ESEKEL 39 - PIPÏLIA

¹ Lentöy Echotyon TORORÖT, “Wero chi, nya kïngor möt Kok, lenchinö kighochaninyi nyoman we Kok, yetïn pö Mesyek nko Tupal.

² Owöghökinyi achutinyi, omïtuneninyi nyini le sörömu okumpö löt, atolapay omïtinyi kutïngkoti Israel.

³ Atolapay akwantan kïwantingu ompö ewungu pö löt kïchïntoy kotiku cho inömonyi ewu tagh.

⁴ Iwonyechinenyi nyu, we Kok, kutïngkoti Israel nko lïkengu kïmïkul nko punton cho mi nko nyi, atotötinyi lïkuna omisyo törit kïtïkon nko tïpö wuw kwaminyi lökïr.

⁵ Imeghchinenyi nawasya. Mwoghöy Echotyon TORORÖT.

⁶ “Oyokyinan ma Makok nko chane löwïr cho möngöy rerangu Nanam ompö kalya, tökunkïtï lö ochan ECHOTYON.

⁷ “Oghan nyu kaynenyan nyo tïlil kunkïtu piköchan cho pö Israel chane. Melö tokönyan kemwoghöy kaynenyan nyo tïlil kokay, tökunkïtï puntonï lö, ochan ECHOTYON Tororöt pö Israel nyo Tïlil.

⁸ Arosa kikwitïta akwitï ngalechï mwoghöy ECHOTYON Tororöt. Asista nyu nyete nyo kamwaghan.

⁹ “Ngetöy nyu pich cho möngöy kanastina Israel kïchengöy longoy nko kïwantis nko kotï nko ngötwö nko runkus akunagh kari lïk le kwen, nöghyöt nyu könyis mut nko odeny.

¹⁰ Tömökïpetönye pich kwen wuw ompöwölo kegh kari lïk kïlïkwï kwenkakwa. Chengöy nyu pöröw le wölo kiparta chane kïlïkwï pöröw. Mwoghöy Echotyon TORORÖT.

Tïpöto Kok

¹¹ “Otöninan asisoni Kok wölo kïtïpchini ompö koro Israel. Kïtïpchini mpöghoghyo rutoghot ompö nanampa Paryan okumpö kongasis. Pökeköy nyu rutoghot mökuwerocha, ompöwölo kïtïpchini Kok nko söpïchiskachi löwïr. Kikuro nyu tömko Amonkok.

¹² Tïpisïyi pipö Israel aro mut nko odeny, tokutïlil korengwa.

¹³ Tïpöy nyu chane pich löwïr ompö kor, akekonyïtöy chane asisini konyorwan ororyö. Mwoghöy Echotyon TORORÖT.

¹⁴ “Kïyöröy nyu pich cho pestegho kor kïtïpöy chona kingötï sany mökïtïp, tokutïlil kore ompö aro mut nko odeny.

¹⁵ Ato nyorï pich kowo chi ompö ngwïny, kïmïchini ketoni machey tökïpka pich cho tïpöy kïtïpchï mpöghoghyo Amonkok.

¹⁶ (Mi kanasyanta nyo kïkuro Amona wölini tïkwïl) töketïlil nyu kor.

¹⁷ “Wero chi, lentöy Echotyon TORORÖT, ‘Kurunö törit löwïr nko tïpö wuw löwïr, kïghamïtuna kegh woptin löwïr kïpka kwam ichonto amöros nyo kyoghchan chane ompö kutïngkoti Israel, tökwam pany akïlï kisön.

¹⁸ Omöy panya nyökon akïlï kisön pö pöytoghi ngwïny cho kikïpar le mökol anta ngaror anta eghina Pasyan löwïr cho okwoghöch.

¹⁹ Omöy sunet ntökïpïghyö akïlï kisön ntökïtömesyö ompö ichonto amöros nyo oghchinan chane.

²⁰ Omo mesenyan panya angoletin nko ipikwa nko nyökon nko pipö lïk cho sisinchö.’ Mwoghöy Echotyon TORORÖT.

Kiyokunöto Israel

²¹ “Oghan ororyenyan kïtöpö kwenu punton tökïsïwa chane löwïr wölo omungtenan pich ompö owesyenyan.

²² Tökïtï nyu pipö Israel lö, ochan Echotyon Tororötïngwa kïngeta asisini kwegh tagh.

²³ Tökunkïtï puntonï lö kipa pipö Israel pïnotön akwompö ngokikwa ompöwölo kighwanïn ngal cho kïkïröy. Opörtochinan chane patagh atolapay opïsyan chane pungkökwa, tökuwany chane löwïr ompö chok.

²⁴ Kyoghöchan chane kïrïp kegh nko sïmnyontönengwa nko ngokikwa apörtochan nyu chane patagh.”

²⁵ “Kïlenyona omwoghan ante Echotyon TORORÖT lö, omïtunan nyu pipö Yakopo kïpkana pïnotön asyonchan pipö Israel löwïr, alïkunan söstoghin ompö kaynenyan nyo tïlil.

²⁶ Wutyegho arasingwa nko tïkwïn löwïr cho kïkïröy cho kighwanïn otini kimöngisyö ompö kalya ompö korengwa nyo mötïnye kwotyeghö chi.

²⁷ Kyamïtwan chane kïmïlisyeghö punton, aghamïtunan chane koro pungkökwa. Toporchan kaynenyan nyo tïlil pipö punton.

²⁸ Kunkïtï nyu chane lö ochan Echotyon Tororötïngwa, ompöwölo kyakanyan kïpa chane pïnotön atolapay oghömïtyï chane korengwa kegh. Mopïstanye ompö akonga kudong koro punton,

²⁹ amelö topörchinan chane patagh kokay, ompöwölo omïlchan chane mïkulöwunyu.” Mwoghöy Echotyon TORORÖT.