IGHISYEWUT 13 - PIPÏLIA

¹ Akimito kanisa nyo kimi Antiokia werkoy nko konetï chane kï Parnapa nko Simion (nyo kikuro Lotuw) nko Lukio (nyo kingwïno Kurene) nko Manaen (nyo kinar nko pöytoghin Erode) nko Saulö.

² Kïlenchï Mïkulögh nyo Tïlil chane otini kipöghisyechini Echotyon kïkïruröy akïsoghöy Tororöt, “Okonanïn Parnapa nko Saulö kïpka, kwighwanïn ighsyö nyo kyosötyan chane.”

³ Kïkany kuwany kïkïruröy akïsoghöy, kukanagh ewunekwa parakungwa akuyoktö kïpa.

Parnapa nko Saulö ompö Kupro

⁴ Akwotini kökikuyoktö Mïkulögh nyo Tïlil Parnapa nko Saulö, kïpa kïröytö Seleukia, kïpegha meli ntökwit Kupro.

⁵ Otini kïtïta Salami, kwamta ompö wöloni ngölyonto Tororöt ompö kori sowut pö pipö Yaudi. Akimi Yoana Marko kungöroköy chane.

⁶ Akwotini kiwerata kore kïmïkul nyo kikwen pögh ntökwit Papos, kïnyorchï wöloni ponin, nyo kïkuro Paryeso nyo kile chi pö Yaudi aki werkoyonto putintön.

⁷ Kimi chichoni nko pöytoghinto korononi nyo kikuro Serkio Paulö, chi nyo kichïrer. Kïkur pöytoghintonay Parnapa nko Saulö, kïpa wölo kimi nyinte ompöwölo kimököy kïlïmöy ngölyonto Tororöt.

⁸ Wölo kïmir ponintonay le Elimas chane (kaynenyi nyoni ompö ngala Krik). Kimököy kulyoktoy pöytoghintonay lö tömeghan Kristo.*

⁹ Atolapay kuchirchï kong Saulö, nyo kikuro Paulö nyo kinyïghï Mïkulögh nyo Tïlil, ponintonay

¹⁰ akïlenchï, “Nyi Wero Onyöt! Aichï punyonto kïgh anka tïkwïl nyo karam, nyïghitatïnyi ngöghomnyö nyo pö ghöytyö, mepïstonenyinye kïnure ortïna Echotyon cho ghïteghote?

¹¹ Kïlenyona nyorunyi ye ewu Echotyon. Ikörenyi amesïwïyenyinye löpoyïn ompö osis cho te.” Kïnyini lawel kupöryolisyö konyi Elimas akïnam tuwïn, kutor samsamata lö, tonyorï pich cho reton.

¹² Atolapay kughan pöytoghintonay otini kisïwa kïyoni kïgha, akïtöngönchï kinetut pö Echotyon.

Mi Parnapa nko Paulö Kanasyanta Antiokia nyo mi Pisidia

¹³ Kiwö nyu Paulö nko pich cho kimi nko nyinte kïpegha meli kïngeta Papos ntökwit Perka kanasyan nyo mi Pampulia. Kïpïstö Yoana Marko chane ompö atoni akïwö kutang Yerusalem.

¹⁴ Kurelö Perka ntökwit Antiokia nyo mi Pisidia. Ato mi asispa Sapato* kïpa kïlïtöy kö pö saghat* akumpur ngwïny.

¹⁵ Kïkany kewany kisomön Kirurut pö Musa nko kikirut pö werkoy, kuyoktö wowïntino kö pö saghat pich kïpa wölo mi chane kïlenchï, “Tupchenicho, ato otïng ngölyon anka tïkwïl nyo muköy kukilöy pich amwagh.”

¹⁶ Kughyö Paulö akuporunö ewunyi akïlö, “Pipö Israel nko akwa tïkwïl cho okonyïtöy Tororöt atere!

¹⁷ Kilöwön Tororöt pö pïchï pö Israel kukötinecho, akwigh chane kïlïku söpïch nyo wow atakinya kimi chane le to koro Misri. Kumïtuna Tororöt chane Misri ompö owesyenyi nyo wow,

¹⁸ akïmïkukön nko chane ompö surkwen ompö könyis tömönut angwan.

¹⁹ Otini kökikunyar punton cho le mut nko odeny cho kimi koro Kanan kutö pikachi kïpöyï koronay,

²⁰ ompö könyis 450. “Atolapay kutö chane kirwokot ntökïtenö osiswo werkoyon Samwel.

²¹ Otini kïtep chane Samwel lö kïyöröy pöytoghin, kutö Tororöt chane Saulö, wero Kis nyo kipö ara Penchamen, kïlïkwï pöytoghintengwa ompö könyis tömönut angwan.

²² Kïkany kunategha nyinte, kutö Tororöt chane Daudi kïlïkwï pöytoghintengwa, akïsöwintönchï lö, ‘Kasïwan Daudi wero Yese lö chi nyo koyöran akï chi nyo ighöy machatenyan lapay.’

²³ Akumïtyï Tororöt pipö Israel Ghetin, Yeso, ompö ara chichoni kïle wölo kikuyomistö nyinte.

²⁴ Akwotini kitomönye kutor Yeso pöghisyenyi kwomchï Yoana pipö Israel kïmïkul kïpïstö ngokikwa atökepatisan.

²⁵ Akwotini kimököy Yoana kuwongöy pöghisyenyi kïlenchï pïchay, ‘Olentekwa ochan ngo nya? Molenchï kegh ochan chichini kokönyekwa. Wölo arose köny. Mi rïpkanïn, akimömïchinanïnye otyokyï kweghkachi.’

²⁶ “Kïlenyona, werköcho, cho ochï monïngo Apraam nko pichi walaka tïkwïl cho mi kwenunkwa cho konyïtöy Tororöt kakwitwech ngölyontonï pö sörunöt.

²⁷ Ompöwölo menkïtïcha pich cho mönyöy Yerusalem nko kintöghoghikwa nyinte, möpköchïcha ngala werkoy cho kisomönöy ompö asispa Sapato anka tïkwïl. Kupuntö chane ngalechoni otini kirwokyï Yeso kepar.

²⁸ Kïrkegh kimösïwacha kïgh nyo kimïchini nyinte kïma, wölo kïsom chane Pilato kurwokyï nyinte Kepar.

²⁹ Kïkany kïpïntö kïgh anka tïkwïl nyo kimwa Kikirut ompö nyinte, kurekunö nyinte kimurtöwon akïrorchï nyinte pïrïm.

³⁰ Wölo kïnget Tororöt nyinte kututunö ngwen.

³¹ Akïsïwa nyinte ompö osis cho chang pich cho kipusuna Kalilaya nko nyinte kïpka Yerusalem. Akï chane cho le söwichi ye ompö pipö Israel.

³² Akipkokwa Lökoy cho Karamach cho kiyomis Tororöt papotïnecho,

³³ kikwighwecha nyete, acha, cho kichï monekwa, otini kinget Yeso. Kïle wölo kikikirta ompö tumwöyi Salat nyo pö odeny lö, ‘Ichinyi werïnyan, koyiyinyi asete!’

³⁴ Kïle wölini kitutunö Tororöt nyinte ngwen, nyo melö tökuyodo kegh ngat wölini atökïnïn, kïngalan lö, ‘Okonokwa kisoyönut cho tïlilöch akï pö man, kisoyönut cho kyoyomisyan Daudi.’

³⁵ Kïle wölo mwoytoy ompö Kikirutkö walaka lö, ‘Melö ipïsyinenyi mötworintengu Nyo Tïlil kïnyorï kiwurat.’

³⁶ Ompöwölo kikany kuwany Daudi kwigh machata Tororöt ompö pïntanyi, kïpas aketïp nko papotïnechi, akïnïn portanyi.

³⁷ Wölo manïnye nyinte nyo kingetunö Tororöt ngwen.

³⁸ Kïlenyona werköcho, onkïtunö lö, kyomwokwa atosïkö lastaghpa ngokï ompö chichoni le Yeso,

³⁹ ankïtï nyu lö anka tïkwïl nyo ghönöy nyinte, ketyoko ngokichi löwïr cho kimemuchönye kutyoköy Kirurut pö Musa.

⁴⁰ Okïr kegh nyu tömönyorwok ngala cho kimwa werkoy lö,

⁴¹ ‘Atere nyu, akwa cho ochï sösï, atanganya apotyö! Ompöwölo oghan kïgh ompö osiswekwa, kïgh nyo moghönekwanye kïrkegh kömwowokwa!’ ”

⁴² Akwotini kimi Paulö nko Parnapa kïpegho köyay pö saghat, kïsom pïchay chane lö omïlonchö asispa Sapato nyo kirïptoy atökïmwochï pich ngalechoni ngat.

⁴³ Kïkany kïngeta pïchay nyoryonay, kïrïp Paulö nko Parnapa pipö Yaudi cho chang nko pipö punton cho kikikïcham kighanata pipö Yaudi. Kïngölonchï Paulö nko Parnapa chane akukil kulet tagh kïmöngisyö ompö pöropcho Tororöt.

⁴⁴ Ato mi asispa Sapato nyo kirïptoy kïghamïtuna kegh pich lapay kanasyan kïpka kïlïm ngölyonto Echotyon.

⁴⁵ Kïkany kïsïwa pipö Yaudi nyoryotïnechay kwipö pïchay sikong. Kïtiyö ngal cho kimwa Paulö akumwoghsyö.

⁴⁶ Kïngalan Paulö nko Parnapa ompö nyakanan lö, “Kömïchï kemwowokwa ngölyonto Tororöt nyo pö tagh. Wölo otini kataghakwa ye nyu, kï korwokyikwa kegh akwane achamakwa lö, merokonokwanye söpon pö kokay, kakïpïstokwa yenyu akepa koro punton.

⁴⁷ Ompöwölo lenye nyoni wölo kimwowuntecha Echotyon lö, ‘Kotöninyi lïkuna löpoyïn pö punton, atepchinö sörunöt ngwïny kïmïkul.’ ”

⁴⁸ Nyini kilïm pipö punton lenyoni, kïngörekyö akïsal ngölyonto Echotyon, kughan pich ompö atoni cho kökikïlchï Tororöt söpon pö kokay.

⁴⁹ Kulet ngölyonto Echotyon wop tïkwïl ompö korononi.

⁵⁰ Wölo kuwulyö pipö Yaudi pipö kanasyantanay cho echön nko kor cho pö punton cho ororöch cho kisoghöy Tororöt. Kutor kïghapghap Paulö nko Parnapa akïyona chane korengwa.

⁵¹ Wölo kïparta kiyoktoghï terïtyeko kelyekwa kïlïkwï söwintön nyo gha nyo pö kanasyantanoni akïpa kutang Ikonio.

⁵² Akingörekyote nyoman kighönï cho kimi Antiokia akïnyïghitate Mïkulögh nyo Tïlil chane nyoman.