ESRA 7 - PIPÏLIA

¹ Nyini kiwer könyiswö ompö paytaghpa Artakerkes pöytoghinto Pasya, kungwïna chi Papilon nyo kïkuro Esra wero Seraya, wero Asaria, wero Ilkia,

² wero Syalum, wero Sadok, wero Aitup,

³ wero Amaria, wero Asaria, wero Merayot,

⁴ wero Seraya, wero Usi, wero Puki,

⁵ wero Apisyua, wero Pineas, wero Eleasar, wero Aron nyo kile Tïsin nyo Wow.*

⁶ Ki kikirin Esra nyo ngöghom ompö kirurut pö Musa cho kikonï ECHOTYON Tororöt nyo pö Israel. Kighchï pöytoghintö nyinte kïgh anka tïkwïl nyo kisom, ompöwölo ki mi ECHOTYON Tororötïnyi nko nyinte.

⁷ Kïweghö Esra Papilonia kïwö Yerusalem könyi mut nko odeny nyo pö pöytoghin Artakerkes. Kiwö nko pipö Israel walaka kïmi tïsï nko pipö Lawi nko tumï nko ripï nko mötwori Kö pö Tororöt.*

^8-9 Kitor kungwïna Papilonia asisini tagh ompö arawa tagh akwitïta Yerusalem ato tenö nyini ompö arawa mut, ompöwölo ki mi Tororötïnyi nko nyinte.

¹⁰ Kinet kegh Esra kirurut pö ECHOTYON akwigh akïrïp akunet pipö Israel kirurut löwïr cho pö Tororöt.

Palalyan nyo ketö Artakerkes Esra

^11-12 Anyï palalyan nyo kitö Artakerkes pöytoghintö Esra tïsin akï kikirin nyo somönot ompö kirurut löwïr cho kitö ECHOTYON pipö Israel: Ompö tïsin Esra nyo le kikirin nyo somönot kirurut löwïr cho pö Tororöt pö yïm.

¹³ “Kamwaghan ye lö, chi anka tïkwïl ompö pipö Israel ato kö tïsï anta chi pö Lawi cho mi pöyunötenyan akïchömöy kïpa Yerusalem, kumuköy kïpa nko nyi.

¹⁴ Kayontichanyi, ani nko kirurichan cho le mut nko odeny, wïyö rosunö koro Yuda nko Yerusalem lö, ekïripöy chane kirurut pö Tororötïngu choni itïngetenyi?

¹⁵ Atolapay ip koltin nko silpa cho kokonwan ompö chamatenyan nko kirurichan atö Tororöt pö Israel nyo möngöy Yerusalem.

¹⁶ Itas tïkwïl ip silpa nko koltin löwïr cho inyorchinenyi koro Papilonia nko ropöwo chamat cho konu pich nko tïsï akuwalwal lö pöyitu Kö pö Tororötïngwa nyo mi Yerusalem.

¹⁷ “Olonekwa nyu ropïyenichoni eghin nko mokol nko wara kechir nko pagh nko dipay* aroptekwa ompö ato kïpelo amöros ompö Kö pö Tororötïnkwa nyo mi Yerusalem.

¹⁸ Opöghisyeghenekwa nko werkökwo silpa cho köngötï nko koltine le wölo karosïtekwa lö mïchini kïrïp kegh nko machata Tororötïnkwa.

¹⁹ Aitötö karichay kikïkoninyi atökepöghisyeghö ompö Kö pö Tororötïngu, itö Tororöt pö Yerusalem.

²⁰ Ato mi kïgh anka tïkwïl nyo omökekwa opöghisyeghenö ompö Kö pö Tororöt, ochengunö kaplawachpa pöytoghin.

²¹ “Komwochan ante Artakerkes pöytoghintö rori kaplawachtin löwïr ompö lalwa Yuparet okumpö ta lö, kïgh anka tïkwïl nyo tepokwa Esra tïsin akï kikirin nyo somönot kirurut pö Tororöt pö yïm,

²² otö silpa cho ngata kilen 3,400 nko pagh kilen 10,000 nko dipay liten 2,000 nko mwagh liten 2,000 nko partin cho möngörï.

²³ Agh kïgh anka tïkwïl nyo kimwa Tororöt pö yïm ompö Konyi atömötöp ntökïnörekyanïn nko monechan.

²⁴ Kinonucha akwa lö melö chömunote ompö kirurut kïkwagh tïsï surï nko pipö Lawi nko tumï nko ripï nko mötwori Kö pö Tororöt anta mötwori walaka cho pö Köyoni.

²⁵ “Akï nyi Esra, ompöwölo kikoninyi Tororötïngu ngöghomnyö, kïla muti ngal nko kirwokï cho muköy kïpayta pich löwïr ompö lalwa Yuparet okumpö ta cho nkït kirurut pö Tororöt, ato cho menkïtcha inet.

²⁶ Ato chi nyo melö teköy kirurut pö Tororötïngu nko kirurut pö pöytoghin, ikany kerwokyï nyinte kïma anta kïyon anta kïsara nyinte tïkuchi anta kïtorchï chela.”

Kasal Esra Tororöt

²⁷ Kïlö Esra, “Nya kïsala ECHOTYON Tororöt pö papotïnecho nyo kegh mïkulöwu pöytoghin kïkaramit akïcham kuyokyï ngat Kö pö Tororöt pïchighyenyi ompö Yerusalem.

²⁸ Akakuporwanïn chomnyenyi ompö tawu pöytoghin nko kirurichi nko ompö tawu yetïntino pöytoghin cho owesöch, kyanyakanitwan ompöwölo kimi ECHOTYON Tororötïnyan nko ani, atolapay aghamïtan poyi ortïna pipö Israel apustan nko chane.”