ESTA 4 - PIPÏLIA

¹ Otini kisöwï Mordekay ngalechoni kiketat löwïr, kïkarer sïrokachi akulach sarankwachtin akuchukö mötïnyi aryon akïwö kuwer kwenu kanasyan kïrirotoy ompö kut nyo wow ompö ngwonïn,

² ntökïtenö kwit kuka ka pöytoghin. Melö kilït nyinte ori ompöwölo kimelö kimi chi nyo kiloköy sarankwachtin nyo kikïchömchini kïlït kayoni.

³ Kikïlïma kiteghat nko sönönöto pipö Yaudi koros löwïr, wölo kikïlïma ngalechoni nko wölo kimutïta pöytoghintö. Kitïng pipö Yaudi nyarïl nyo wow, kïkïrur akïriryö ompö nyarïl, akumelmel cho chang sarankwachtin nko aren.

⁴ Otini kipka tipïn nko latan* cho kipöghisyechini Esta, kïpa kïmwochï Esta koko pöytoghin kïgh nyo kigh Mordekay. Kusus kegh Esta nyoman, kutötö sïro kepchï Mordekay kulak atökïngwïsta sarankwachtin cho kiloköy, wölo kïtagh sïrochay.

⁵ Atolapay kïkur Esta Atak nyo kile akonga ompö latan cho kiripöy ka pöytoghin, nyo kitö pöytoghintö kïpöghisyechï Esta, kïwö Esta akïmwochï nyinte kïwö wölo kimi Mordekay atökunkïtï nyinte lö, ne kitö nyo kegha akwompö ne.

⁶ Kïwö Atak wölo kimi Mordekay wölo le kiroryo kanasyan, ato lekïto kuka pöytoghin.

⁷ Kïmwochï Mordekay Atak ngal löwïr cho kighisyö ompö nyinte akïmwochï wölo kitenö ropïyen cho kiyomis Aman lö, otöni kaplawachpa pöytoghin atö kepar pipö Yaudi löwïr.

⁸ Kutö tïkwïl Mordekay Atak palalyan nyo kikitö ompö Susa nyo kimwowï kewany pipö Yaudi. Kïmwochï Mordekay nyinte kwipchï Esta palalyantanini akïmwochï ntökïpköchï ngalechini kikir atökïwö Esta kïsagh pöytoghin kusyonchï pikökwa.

⁹ Kwigh Atak lenyini kimwochï Mordekay.

¹⁰ Atolapay kïmwochï Esta Atak kïmïla wölo mi Mordekay kilenchï,

¹¹ “Nkït mötwori pöytoghin löwïr nko kirurichi cho mi koros lö, kïtïghöy chi anka tïkwïl nyo mötïny ato kö mïrön anta kö korka nyo wetöy kïlïtöy wölo mi pöytoghinto akïtomönye kekur nyinte. Lenye nyoni wölo kikekirta, kïpoto ato para pöytoghintö chi lïkïnyi nyo kikigha koltin ato kïsöru söpontanyi. Akïtomönye ye kekuranïn owö wölo mi pöytoghintö arawa akonga nyo kakuwer.”

¹² Otini kilïm Mordekay ngala Esta,

¹³ kuyokyï pich kïpa kïrirchï Esta lö, “Menonchï kegh lö omitö ato tïghume ato imitö ka pöytoghin kïtïl chi pö Yaudi anka tïkwïl.

¹⁴ Ompöwölo ato isisanyi lasay ye, kesöru pipö Yaudi ompö ore anka, wölo iwonyonenyi akïngat kel arenkwa. Wölo ngo nyo nkït, manan kingwïnanyi wölete atelïkuna koko pöytoghin akwompö osis cho lata chï!”

¹⁵ Kuyokyï Esta Mordekay lö,

¹⁶ “Wïyö ghamïta pipö Yaudi löwïr cho mi Susa akïrur asoghwante. Momisyö amegheghsyö nyonikïny osis sömök, pöghet nko nangat. Okïruran tïkwïl nko tipïn cho pöghisyewanïn. Nyini kewonyö osiswechoni, owan nyu wölo mi pöytoghintö, kïrkegh melö köchömu kirurut. Ato kameghan ameghan.”

¹⁷ Kïwö nyu Mordekay akwigh kïgh anka tïkwïl lenyini kimwochï Esta.