ESTA 7 - PIPÏLIA

¹ Kïwö nyu pöytoghintö nko Aman kwomisyö nko Esta

² panto odeny. Otini kigheghöy chane dipay,* kïtep ngat pöytoghintö Esta lö, “Ne nyini isomenyi nya Esta koko pöytoghin? Mwowanïn atökekonïn. Akïne machatengu? Kïrkegh kö kareranto paytaghtanyan kekoninyi.”

³ Kuyokyï Esta lö, “Ato konyorwan chömchin ompö tawungu, we pöytoghin, mekany keparanïn amekany kepar piköcha. Nyoni nyo le somötenyan.

⁴ Ompöwölo kikyaltanïn nko piköchan kewurecha akeparecha kewangecha lömïs ompö ngwïny. Ntökile nyo kikyaltecha pat le sekey cho le mïrön nko kor, kötosisyinan kegh, ompöwölo melö kölïku man osusön pöytoghin.”

⁵ Kïtep pöytoghintö Aasuero Esta lö, “Ngo nyinte nya? Akïmi onö chi nyo melö wöghöy kwighöy kïgh nyo lata nyoni?”

⁶ Kuyokyï Esta lö, “Mwokïyontonete le Aman chichoni. Punyontencha nyo kenyarilecha kong nyinte.” Kïtopön Aman pöytoghin nko Esta akïmïgh lö chïrïm.

⁷ Kïngeta pöytoghintö konyi ompö nörekyö, kïpïstö dipaykachi akïwö kutang par nyo mi kiroryo ka pöytoghin. Wölo otini kïpköchï Aman lö kikïmut pöytoghintö kwighchï nyinte kïgh nyo gha, kudong löt atökïrirchï Esta kïsörï söpontanyi.

⁸ Nyini kingwïna pöytoghintö sany kisïwa Aman kilïngo atay töpo Esta, kutegh lö, “Möchöy so chichï kusïmnyonöy ompö yete le tawunyan, ompö konyan?” Nyini kitökïmwoghöy pöytoghintö ngalechoni, kïpka mötworichi akuyen tokochu Aman.

⁹ Atolapay kïlö akong ompö chane nyo kikïkuro Arpona, “Mi ket nyo kogh, miten 22 nyo kïwudochini pich kö pö Aman nyo kipölchï nyinte konyi atökewusö Mordekay nyo kisörï söpon pö pöytoghin.” Kïlö pöytoghintö, “Owusenö nyinte ketoni!”

¹⁰ Kïlenyona kewusö Aman ketay kikwighchï nyinte Mordekay. Kwasta nyu nörekyo pöytoghin.