ESTA 2 - PIPÏLIA

¹ Ato mi löt, otini kikïwïs nörekyo pöytoghin, kunan nyinte kïgh nyo kigh Pasti nko kirurut nyo kimwatïta akwompö nyinte.

² Kïlenyana kilö mötwori pöytoghin cho kipöghisyechini nyinte, “Nya keyörchï pöytoghin chepkïltïtin cho pïchighöch.

³ Nya kikil pöytoghintö opisatin ompö koros löwïr ompö pöyunötenyi kumïtï tipïn löwïr cho pïchighöch kïpka kö pö kor nyo mi Susa kanasyan wow aketö Ekay nyo le latan* nyo kighyongchini kö pö kor, akany ketö chane tïkwïn cho igho kegh kïpïchighöchitu.

⁴ Atekïla nyu työ nyo mïlinyi, ategha nyinte kïlïkwï koko pöytoghin kuker Pasti.” Kïcham pöytoghinto ngalechan kwigh nyu nyinte lenyini.

⁵ Kimito osiswechoni chi pö Yaudi nyo kimöngöy Susa nyo kikuro Mordekay wero Yair nyo kipö ara Penchamen nyo pö ara Kis nko Syimey,

⁶ nyo kikïnama Yerusalem akemït kïlïkwï pïnotyon ompö koro Papilon ato kinam pöytoghintö Nepukadnesa, pöytoghin Yekonia nyo pö Yuda nko söpïch pö pich cho kikïnam.

⁷ Kitïng Mordekay chepto mamatanyi nyo kikïkuro Adas ompö Eprania nyoni kï Esta, kipïchigh cheponi nyoman akikaram tokochunyi. Kinam Mordekay nyinte otini kima kwanta nko kame akwigh nyinte kïlïkwï cheptanyi kegh.

⁸ Otini kikïmwatïta pöytoghinto ngalechi cho pö kursyö, kekurï tipïn cho chang kïpka Susa akimito Esta nko chane. Ketö nyinte tïkwïl ka pöytoghin atökïrip Ekay nyo kighyongchini kor.

⁹ Kïmïl Ekay Esta akicham nyinte nyoman. Kutö lenyini lawel tïkwïn pö cho igho kegh nko omisyö nya karam nko tipïn mut nko odeny cho kikïkïla ka pöytoghin atökïpöghisyechï nyinte aketö kö pö kor wolö karam.

¹⁰ Kinya Mordekay kurur Esta mamwatïta kegh lö ochï chi pö Yaudi, kïwïnya nyu Esta pich pikökwa nko orengwa.

¹¹ Kiwesteghö Mordekay kïtenö osis tawu köyay pö kor atö kunkïtï wölo lata Esta nko kïgh nyo igho ompö nyinte.

¹² Kipïchighöy kegh korï ompö köny akonga kuyilo kegh mwowöy cho ngutoy cho onyïn, akuyila kegh ngat mwagh nyo ngutoy le kapïrïmenion ompö aroye walaka cho le mut nko akonga. Nyini kewonyö choni, kemït työ anka tïkwïl wölo mi pöytoghintö Aasuero ompö pösyenyi.

¹³ Kimuköy työ anka tïkwïl kuloköy le wölo kimöchtoy ompö kö pö kor otini kiwetöy kö pö pöytoghin.

¹⁴ Kiwetöy työ kö pö pöytoghin nangat akï nyini kayech, kemït kïwö kö pö kor anka nyo kighyongchini Syaskas nyo kile latan nyo kighyongchini chemïnïngweni* pöytoghin. Melö kitökimïlo kö pö pöytoghin ngat kïpoto ato kimïl nyinte cheponi akïkur nyinte ompö kaynat.

¹⁵ Kitïta nyu ato kikïkur Esta kïwö wölo mi pöytoghintö. Esta kï ki chepö Apiail nyo kile mamato Mordekay nyo kinam nyinte le cheptanyi. Kimïl Esta pich löwïr cho kisïwa nyinte. Otini kitïta ato kikimït Esta, kulach kegh lenyini kimwochï Ekay nyo kile latan nyo kighyongchini kö pö kor.

¹⁶ Kïlenyona kemït Esta wölo mi pöytoghintö Aasuero ompö konyi nyo pö soch, ompö könyi mut nko odeny nyo pö paytaghtanyi ompö arawa taman, nyo kïkuro Tepet.

¹⁷ Kïmïl pöytoghin Esta kïtïl tipi walaka löwïr akïtïl anka tïkwïl nyo kile chepkïltït, kichama nyinte mïkulöwunyi akïnyorï chömchin. Kulokyï mötïnyi tenta paytagh akwigh kïlïkwï koko pöytoghin kuker Pasti.

¹⁸ Atolapay kwigh akor nyo wow ompö konyït pö Esta akïkur wowïntinechi löwïr nko cho kighyongchini koros, akïmwatïta asispa kimïny ompö paytaghtanyi kïmïkul, akutötö ropöw cho kimïchini kutötö pöytoghintö.

Kösörï Mordekay pöytoghin

¹⁹ Otini kiryam tipchay panto odeny, kï kikutö pöytoghintö Mordekay kughyongö kukenyi.

²⁰ Kitomönye kinganyta kegh Esta lö opo pich ne anta or ne le wolö kimwochï Mordekay nyinte kïkïr mömwochï chi. Kiterchï Esta nyinte ompö ngalechoni le wölo kikïterchï kïngeta kimïnïng kimi mori Mordekay.

²¹ Ompö osiswechoni ato ki yetïn Mordekay ompö ka pöytoghin, kinörekyö ripï odeny, Piktana nko Teres cho kile latan cho kiripöy or nyo kïlïto kori kö pö pöytoghin cho pö ori ntökïmar or nyo pöro pöytoghin Aasuero ompö sison.

²² Kunkïtï Mordekay kïmwochï Esta koko pöytoghin, kïnget Esta kïmwochï pöytoghin ngalechay kilïma Mordekay.

²³ Kekïtisyö ntökenkïtï lö man ngalechoni, ketïgh nyu latanchay, kewusö chane ket kwodeny. Kikikirchï nyu ngalechoni kitapu otöptino osis ompö tawu pöytoghin.