IGHISYEWUT 3 - PIPÏLIA

¹ Kimi ato kiwetöy Petro nko Yoana kïsoghöy ompö Kö pö Tororöt* ato le satïn mut nko angwan.

² Akimi chi atoni nyo kingwolöy kingeta keyï, nyo kikösönu pikökwa osis löwïr kïpkonöy kutöni kuka Kö pö Tororöt nyo kikuro, “Kukat nyo Pïchigh,” atökïsom pich ropïyen cho kipkonöy kïsoghöy.

³ Nyini kisïwa Petro nko Yoana karich kïlït ori, kïsomsyö.

⁴ Kïnama Petro nko Yoana chichay kong akïlenchï, “Rosecha ya!”

⁵ Ato lopoy kuros chichay ompö Petero, kukönöy lö, sïko kïgh chane.

⁶ Wölo kïlö Petro, “Motïngetanye silpa anta koltin, wölo okoninyi kini otïngetan. Kolan ngeta weghenö keltöngu ompö kaynata Yeso Kristo* nyo pö Nasaret!”

⁷ Kïnam nyinte ewu tagh akunget kughyö. Panini lawel kïchïchïm kelyechi nko tïtïnywokö.

⁸ Kïnget lawel kughyö, akïwö kïlït Kö pö Tororöt nko pïchay, kïwetöy akudöngonyotoy akïsölotoy Tororöt.

⁹ Kïsïwa pich tïkwïl nyinte kïwestoy akïsölotoy Tororöt.

¹⁰ Nyini kinkïtï lö nyinte nyay somsïyi ompö Kö pö Tororöt atay kïlentöy, “Kukat nyo Pïchigh,” kwotyö akïtöngönchï kini kigha ompö nyinte.

Amtaghpa Petro ompö Kö pö Tororöt

¹¹ Akwotini kitökïnömotoy chichay Petro nko Yoana, kïryöwï pich lopoy wölo kimi chane, ato le körkör nyo kikuro “Körköru Solomon.”

¹² Nyini kïsïwa Petro pïchay, kïngölonchï pïchay kïlenchï, “Akwa pipö Israel, ompö ne tatanganyakwa le nyï, akölö ne tarosechakwa le ato owesyencha nko köromnyencha nyo kegh chichï kïwestö?

¹³ Tororöt pö Apraam nko Isak nko Yakopo Tororöt pö papotïnecho nyo kegh, Mötworintenyi Yeso kwororit. Yeso nyo Kyotötekwa ataghakwa nyinte ompö tawu Pilato, otinö kimököy Pilato kutyoku nyinte.

¹⁴ Wölo ataghakwa chi nyo Tïlil akï pö man. Omwochikwa Pilato kutyokwokwa pörin.

¹⁵ Aparakwa kitorinto söpon, wölo kigh Tororöt nyinte kututï akechicha söwi.

¹⁶ Kaynata Yeso nko kighanat nyo mi kaynatanoni nyini kegh chichï osïwïyekwa, ankïtökwa kï chïchïm. Kighanat ompö Yeso nyini kesop chichi lö chïkïl le otini osïwïyekwa ye tïkwïl.

¹⁷ “Kïlenyona ye nyu tupchenichu, onkïtön lö kyaghakwa nko kintöghoghikwo lenyoni ompö sölwontön.

¹⁸ Wölo kimwowï Tororöt könyisyok kuwerï werkoy lö, kinyörilöy Kristo tanyi nyo mötïny, akikwigh nyinte ngölyontononi kïpïntö.

¹⁹ Okötenö nyu, awöghökisyö, atömanyïl kemwötwokwa ngokikwo, atökïpka nyu osiswö cho pö ngörekyö cho pkono tawu Echotyon.

²⁰ Atökuyokwï Kristo nyo kikïkïl akwompö akwa, nyo kï Yeso.

²¹ Akï nyo mötïny kïtöpunö yïm, tökïtenö kïpka osiswö cho kïwöghököy tïkwïn kïrelachitu, le wölini kimwa Tororöt könyisyok kuwerï werkoykachi cho tïlilöch.

²² Kimwa Musa lö, ‘Yokwokwa Tororöt werkoyon, nyo le werïnkwa le wölini kiyokwanïn. Ater ngal lopoy cho mwowokwa nyinte.

²³ Kipesyegho pich chi anka tïkwïl nyo möterönye ngölyonto werkoyontononi.’

²⁴ “Kimwowï werkoy tïkwïl ompö kut akonga ngala osiswechete, kïngeta werkoyon Samwel nko werkoy walaka cho kirïpï.

²⁵ Ochikwa monïngo werkoy apoyekwa muma* nyo kyam Tororöt nko papotïnekwa. Le ato kimwochï Apraam lö, ‘Osoyönan pipö ngwïny kïmïkul kuwerï yiyengu.’

²⁶ Kïlenyona kïkïl Tororöt akïyonï mötworintenyi Yeso kïnya kungwïnchokwa, atökusoyönokwa, kwighakwa omïlisyeghenö ortïnekwo cho ghach.”