IGHISYEWUT 1 - PIPÏLIA

¹ Takwes apoy Teopilo: Kyakiran ompö kitapunyan nyo pö tagh tïkwïn löwïr cho kigh Yeso akunet,

² ntökïtenö asisini kikimït kïwö yïm. Akwotini kitomö kïwö yïm, kurur ompö ara Mïkulögh nyo Tïlil pich cho kikikïlöwön kïlïkwï cho kiyoktoy.

³ Kiporchï kegh Yeso kinetankachi kïnyïl cho chang kïsöpöy ompö osis tömönut angwan kïngeta kïma. Kingölonchï chane ngala Pöyunöto Tororöt.

⁴ Otini kiryam nko chane kïmwochï lö, “Mangeta Yerusalem, wölo akanya konunötonay kïlö Papo okonu, nyay kyalïmakwa ongölonenan.

⁵ Kipatisan Yoana pich ompö pögh, wölo kipötisönokwa ompö Mïkulögh nyo Tïlil ato lekït.”

Kakimït Yeso kïwö yïm

⁶ Otini kiryam kiyoktoghichay nko Yeso, kïtep nyinte lö, “Echotyon, panete ato iyokyinenyi paytagh Israel?”

⁷ Kïlenchï chane, “Melö parakunkwa onkïtunö osis anta könyis cho kitat Paponyan ompö owesyenyi kegh.

⁸ Wölo onyorunekwa owesyö otini körökyokwa Mïkulögh nyo Tïlil alïkukwa nyu söwichan ompö Yerusalem nko koro Yudea kïmïkul nko Samaria, ntökwïtïta sörömu ngwïny.”

⁹ Kïkany kuwany kïngölonöy, kengwïsa nyinte tawungwa akep kïwö yïm kïsïwïyi chane ntökïtenö kïkarta polta.

¹⁰ Akwotini kitö kïmi chane kurosöy yïm, kïwetöy Yeso, kïnyinini lawel kughyongö pich odeny kamasungwa, cho kiloköy sïro cho relach

¹¹ akïlö, “Akwa pipö Kalilaya, ompö ne toghyongekwa arosöy yïm? Yeso nete kakimït kïwö yïm, kungwïnöy le nyete kasïwekwa kïwetöy yïm.”

Chi nyo kiker Yudas

¹² Atolapay kïmïlisyeghö kiyoktoghï kutïng pö Arol kutang Yerusalem, pan nyo kitöy kilomita akonga.

¹³ Nyini kïlïtöy kanasyan kïpus kïpa kö nyo mi parak wölo kimpuröy ompö: Petro nko Yoana nko Yakopo nko Andrea nko Pilipo nko Tomas nko Partolomayo nko Matayo nko Yakopo wero Alpayo nko Simon nyo kïkuro Silot, akïlö Yudas wero Yakopo.

¹⁴ Kïghömö nyu chane löwïr kïlïkwï kïgh akonga kïmi korï nko Marya yoto Yeso nko werko ompö Yeso, kïsagh.

¹⁵ Kughyongö Petro osiswechoni tawu kighönï cho kingata 120 akïlö,

¹⁶ “Tupchenichu, kömïchï kïpïntö Kikirut cho kimwa Mïkulögh nyo Tïlil kuwerï kuti Daudi ompö ngala Yudas nyay kintöghoghchï pich cho kipa kïnam Yeso.

¹⁷ Ki akonga Yudas nko acha akitïng karerantanyi ompö ighisyencha.”

¹⁸ (Kyala nyinte par ropïyenichini kisïkö ighisyenyi nyo gha. Kupïtyï ngwïny kïkarera mu kïmïlï kegh kwan löwïr.

¹⁹ Kunkïtï pich löwïr ngalechoni cho kimöngöy Yerusalem, kïlenyona kïkurö paranay Akeldama ompö kutingwa, nyoni kelentöy, “Para Kisön.”)

²⁰ “Ompöwölo kikikir ompö kitapu Tumwöy lö, ‘Nya kïlïkwï möngenyi kïratyan amöwuchï chi ori.’ Kikïr ngat lö, ‘Nya kuker chi anka otinö kömi nyinte.’

²¹ “Kïlenyona kïchengöy chi akonga ompö pïchay kikïnomnyotoy tïkwïl ompö osiswechanye löwïr kiwestoy Echotyon Yeso nko acha,

²² kutorö kipatisanata Yoana, ntökwit asisanya kikimït Yeso kïwö yïm. Lïku akong ompö pïchoni söwin nko acha nyo pö kitutunöto Yeso.”

²³ Kïlenyona kecher kaynötut pö pich odeny: Yosep, nyo kikïkuro Parsapas (akekuro Yusto) nko Matias.

²⁴ Atolapay kïsagh chane lö, “Echotyon, nyi nyo inkït mïkulis pö pich löwïr, porwecha ompö pïchï le odeny lö nyono nyo kekïlanyi,

²⁵ kïcheng ighisyonï pö kiyoktoghin* kipïsto Yudas kïwö arenyi onkït.”

²⁶ Atolapay kïpïrchï kura chane, kïnyorï Matias kur. Kïlïkwï nyinte akonga nko kiyoktoghichay le taman nko akonga.