ESRA 8 - PIPÏLIA

¹ Achï poyi artïna pipö Israel cho kipkana Papilonia nko Esra ompö paytaghpa Artakerkes:

^2-14 Kersyom nyo pö ara Pineas Daniel nyo pö ara Itamar Atus wero Syekania nyo pö ara Daudi Sakaria nyo pö ara Paros nko pikökwa 150 (cho kirumï ortïnekwa ompö kitapun) Elieoenay wero Seraya nyo pö ara Paat Moap nko pikökwa 200 Syekania wero Yaasiyel nyo pö ara Satu nko pikökwa 300 Eped wero Yonatan nyo pö ara Adin nko pikökwa 50 Yesyaya wero Atalia nyo pö ara Elam nko pikökwa 70 Sepadia wero Mikael nyo pö ara Syepatia nko pikökwa 80 Opadia wero Yeiel nyo pö ara Yoap nko pikökwa 218 Syelomit wero Yosipiya nyo pö ara Pani nko pikökwa 160 Sakaria wero Pepay nyo pö ara Pepay nko pikökwa 28 Yoanan wero Akatan nyo pö ara Askad nko pikökwa 110 Elipelet nko Yeuel nko Syemaya cho pö ara Adonikam nko pikökwa 60 (cho kimïlisyö ato le löt) Utay nko Sakur cho pö ara Pikpay nko pikökwa 70

Kayar Esra pipö Lawi cho pöghisïyi ompö Kö pö Tororöt*

¹⁵ Kyoghömïtyan chane lalwa nyo töngöy kanasyanta Aapa, keruyecha atoni osis sömök. Oyitön pich nko tïsï, asïwan lö, mömicha pipö Lawi.

¹⁶ Kïlenyona amwatïtan kekurï Elieser nko Ariyel nko Syemaya nko Elnatan nko Yarip nko Elnatan nko Natan nko Sakaria nko Mesyulam pich cho le kintöghoghï nko konetï odeny, Yoyarip nko Elnatan.

¹⁷ Atolapay ayontan kïpa wölo mi kintöghoghintö Ido ompö ato kïlentöy Kasipiya akïmwochï nyinte nko werkökwa cho le mötwori Kö pö Tororöt tökuyokwecha pich cho pöghisïyi ompö Kö pö Tororötïncha.

¹⁸ Kuyokwecha ompö pöropcho Tororöt Syerepiya chi pö owesyö ompö Mali wero Lawi wero Israel nko werkachi nko tïlyayichi, pich 18

¹⁹ nko Asapiya nko Yesyaya nyo pö ara Merari nko werkökwa nko tïlyayikwa, pich tömönut odeny.

²⁰ Kimi nko mötwori Kö pö Tororöt cho le 220 cho kikïl Daudi nko yetïntinechi, kungarak pipö Lawi. Kikikir kaynötutkökwa löwïr.

Kentöghoghchï Esra pich ompö kïrurat nko saghat

²¹ Amwatïtan kekïrur ompö lalwa Aapa tökerïngacha kegh ompö tawu Tororötïncha akesagh nyinte kuntöghoghwecha nko monecho nko tïkucho löwïr.

²² Kyasïwan arasï atep pöytoghin pipö lïk nko cho pö angoletin tökïripotecha ompö pung ompö or akwanyï kikïlenchicha pöytoghin, “Ngöroköy Tororötïncha chane löwïr cho twoytoy kegh nyinte, wölo wow nörekyenyi ompö chane cho pïstoy nyinte.”

²³ Kïlenyona kekïruracha akesagh Tororötïnyo akwompö nyoni kiterwecha nyoman sowutköcho.

Konut cho pö Kö pö Tororöt

²⁴ Atolapay akïlan tïsï taman nko odeny cho le kintöghoghï: Syerepiya nko Asyapia nko tïlyayikwa taman.

²⁵ Atolapay opimchan chane silpa nko koltin nko kari kö cho le konut pö Kö pö Tororötïncha cho kikonï pöytoghintö nko kirurichi nko yetïntinechi nko pipö Israel löwïr ompö atoni.

^26-27 Achï tïkwïn cho kyotönön chane: silpa: tanin 22 karïn 100 cho pö silpa: kilen 70 koltin: kilen 3,400 pakulino koltin 20: kilen 8.4 pakulino taghoy odeny cho karkegh olyengwa nko pakulino koltin

²⁸ Atolapay olenchan chane, “Ochikwa tïlilöch ompö ECHOTYON akitïlilöch karichï. Lïku silpa nko koltin ropöwo chamat cho pö ECHOTYON Tororöt pö papotïnekwa.

²⁹ Kïlenyona akaman ntökïtenö apimakwa ompö tawu kintöghoghi tïsï cho pö pipö Lawi nko kintöghoghi kori papotïnekwa cho pö Israel ompö Yerusalem, ompö Kö pö Tororöt.”

³⁰ Kïlenyona kïcheng tïsï nko pipö Lawi silpenichay nko koltinechay nko kari kö akwip kutang Yerusalem Kö pö Tororötïncha.

Kamïla Esra Yerusalem

³¹ Kikïpeghecha lalwa Aapa ompö asispa taman nko odeny nyo pö arawa tagh ketang Yerusalem, kimi Tororötïncha nko acha nyo kiripecha ompö pung nko pich cho syepöy pich ompö or.

³² Nyini kikitïtecha Yerusalem kemungöcha osis sömök.

³³ Kepim silpenichay nko koltine nko kariko kö ompö asispa angwan ompö Kö pö Tororötïncha aketö Meremot tïsin wero Uriya nko Eleasar wero Pineas nko pipö Lawi odeny: Yosapad wero Yeswö nko Noadiya wero Pinuy.

³⁴ Keyit tïkuchay löwïr akepim atolapay kekir.

³⁵ Kiropta pïchay kimïlisyeghö pïnotön osiswechoni amörostin cho kïpelchini Tororöt pö Israel: eghin 12 ompö ortïna pipö Israel löwïr nko mökol 96 nko wara kechir 77. Kiropta tïkwïl kwöghe taman nko odeny le ropöwo ngokï. Chete löwïr kï amörostin cho kïpelöy ompö ECHOTYON.

³⁶ Kutö chane palalyantanay pö pöytoghin pröyöntinechi nko yetïntino lalwa Yuparet okumpö ta, cho kingarak chane ompö Kö pö Tororöt.