ESEKEL 47 - PIPÏLIA

¹ Atolapay kumïtwanïn ngat nko kuka Kö pö Tororöt. Asïwan ompö wölo porö lalwa nyo yintoy kutöngöy kongasis ompö kuka Kö pö Tororöt. Kiyintoy pöghechoni ompö okumpö löt nyo pö Kö pö Tororöt akï okumpö löt ompö ato kïpelo amöros.

² Kwipanïn nyu chichay sany, kerelöcha ara okumpö tagh akewitacha or nyo portoy kongasis kïpkono okumpö löt.

³ Kiwö kutang kongasis chichay nko kipimöwontenyi. Kupim champilwanay kutang kongasis miten 500, kumïtanïn kewutöcha champilwanay. Kitanïn pöghechoni kowo monion.

⁴ Kupim ngat miten 500, kwitï pöghechay ani kutïng, kupim ngat miten 500 kïröytö kwitwanïn pögh kïrut.

⁵ Kupim ngat miten 500 kïröytö nyu pöghechay tya mach kulumanïn, akupölanïn oweghö kïpoto ato kiwir kepegha parak tökyoghyö.

⁶ Kïlenchanïn chichay, “Wero chi kesïwenyi chï?” Atolapay kemïlisyecha kewitï champilwanay.

⁷ Otini kyatan wölini, asïwan ket cho möngörï cho kirop lalwa antakwagh nko ontökwowu.

⁸ Kïlenchanïn chichay, “Yintoy pöghechï kutöngöy okumpö kongasis akïröytö Arapa atolapay kïlït nanampa Paryan. Otini kilïtöy pöghechï nanam kïkaramachitu.

⁹ Wölini kewerata pögh kïsöp kïgh anka tïkwïl nyo möngöy ori akïchangit kaghagh nyoman. Petöy pöghechï kugheghöy wölini tökïkaramachitu pögho nanampa Paryan. Kïlenyona möngöy kïgh anka tïkwïl wölini kewer lalwa.

¹⁰ Ghyongo nomi kaghagh sörömu nanam, akïrumuno wölo kikörkorchini netin kïyomö kïngeta Enkedi ntökwit Eneklaim. Kïnyorchini kaghagh cho sisinchö cho tenö cho mi nanampa Kwen.

¹¹ Wölo melö köromöchitu pögho wölo le nyonchön nko takaray cho lekïtinö nanam, kïpïsty kïlïkwï pögho paryan.

¹² Pityegho ketï löwïr cho kyomöy lalwa antakwagh nko antakwagh. Melö rörochot sökekwa yinöy akwa kokay ompö arawa anka tïkwïl ompöwölo pkono pöghechini gheghöy chane Kö pö Tororöt, kyomöy akwekwa akïlïkwï sakït sökekwa.”

Rotyotïno koros

¹³ Lentöy Echotyon TORORÖT, “Chï kï rotyotïn cho irïpenyi asïyech ichöghchini ortïna pipö Israel taman nko odeny. Nyoru ara Yosep karerantin odeny.

¹⁴ Ichagh kïkarkegh, ompöwölo kyawalwalan lö otöninan papotïneku. Lïku koronï nyinkwa.

¹⁵ “Lenye nyï wölo lïku rotyotïno kor: Ompö okumpö löt, kïngeta nanampa Kwen ompö ara Etlon akuwer Lepo Amat ntökwit Sedad

¹⁶ nko Perota nko Sipraim (nyo mi kwenu rotyo Damaska nko Amat) akïwö lenyoni ntökwit Aser Atikon nyo mi rotyo Auran.

¹⁷ Kïweghö rotyot nanampa Kwen ntökwit Asar Enon akïrop rotyo okumpö löt ompö Damaska kïmi rotyo Amat okumpö löt, lïku nyu nyoni rotyo okumpö löt.

¹⁸ “Ngeto rotyot ompö kongasis kwenu Auran nko Damaska akïrop Yordan kumuryö Kiliad nko koro Israel ompö okumpö kongasis ntökwit Tamar ompö nanampa Paryan. Lïku nyoni rotyot.

¹⁹ “Ngeto rotyot ompö okumpö tagh Tamar akïwö ntökïlït pögho Meripat Kades, atolapay kïrop rotyo Misri ntökwit nanampa Kwen. Lïku nyoni rotyot ompö okumpö tagh.

²⁰ “Ngeto rotyot nyo pö okumpö ta nanampa Kwen ntökwit sör ato topönöy kegh nko Lepo Amat, lïku nyoni rotyot nyo pö okumpö ta.

²¹ “Ichöghenyi nyu koronï kïghömi ortïna pipö Israel.

²² Ichöghenyi kïlïkwï mïlatenkwa nyo le nyinkwa nko to nko monekwa cho kikïyichï korenkwa kïnyorï tïkwïl mïlat kïkarkegh nko akwa. Lenye chane monïngo pipö Israel.

²³ Ichöghchinenyi ton anka tïkwïl kïnyorï mïlat ompö aranoni pö Israel möngöy nyinte tïkwïl.” Mwoghöy Echotyon TORORÖT.