ESEKEL 6 - PIPÏLIA

Kakirwokyï pich cho soghöy körkeyïntin

¹ Kungwïnchanïn ngölyonto ECHOTYON kïlentöy,

² “Wero chi partena rosa kutïngkoti Israel aikany kïngor möt kutïngkotchini.

³ Lenchinö kutïngkoti Israel atera ngölyonto Echotyon TORORÖT nyo lenchini kutïngkot nko komos nko korok nko tömköy opkokwa chok nyo nyoröy wölo osoghokwa körkeyïntin.

⁴ Lïku atay apelokwa amörostin akengongöy ato kïpelo tïkwïn cho ngutoy cho onyïn. Opöran pikökwa cho mi ori ompö tawu körkeyïntinekwa.

⁵ Otöninan mïntïruch pö pipö Israel tawu körkeyïntin, aserserchan koyekwa kïghömï atay opelokwa amörostin.

⁶ Lïku kanastinekwa löwïr ompö wölini omöngekwa kïratis nko wölo osoghokwa körkeyïntin akerultö ato kïpelo amöros nko körkeyïntine aketoytoyö ato kïpelo tïkwïn cho ngutoy cho onyïn akenyarnyar pöghisyewutkökwa löwïr.

⁷ Kïpöröy pich ompö kwenunkwa asïwenakwa atonkïtunö lö ochan ECHOTYON.

⁸ “Wölo otukan pich walaka ompö akwa cho köchïwïtyeghö chok cho kepertoy kïpa kïlïtöy punton, otini kotoytoyekwa oghömï koros

⁹ Nonanïn nyu chane ompö koro punton wölini kïpa le ratan lö kyomungön chane ompöwölo kiwerwersyö mïkuliskökwa, akïpïstanïn aghan konyikwa kiköryö cho kiyöro kong körkeyïntin, kïnyorï nyu chane arasï ompö tïkwïn cho kigh cho pö arasï.

¹⁰ Tökunyï chane lö ochan ECHOTYON akï ato kamwaghan kïgh kï mowetanye ngwïny.”

¹¹ Lentöy Echotyon TORORÖT arapaka morikwo atyak ngwïny. Atolapay olö Heywey ngokï nko sïmnyontöno pipö Israel cho kigh chane kuwonyö ompö chok nko kikar nko amal.

¹² Meghöy nyo low ompö amal kïmegha nyo lekït chok akïma nyo kedongö ompö kikar. Lenye nyoni nyu nörekyenyan ompö chane.

¹³ Onkïtukwa nyu lö ochan ECHOTYON otinö kasïwekwa kïmeghö pikökwa kïrakïsus kwenu körkeyïntinekwa kuwit ato kïpelo amöros ompö kamas anka tïkwïl nko kutïngkot parak nko ompö ket ghïtwok nko ompö makany nko ato kïpelo tïkwïn cho ngutoy cho onyïn.

¹⁴ Omungan chane aghan korengwa kïlïkwï kïratyan kïtïl surkwen, kïngeta surkwen ntökwitïta Ripla tonkïtunö lö ochan ECHOTYON.