ESTA 8 - PIPÏLIA

¹ Kutö nyu pöytoghintö Aasuero Esta koko pöytoghin kïmïl tïku Aman löwïr, punyonto pipö Yaudi. Kïmwochï Esta pöytoghin lö, kitïngö kïgh nyinte Mordekay, kechömchï nyu Mordekay kïwö wölo mi pöytoghintö kïngeta asisoni.

² Kïngwïs nyu pöytoghintö kaymorïsyenyi nyo kichengunö Aman akutö Mordekay. Kutö nyu Esta Mordekay kughyongchï tïpö Aman.

³ Atolapay kïngölonchï Esta pöytoghin ngat, kupïtyï kelyechi akïloköy. Kïsagh nyinte kiwaghach ghöyityo Aman nyo pö ara Akak nyo kitat tökuwany pipö Yaudi.

⁴ Kupara nyu pöytoghintö Esta lïkïnyi nyo kikigha koltin. Kïnget Esta akughyongö tawunyi akïlenchï,

⁵ “Ato ichömenyi, we pöytoghin, akwoto iyanganinyi akwoto isïwïyenyi lö tenate ompö nyi, ikany kekirta palaltin cho wöghököy palaltin cho kikir Aman wero Amedata nyo pö ara Akak ompö chïreryö lö tökewang pipö Yaudi cho mi koros pö pöytoghin löwïr.

⁶ Ompöwölo omukan lö ne omïkukönöy osïwïyan kungwïnchini piköcha kiwurata nyo teno nyoni? Anta omukan lö ne asis otini kïmi kewongöy piko orencha?”

⁷ Kïlenchï nyu pöytoghintö Aasuero Esta nko Mordekay chi pö Yaudi, “Kotönön Esta tipö Aman, akikeket nyinte ompöwölo kimököy kïpöröy pipö Yaudi.

⁸ Okirchinö ye nyu pipö Yaudi kïgh anka tïkwïl nyo komökekwa ompö kaynata pöytoghin, apïrö macheyunyi, ompöwölo möminye kïgh nyo kakekir ompö kaynata pöytoghin akekïniniö ompö macheyto kaymorïsyenyi nyo kïwöghököy.”

⁹ Kekurï lenyini kikiri pöytoghin asispa 23 nyo pö arawa sömök, nyoni ki arawa Sipan, kukirchï palaltin pipö Yaudi lenyini kimwa Mordekay. Kikirchï kintöghoghï nko pöytoghï nko yetïntinö koros 127, kïngeta India ntökwit Etopya. Kikikirchï palaltinechoni kor anka tïkwïl ompö kikirutkökwa akekirchï pich ompö kutïwekwa akekirchï pipö Yaudi ompö kikirutkökwa nko kutïwekwa.

¹⁰ Kikikir palaltinechoni ompö kaynata pöytoghin Aasuero aketö machey pö pöytoghin. Atolapay ketötö kwip nyaparen cho kipegho angoletin cho kipïrtïte cho pö ka pöytoghin.

¹¹ Kichomchï pöytoghintö ompö palaltinechoni pipö Yaudi ompö kanastin löwïr kïtuyö atökïghet kegh, atö kuwur akïpar akuwany pung löwïr cho lentöy kïporyegho chane nko monekwa, ompö koros löwïr. Kipöröy pipö Yaudi chane akïsara tïkukwa.

¹² Ki asispa taman nko sömök nyo pö arawa taman nko odeny, nyoni kï arawa Adar* ato kikïtat lö pöröy pipö Yaudi pungkökwa lömïs ompö koros pö pöytoghin Aasuero kïmïkul.

¹³ Kikïmwochï punton löwïr ngaleko kirurutchoni cho kikïmwochï kor anka tïkwïl atökïtïpï pipö Yaudi kïpsach kutak pungkökwa ato itï asisoni.

¹⁴ Kïnget lawel pich cho kipegho angoletin cho pïrtït, cho kikïpöghisyegho ompö ighisyo pöytoghin, akwigh lenyini kimwa pöytoghintö. Kikïmwatïtegha ngat ngalechoni Susa kanasyan nyo wow.

¹⁵ Atolopay kïngeta Mordekay ka pöytoghin kuloköy sïro cho pö paytagh, cho akïnyörilöch nko cho relach nko tenta nyo wow nyo pö koltin nko sïra nyo lata akwa lamay nyo pö katani nyo kogh nyo pïchigh, kïmi kuteghyot pipö kanasyanta Susa ompö ngörekyö nko turönö.

¹⁶ Kïlïmchï kegh pipö Yaudi turönöt nko kityakat nko ngörekyö nko rïntagh.

¹⁷ Kingörekyö pipö Yaudi akïturonchö akwam akor ompö mikoa nko kanasyan anka tïkwïl wölo kikïlïma kiyomisöto pöytoghin akwigh kïlïkwï asis nyo wow nyo pö kimïny. Kwigh kegh piko koros cho chang kïlïkwï pipö Yaudi ompöwölo kiwagh chane pipö Yaudi.