ESEKEL 43 - PIPÏLIA

¹ Atolapay kwipanïn chichay nko or nyo pörtoy okumpö kongasis

² asïwan ororyo Tororöt pö Israel kungwïno kongasis, kilata kutinyi kighumöto puseryon, akulïwchï ngwïny ompö löpoyïn pö ororyenyi.

³ Kyasïwan sïwïyagh nyo lata nyo kyasïwan ato kingwïn Tororöt kunyar kanasyanta Yerusalem aki lata nyo kyasïwan ompö lalwa Kepar, apïtyan ngwïny oköpïghtö mu.

⁴ Kilït ororyo ECHOTYON Kö pö Tororöt* nyo kilïtunö kukat nyo pörtoy kongasis.

⁵ Atolapay kisïtanïn mïkulöwu Tororöt yïm akwipanïn nko kö wölo le sany ompö ori onyorwan wölo kinyïghï ororyo ECHOTYON Kö pö Tororöt.

⁶ Otini kighyongö chichay kamasunyan alïman chi nyo kingölonwanïn ompö Kö pö Tororöt sany.

⁷ Kïlenchanïn, “Wero chi, ngacharunyan nyï nyo pö paytagh aki wölo työköy kelyechan. Lïku wölo omöngan nko piköchan pö Israel kokay. Amelö tökusïmnyonöy pipö Israel kaynenyan anta pöytoghikwa ompö chepkartananengwa nko ompö mïntïruchko pöytoghikwa.

⁸ Kanget chane kïtekyï ghato pö pagh nko pölöwo kukoti korikwa otini lekïto ghatya pagh nko pölöwo kukoti Konyan nyo kemuryeghecha nayat. Kisïmnyon nyu kaynenyan ompö otöptinekwa choni ghach. Kïlenyona kyawangan chane ompö nörekyenyan.

⁹ Nya kïpïstö ye nyu saghata körkeyïntin nko muntïruch pö pöytoghikwa tamangan nyu nko chane kokay.

¹⁰ “Ye o wero chi, mwochinö pipö Israel ngala Kö pö Tororöt wölo lata nko wölo tenö tökïnyorï chane arasï ompö ngokikwa.

¹¹ Nyini nyu könyorï chane arasï ompö tïkwïn cho kikwigh chane, iporchï nyu wölo kïtektoy Kö pö Tororöt. Porchinö wölo mi kukat nko apuketinechi nko wölo lata kö kïmïkul nko tötutkö walaka lapay atökumï kïrïp chane lasiny.

¹² Anyï kirurut nyo pö Kö pö Tororöt: mïchini kïtïlilit tya kiroryenyi kuwit ompö kutïng parak. Lenye nyu nyoni kirurut nyo pö Kö pö Tororöt.”

Ato kïpelo amöros

¹³ Chï kï kipimöwo ato kïpelo amöros ompö miten, kikarkegh nko kipimöwo Kö pö Tororöt. Sentimiten tömönut mut otini kighyongo kïröytö akïlïkwï sentimiten tömönut mut ompö töpesïn nko kutïng pö korope nyo kiwit okumpö sany nyo le sentimiten 25 kutok.

¹⁴ Kïlïkwï mita akonga kötönke kïngeta tö parak, kingeta wölo katantanit ntökwit wölo porö kï sentimiten tömönut mut kuwit kïlïkwï miten odeny kutok.

¹⁵ Miten odeny wöloto wölnö kïpelo amörostin kutok, kikoghöch kïtïl kareran löwïr koneni angwanï.

¹⁶ Kimiten mut nko akonga wölnö le park kuwit.

¹⁷ Kï miten mut nko odeny wölo le kwen kuwit, kimi koropa nyo kiwit parak nyo le miten sentimiten 25 kutok. Kiportoy wölo kïpustegho ato kïpelo amöros kongasis.

Kitïlilöto ato kïpelo amöros

¹⁸ Kïlenyona kïlenchanïn Echotyon TORORÖT, “Wero chi, tera ngalechï omwowunyi. Otini kateka ato kïpelo amöros, itïlil ipela amörostin aisö kisön pö kyakichinö kïroptoy.

¹⁹ Tïsï opïn cho le pipö Lawi cho pö ara Sadok cho pkonöy kïpöghisyewanïn. Ani Echotyon TORORÖT nyo kamwagh. Itöninenyi chane ngaryan kïlïkwï amöros pö ngokï.

²⁰ Icheng kisönkö ainyïra kuyo ato kïpelo amöros kwa angwan nko koneni kwen kwangwan aitö kuwit söremwok löwïr. Itïlilenyi aisir ato kïpelo amöros ompö aranoni.

²¹ Ichengenyi ngaryan nyo pö ngokï aiwö ipela Kö pö Tororöt ori wölo tïlil.

²² Nyini köpöghön asïyechu icheng kwagha nyo lïpop nyo pö ngokï aitïlilö ato kïpelo amöros, le wölay kikitïliltö ompö ngaryantanay.

²³ Nyini kewonyö kitïlilötö icheng ngaryan ngat nko mokol cho lïpopöch ompö okwot.

²⁴ Ipunyi nyu tawu ECHOTYON atolapay kupispisyï tïsï chane partin akïropta le amöros nyo kïpelöy ketöni ECHOTYON.

²⁵ Ichengenyi kwagha nyo pö ngokï nko ngaryan nko makal ompö okwot cho lïpopöch ato keropta asis anka tïkwïl ompö osis mut nko odeny.

²⁶ Töketïlilö ato kïpelo amöros osis mut nko odeny tökusirö.

²⁷ Nyini kewonyö osiswechoni, kutor tïsï kïropta ompö ato kïpelo amöros amörostin cho kïpelöy nko ropöwo pöghisyö, achamakwa nyu.” Mwoghöy Echotyon TORORÖT.