IGHISYEWUT 11 - PIPÏLIA

¹ Kilenyona kïlïm nyu kiyoktoghï nko kighönï cho kimi Yudea kïmïkul lö, kikïtach pipö punton tïkwïl ngölyonto Tororöt.

² Kïkany kïpusta Petro kïwö Yerusalem, kugheghchï pich nyinte cho kimököy pipö punton kïpa rotwö,

³ Kïlenchï, “Ne nyay kiwenyi kestoni pipö punton cho le sompen ilïkwï tontengwa aiyomisyö nko chane.”

⁴ Kïlenyono kwomchï Petro chane lasiny ngalechoni kïngeta otini kitor lö,

⁵ “Kyomitan osoghöy ompö kanasyanta Yopa, atolapay asïwan sïwïyagh. Kyasïwan kïgh nyo lata ananka nyo wow nyo kikirekunö yïm ompö sörun kwangwan, akughyongo otini lekïtenanïn.

⁶ Arosan kïyoni lasiny, asïwan tyonkïn cho pestegho kelyön angwan nko tïpö wudïn nko cho chuto kegh ngwïny nko töritwo yïm.

⁷ Atolapay alïman kut nyo kilenchanïn, ‘Petro, ngeta ye nyu aiyam!’

⁸ Wölo olenchan, ‘Ewo, Echotyon! Möminye kïgh nyo mötïlil anta nyo le sïmnyon nyo kikïlït kutinyan.’

⁹ Kïmwa kutinay kingwïno yïm ngat nyo pö odeny lö, ‘Memwagh lö, mötïlilnye kïgh nyo kikwanyïnit Tororöt.’

¹⁰ Kigha kïyoni lenyoni kïnyïl sömök, ato mi löt kechïchuk kïyay kïmïkul kïmïla yïm.

¹¹ Kïnyini kwitï pich sömök köyini kïmitecha cho kikiyokwï kïpka kïkuranïn cho kipkono Kaysaria.

¹² Kïlenchanïn Mïkulögh nyo Tïlil, ‘Wïyö nko chane, ametomtomön, nyonikïny.’ Kepecha tïkwïl nko kighönichoni pkono Yopa le mut nko akonga wölini le Kaysaria, kepecha tïkwïl ntöket köyoni pö chichoni.

¹³ Kïmwowecha wölini kisïweghta nyinte malaykayan nyo kighyongo konyi akïlenchï, ‘Yontena chi kïwö kanasyanta Yopa kïkurï chi nyo kïkuro Simon Petro.

¹⁴ Mwowunyi nyinte ngal cho sörunyi nko piko katangu.’

¹⁵ Kïkany otorön angalan, kïrökunö yïm Mïkulögh nyo Tïlil kïrökyï chane le wölanye kirökyecha otini le towunöt.

¹⁶ Atolapay anana kïgh nyo kimwa Echotyon lö, ‘Kipatisana Yoana pögh, wölo kipötisönokwa ompö Mïkulögh nyo Tïlil.’

¹⁷ Kïkany nyu kutö Tororöt pïchoni pö punton konutyononi karkegh nko nyini kikonecha otini kikighanacha Echotyon Yeso Kristo,* achan ngo nyu nyo omököy otögho Tororöt kïgh nyo mököy kwighöy!”

¹⁸ Kïkany kïlïm chane ngalechoni, kïsisyö akïsal Tororöt lö, “Nkïchï kikutö Tororöt pipö punton pöroyïn nyo kötegho atökïsöpchö!”

Kanisa nyo mi Antiokia

¹⁹ Kitoyö nyu kïyasta kighönï ompö kichopata kong nyo kitï atoni kikïpar Stepano. Kïpa walaka ntökwit Poinike nko Kupro nko Antiokia, kwomchinotoy lökoyechay pipö Yaudi opïn.

²⁰ Wölo kïnget kighönï walaka, cho kipkono Kupro nko Kurene kutang Antiokia kïpa kwomchinotö pipö punton lapay, kïmwochï chane Lökoy cho Karamach cho pö Echotyon Yeso.

²¹ Kimi owesyo Echotyon nko chane, kughan pich cho chang nyoman akïrïp Echotyon.

²² Kïlïm ngaleko kighanatanoni pipö kanisa nyo kimi Yerusalem kïlenyona kïyonta Parnapa kïwö Antiokia.

²³ Nyini kitïta akïsïwa wölo kisoyöntö Tororöt piko wöloni, kïngarak akukil chane lapay kïrïp Echotyon ompö mïkulöwekwa kïmïkul.

²⁴ Ki chi nyo karam nyinte, akïnyïghitate Mïkulögh nyo Tïlil nko kighanat tïkwïl. Pich cho chang kughan Echotyon.

²⁵ Atolapay kïwö Parnapa kutang Tarso kïyarata Saulö.

²⁶ Nyini kinyorï, kumïtï nyinte kutöngwï Antiokia. Kumpur wöloni köny akonga kïmïkul, kuryam nko pipö kanisa akunet pich cho chang. Ki Antiokia nyo kikïtowunö kekurö pich cho kile kighönï pipö Kristo.

²⁷ Kipkana werkoy osiswechoni Yerusalem kïpka Antiokia.

²⁸ Kughyö akong ompö chane nyo kikuro Akapus ompö owesyo Mïkulögh nyo Tïlil akïngor lö itu kömöy nyo wow ngwïny kïmïkul. (Kipïnö ngalechoni ato kipöytoghin, Klaudio.)

²⁹ Kutötö kighönichay kingarakat kïle wölo kiteno owesyengwa ompö machat akonga kïpa Yudea wölo kimi kighöni walaka.

³⁰ Kwigh nyu lenyoni, atolapay kutötö ropïyeni kutö Parnapa nko Saulö kwipchï poyi kanisa.