IGHISYEWUT 19 - PIPÏLIA

¹ Otini kimito Apolo Korinto, kïrutö Paulö kuwerata mösopit kwen, ntökwitïta Epeso. Kïnyorchï wöloni kighönï walaka cho te,

² kïtepa chane lö, “Kyatachakwa Mïkulögh nyo Tïlil otini kyaghanakwa nya?” Kuyokyï pïchay lö, “Tomönye ompö kelïmacha lö mi Mïkulögh nyo Tïlil.”

³ Kuyokyï Paulö chane lö, “Kïkany kïlenyona, osïkökwa nyu kipatisanat nyo nen nya?” Kuyokyï lö, “Akipatisanata Yoana.”

⁴ Kïlenchï Paulö, “Ki pö kipatisanata Yoana pich cho kimwatïta ngokikwa akïpïstö, akïmwochï pipö Israel kughan nyinte nyo kitökungwïnöy kïrïpu nyinte nyoni kï Yeso.”

⁵ Nyini kilïm lenyoni kepatisan chane ompö kaynata Echotyon Yeso.

⁶ Nyini kikana Paulö ewunechi parakungwa, kungwïnchï Mïkulögh nyo Tïlil, kïngalana kutïw cho sis akïngor ngal cho pkono wölo mi Tororöt,

⁷ kingata chane lapay pich taman nko odeny.

⁸ Atolapay kïlït Paulö kö pö saghat,* akïngalan nko pich aro sömök ompö nyakanat, kïmi kïteptepöy kegh nko pich kïtöpïröy chane lö tökumï kïpköchï lö man ngalechoni kingölono nyinte ngala Pöyunöto Tororöt.

⁹ Wölo kïlïkwï tighï walaka ntökïmökumïcha kughan, akïngalana ghöyityö Aranay pö söpon keporï Echotyon ompö tawu tuyonay kïmïkul. Kïlenyona, kïpïstö Paulö chane akïwö nko kighönï, kïngalan nko pich osis löwïr ompö kö nyo wow nyo pö kinetutyo Tirano.

¹⁰ Kulet ngalechoni lenyoni könyis odeny. Kïlenyona kimï nyu pich lapay cho kimönyöy koro Esya, kïlïm ngölyonto Tororöt pipö Yaudi nko pipö punton.

Werpö Skepa

¹¹ Kutö Tororöt Paulö kwigh töngönchin cho echön,

¹² ntökepchï pich cho kichirsot chini le kitampayen nko anankis cho kökikïswany portanyi, kwigh kitampayenichoni nko anankiska kïsöpchö sömewutkökwa, akïngeta chane oy.

¹³ Kimi pipö Yaudi walaka cho kipestoy akïyono oy cho ghach pich cho kimukyï kwigh lenyoni ompö kaynata Echotyon Yeso kïlenchï oyichay, “Omwowokwa lö ongetunenö chichï ompö kaynata Yeso nyay omtoy Paulö.”

¹⁴ Kimi werpö tïsinto pipö Yaudi nyo wow nyo kikuro Skepa cho le mut nko odeny cho kighöy lenyoni.

¹⁵ Wölo kïlenchï oyichay chane, “Onkïtön Yeso, ankïtön Paulö, wölo ochikwa ngo?”

¹⁶ Kunkorö chichay kötïng oy chane akïporyeghö akïkarer sïrokökwa, kïghyagha pïchay köyay.

¹⁷ Kïlïm pipö Yaudi nko pipö punton cho kimönyöy Epeso kïmïkul ngalechoni akuwöghisyö nyoman. Kïsïch nyu ororyö nyo wow kaynata Echotyon Yeso.

¹⁸ Kïpka pich cho chang cho kighan akïnganyta ompö tawu pich pöghisyewutkökwa cho ghach.

¹⁹ Kwipï kitapunekwa pich cho chang cho kighöy chesoköynön akusupö tïkwïl akïpel chane kïsïwïyi pich löwïr. Kuyit olyeto kitapunechoni, kwitïta olyenyi ropïyen 50,000 cho pö silpa.

²⁰ Kïlenyona akïtasa akulet ompö owesyö ngölyonto Echotyon.

Syala ompö Epeso

²¹ Kïkany kwighisyö ngalechoni, kunonchï Mïkulögh Paulö kïrutö kuwerata kwenu Makedonia nko Akaya atökïwö ntökwit Yerusalem. Ompöwölo kilö, “Ato atan wölini, kïmïchinanïn orutoghchinan Rumi tïkwïl.”

²² Kïlenyona kïyonta kingörokichi odeny Timoteo nko Erasto, kïpa Makedonia, kuropunö nyinte Esya osis cho te.

²³ Kitï osiswechoni nyarïl nyo wow ompö Epeso ompö ngala pipö Echotyon.

²⁴ Ompöwölo kimito chi akong nyo kikuro Demetrio, nyo kile kitonginto taghöy, kitongöy korïn cho kile körkeyïntin cho kikitöni kö pö saghat nyo kikïtekï tororöt nyo le korka nyo kikuro Artemi, kisïko ropïyen cho chang pich cho le kitongï.

²⁵ Kïkur nyu kitongichay löwïr kïtuyö nko pikö walaka cho kilata nyoni pöghisyengwa akïlenchï, “Wechara, onkïtökwa lö ngwïno mökosyenyo pöghisyonete.

²⁶ Kasïwekwa alïmakwa ngal cho ighöy kïyï le Paulö. Lentöy, melö tororötincha kokay chona ighöy pich, akïkïnkïn pich cho chang cho mi yi le Epeso nko cho mi koro Esya kïmïkul, ntökïcham ngalechi.

²⁷ Mi nyu tapan pöghisyonï le nyinyo, akïmönyoninye onkït, mi tapan anka nyo mökïkonyïtönye chi kokay kö pö tororöt Artemi, akewuröy ororyenyi ompö Esya nko ngwïny kïmïkul.”

²⁸ Nyini kilïm tuyonay ngalechoni kwam sirmoy, akutor kuteghyö lö, “Wow Artemi nyo pö Epeso!”

²⁹ Kïsyal kanasyantanay kïmïkul. Kïryagh lenyini löwïr akïlïtöy wölo kipironchegho pich, kïpa kïnam Kayo nko Aristarko, cho kile pipö Makedonia, cho kirutoy nko Paulö, akurïpteghö chane kïlïtöy wölo kipironchegho pipö kanasyantanoni.

³⁰ Kimököy Paulö kïlïtöy wölo mi pïchay wölo kimöchömchïcha pïchay le kighönï.

³¹ Kïyonta kut pikö walaka cho ki echön ompö Esya cho le kongotichi, kïrirchï nyinte lö, metöp ntewö ilït wölay pironchegho pipö kanasyan.

³² Kitïng pich atoni syala nyo wow, kïmwoghöy pikö walaka ngalekwa, kïmwoghöy walaka chikwa, kimenkïtcha ompö cho chang lö kïgh ne nyini kepï chane kïtuyeghö atoni.

³³ Kutam pikö walaka lö töptoy Aleksanda nyini kapkana ngalechini, ompöwölo pipö Yaudi chini kinam nyinte kïwö ato le tagh. Atolapay kïngölonchineghö Aleksanda pïchay egh kïsisyö akïter ngalechi, otini kimököy kïsöruno kegh pïchoni.

³⁴ Wölo nyini kinkïtï pïchay lö chi pö Yaudi nyinte, kuteghyö löwïr ompö satin odeny kïlentöy, “Wow Artemi nyo pö Epeso!”

³⁵ Ato mi lötï kumï kikirinto kanasyantanoni kwigh tuyonay kïsisyö, akïlenchï, “Mïrönchï pö Epeso ngo nyo menkït lö kanasyanta Epeso nyo le ripinto kö pö tororöt nyo pö Artemi nyo wow nko nyo pö koghay tïlil kichïnuna yïm?

³⁶ Möminye chi nyo muköy ntökumöl tïkuchoni. Kïlenyona, opïstene sirmoy, atömosörchï ngal.

³⁷ Ompöwölo kamïtukwa pïchï, machorcha tïpö kö pö tororöt amangalananye nyo gha tororötïnyo nyï le korka.

³⁸ Kwoto tïng Demetrio nko kitongichi ngölyon nko pïchï, kïyotote kokwotïno kirwok, akïmi yetïntineko wölini, ne mapa nyu wölini torwokinö kegh?

³⁹ Wölo ato mi kitö anka nyo kötomökekwa, keghöy ompö kokwö kanasyan nyo rumunote.

⁴⁰ Ompöwölo mi tapan nyo kimuköy kerwokyinecha ompö syalanï pö asisï, ompöwölo pö kwïle syalanï, amökimukechanye ntöketötö ngölyon nyo kïgheto kegh.”

⁴¹ Kïkany kïmwa lenyoni kïmwochï, söpïchay kïpa.