kighan pich cho chang cho kilïm ngölyontonay, kitïta kiyitöto pïchoni mïrön 5,000.

⁵ Nyini kïyech, kuryama Yerusalem kintöghoghi pipö Yaudi nko poy nko koneti kirurut kanasyanta.

⁶ Kïtuyö nko Anas nyo kile Tïsin nyo Wow* nko Kayapa nko Yoana nko Aleksanda nko walaka cho kipö ara Tïsin nyo Wow.

⁷ Nyini kitö kinetanchay kughyongö kwen kïtep chane lö, “Owesyö ne nyï otïngetekwa, anta kayna ngo nyini kopöghisyeghekwa?”

⁸ Kuyokyï Petro ompö owesyo Mïkulögh nyo Tïlil pïchay lö, “Akwa kintöghoghï nko poy:

⁹ ato kïtepecha nyu asete kïgh nyo karam nyo kakighchï chichï kingwolöy nko wölo kisöptö,

¹⁰ nya kïpköchokwa löwïr nko pipö Israel lapay lö, ghyongo chichï yi le tawunkwa kïsöpote ompö kaynata Yeso Kristo* nyo pö Nasaret nyay kyowudekwa, wölo kututunö Tororöt ngwen wölo mi pich cho kimeghö.

¹¹ Yeso nete köghay kyataghakwa tekï, wölo kawaghaka ye nyu kïlïkwï koghpa luch nyinte.

¹² Amöminye sörunötö nyo kïnyoruno chitö anka, ompöwölo, möminye kaynat anka ngwïny nyo kikitö pich tökïsörwecha.”

¹³ Kïtangany Kokwonay* otini kisïwa Petro nko Yoana kïngölonöy ompö nyakanat, akwanyï ki pich pat cho kitomöcha kusomön, kunkïtï lö, kimi chane nko Yeso.

¹⁴ Wölo möminye kïgh nyo kitökïmwoghöy ompöwölo kisïwa chichay kikisop kughyongo otini mi chane.

¹⁵ Kïlenyona kimwochï Kokwö chane kïpa sany, kutor kïngalana parakungwa, kïlentöy,

¹⁶ “Kido ne pïchï? Akwanyï nkït chi tïkwïl nyo möngöy Yerusalem kiporunötonï pö töngönchin kegh pïchï, amökimukechanye ntökemöl?

¹⁷ Wölo atömayasta ngölyontonï ompö kwenu pich, akany kyotyeghenö pïchï lö mongölonchï chi anka tïkwïl ompö kaynanoni.”

¹⁸ Kïlenyona kïkur chane akïlenchï motöp ngat kokay tangalana anta anet ompö kaynata Yeso.

¹⁹ Wölo kuyokyï Petro nko Yoana chane lö, “Arosa akwane lö, nyono roko ompö tawu Tororöt, keterwokwa nya anta keterchï Tororöt.

²⁰ Ompöwölo mökimukechanye kesisyenö amökïngalana tïkwïn cho kikesïwecha akelïmacha.”

²¹ Kïkany kwotyeghö Kokwö chane ngat kumuchö, kutyakta kïpa. Kimemïcha kïmuny chane, ompöwölo kimi pich kïsölöy Tororöt ompö tïkwïn cho kighisyö.

²² Ompöwölo kitïng chichoni kikisop ompö töngönchin könyis cho tïlöy tömönut angwan.

Kasagh kighönï kïnyorï nyakanat

²³ Nyini kikïpïstö chane, kïmïla Petro nko Yoana kutang wölo mi kongotïkwa akïmwatïta ngal löwïr cho kimwochï chane tïsï cho echön nko poy.

²⁴ Nyini kilïm lenyoni, kïsagh Tororöt tïkwïl ompö kut akonga lö, “Echotyon, Kimuktoghïn nyo kigh yïm nko ngwïny nko nanam nko tïkwïn lapay cho mi ori.

²⁵ Kingalanenyi könyisyok ompö Mïkulöwungu nyo Tïlil kuwerï paponcha Daudi, mötworintengu lö, ‘Ompö ne tökwam apït puntonï, akunonöy tötut cho pö kwïle?

²⁶ Kigh kegh yetïntino ngwïny, akusup kegh pöytoghï atökïporyeghö Echotyon nko Masiyenyi.’

²⁷ “Nyoman kituyö kegh Erode nko Pontio Pilato nko pipö punton nko pipö Israel ompö kanasyantanete akïtagh Mötworintengu nyo tïlil, Yeso, nyo kikïlanyi le Masiya.*

²⁸ Kituyö chane atökwigh kïgh anka tïkwïl nyo kitatanyi könyisyok, ompö owesyengu nko machatengu lö, igho.

²⁹ Kïlenyono ye nyu Echotyon, rose wölo otyeghenecha kïlïkwï, itö mötworiku, owesyö nko nyakanat nyo ngölono ngölyontengu.

³⁰ Ghïtenö ewungu kïsöpchö pich, aikany kwighisyö kiporut nko töngönchin ompö kaynata Yeso Mötworintengu nyo Tïlil.”

³¹ Nyini kuwany kïsoghöy, kïpotan atoni kinyoryeghö chane. Kenyïghit chane Mïkulögh nyo Tïlil, akïngalan ngölyonto Tororöt ompö nyakanat.

Ghömtoy kighönï tïkukwa

³² Kitïng nyoryononi pö kighönï machat akonga nko kinonut akonga. Akimöminye chi nyo le ompö akonga nyo kimwa lö nyenyi kïgh nyo kitïng, wölo kighamta tïkukwa chane lapay.

³³ Kitötö kiyoktoghï söwintön ompö owesyö nyo wow lö, kitutï Echotyon Yeso, ketö chane pöropchö nyo wow.

³⁴ Kimöminye chi nyo le ompö akonga nyo kichop kïgh ompö chane. Kyalta pich cho kitïng parenikwa anta korikwa, akwipï ropïyeni,

³⁵ kutö kiyoktoghichay atökechöghchï chi anka tïkwïl kïrïp kegh nko wölo tenö machatenyi.

³⁶ Kïnget Yosep nyo kikurö kiyoktoghï Parnapa (nyo ato kïwaghach kï, “Chi nyo kilöy pich”), ki chi pö Lawi nyinte, nyo kingwïna Kupro.

³⁷ Kwalta par nyo kitïng akwipï ropïyeni akutö kiyoktoghï.