ESEKEL 44 - PIPÏLIA1 Atolapay kuyokwanïn chichay ngat ara okumpö sany nyo pö Kö pö Tororöt* nyo portoy kongasis, wölo karate. 2 Kïlenchanïn, “Kïköngöy kïkarat aranï le nyete. Melö kïyotöy amölïtönye chi, Echotyon TORORÖT pö Israel onkït nyo lïtöy, kïlenyona kïköngöy kïkarat. 3 Pöytoghin onkït nyo lïtöy otinö wetöy kwomöy makatyan ompö tawu ECHOTYON. Kïmökino kuwer kukanoni ato lïtöy nko ato lïtuno köyay wow mi ori.” Kirurut cho kïlïto Kö pö Tororöt 4 Atolapay kwipanïn chichay orel or okumpö löt ompö tawu Kö pö Tororöt. Asïwan kinyïghï ororyo ECHOTYON Kö pö Tororöt, opïtyan ngwïny. 5 Kïlenchanïn ECHOTYON, “Wero chi tera lasiny airosa konyiku aitera yitiku ngalechï löwïr omwowunyi kïrïp kegh nko otöptino Kö pö Tororöt ECHOTYON nko kirurutkachi löwïr. Iros lasiny pich cho kïchomchini kïlïtöy Eakul nko cho melö kïchomchini. 6 Lenchinö pipö Israel chï oghïghe mötöwöy, lentöy Echotyon TORORÖT opïstenö sïmnyontönenkwa 7 nyï ochömchïnekwa to cho le sompen ompö mïkulögh nko ompö por, kïlïtöy Konyan kusïmnyon, otini kimi keropkanïn omisyö nko sunet nko kisön pö amörostin. Kyapenyakwa mumenyan ompö ngalechï löwïr oghekwa ghach. 8 Melö kötö oripökwa tïkuchan cho tïlilöch, kyopïsyikwa to kïlïtöy Konyan.” 9 Kïlenyona lentöy Echotyon TORORÖT, “Kïkïröy kïlït Konyan ton anka tïkwïl nyo le somchon ompö mïkulögh nko ompö por ompö to löwïr cho möngöy nko pipö Israel. Kakïtagha pipö Lawi kïlïkwï tïsï 10 “Omöy nyarïl ara Lawi cho kipa kïlowöchitu ompö ani kipa kïsagh körkeyïntin otini kïmasta pipö Israel. 11 Muköy kïpöghisyewanïn ompö Kö pö Tororöt, kïlïkwï ripï ompö ortïna Kö pö Tororöt akwigh pöghisyewut ompö sany. Yengöy chane amörostin cho ipi pich kïroptoy, akïpöghisyechï pich cho pkonöy. 12 Kyomchan muma chane, omöy nyarïl ompöwölo kirïp chane körkeyïntinekwa, akïlïkwï tömölöwonto ngokï ompö pipö Israel. Mwoghöy Echotyon TORORÖT. 13 “Melö rikanïn chane kïpöghisïyi le tïsï anta rikyï tïkuchan cho tïlilöch anta lït Wölo Tïlil Tya* sitengwa nyoni ompö tïkuchinö pö sïmnyontön kighwanïn chane nömöy arasï chane. 14 Ighöy ighisyewut pö Kö pö Tororöt wölnö le sany löwïr.” Tïsï 15 Wölo lentöy Echotyon TORORÖT, “Tïsï cho pö ara Lawi nko Sadok cho kirip Kö pö Tororöt akïpöghisyewanïn ompö man otinö kimasta pipö Israel, chane cho ghyongo tawunyan akïpöghisyewanïn kïropkanïn sunet nko kisön pö amörostin. Mwoghöy Echotyon TOTORÖT. 16 “Lïtöy chane Konyan akïpöghisyö ompö ato kïpelo amöros, akïpöghisyewanïn. 17 Wölo otini lïtöy Kö pö Tororöt ori, kïmïchini kulak sïra katani, mötöp ntökulak sïra puto kechir otini pöghisïyi ompö Kö pö Tororöt ori. 18 Loköy kopïyeni katani ompö mötöwöyikwa nko angwa mu nyo pö katani, amötöp ntökulak sïra nyo lalang nyo kighotyot. 19 Kïnyïl kïlïtöy sany wölnö mi pich kïngwïs sïro chay köpöghisyegho akutö korichay tïlilöch akulak sïrokö walaka. Tömenamta tïlilyo sïrokökwa pich. 20 Mörwokönye chi chane mötöwöy amelö pïstoy kïkoghöchitu putekwa wölo silsilöy kïtöngoghöchitu akïtöror. 21 Mögheghönye tïsin dipay* ato wetöy kïlïtöy Kö pö Tororöt ori. 22 Mepönye koko mamöt anta korka nyo kikelak. Ipöy chepkïltït nyo pö pipö Israel anta koko mamöt nyo le tïsin. 23 Netöy chane piköchan sisïn pö kïgh nyo tïlil nko nyo melö tïlil, nyo kïkïröy nko nyo melö kïkïröy. 24 Lïku chane kirwokot cho mutöy ngal ato ngwïn syala akïmutöy ngala kïrïp kegh nko kirurutköchan. Rïpöy chane kirurutköchan nko ngalechan ompö ichontinechan löwïr, akïrïp Sapatotinechan* cho tïlilöch. 25 Melö rikyini tïsï mïntïruch tömesïmnyon kegh wölo ato kwanta anta kame anta werïnyi anta cheptanyi anta werïngwa anta cheptöngwa nyo tomönye kep, kumuköy kusïmnyon kegh. 26 Töpo nyu osis mut nko odeny kïtïlilit. 27 Asisini wetöy kïlïtöy wölay tïlil ompö Kö pö Tororöt ori tökïpöghisyö, kïnyoghöy kïroptoy ropöwon nyo pö ngokichi. Mwoghöy Echotyon TORORÖT. 28 “Melö sïköy chane kor nyo lïku mïlatengwa, ochan mïlatengwa metö chane kor nyo lïku nyingwa ompö Israel. Ochan korengwa. 29 Lïku omisyengwa ropöwo pagh nko ropöw cho pö ngokï nko ropöw cho pö lelut nko kïgh anka tïkwïl nyo kakïngot ompö Israel kïlïkwï nyingwa. 30 Lïku chikwa akwa tagh löwïr nko ropöw kïtïkon ompö ropöwekwa löwïr. Otöninekwa tïsï omisyenkwa wölo tagh tökïtöpö kisoyönötenyan kestonikwa. 31 Momönye tïsï pempö kïgh anka tïkwïl nyo kama anta nyo kam tyony.” |
©Bible Society of Kenya, 2019
Bible Society of Kenya