ESEKEL 38 - PIPÏLIA

¹ Kungwïnchanïn ngölyonto ECHOTYON

² kïlenchanïn, “Wero chi, wechinö Kok ompö koro Makok yetïn nyo wow nyo pö Mesyek nko Tupal, atolapay ingor lö,

³ ‘Lentöy Echotyon TORORÖT keghöchaninyi nyoman we Kok, yetïn pö Mesyek nko Tupal nyo wow.

⁴ Owöghökoninyi, anameninyi sartin karenyakay atolapay opunyi nyu nko piköku pö lïk nko angoletine nko pich cho pegho angoletin nko chane löwïr cho kilach kari lïk nko longoy nko chokon.

⁵ Pich löwïr cho pkono Pasya nko Etopya nko Lipya cho tïng longoy nko kopïyeni karïn

⁶ nko Komer nko pipö lïkenyi löwïr, Pet Tokarma ompö okumpö löt nko pipö lïkenyi löwïr nko pipö punton löwïr cho mi nko nyi.

⁷ “ ‘Kïlenyona igha kegh aitöpö kïpsach nko söpïchis löwïr cho kighamïtyï kegh wölo imitenyi atolapay ipayta chane löwïr.

⁸ Weröy osiswö cho te, kekurinyi napa kegh, akï ompö könyis cho pkonöy iwetenyi poryegho kor nyo kösöpö poryot, kor nyo kighamïtyï kegh pich akïpa kutïngkoti Israel cho kikilïkwï kïratis, kikipï pich kïpkana punton kïpka kïmöngisyö löwïr ompö kalya.

⁹ Ipokunenyi nko lïkengu kïmïkul le mirtino pögh, le polta nyo keyentö ngwïny.’ ”

¹⁰ Lentöy Echotyon TORORÖT, “Pkonchininyi kinonut asisoni cho itötenyi ghöyityö kwïle.

¹¹ Ilentenyi nyu, ‘Opokyinan kor nyo melö kikiwach okumpö kiror. Opöran pich cho mi kalya, chane löwïr cho möngöy wölo puryö nïyet okumpö kiror amelö tïng tekech pö karïn anta kukot.

¹² Kipecha nyu pöröw akep tïku chinö kakïsakasa koronini kikimang ngat pich cho kighamïtuna kegh punton cho le sïkön ompö kyak nko tïkwïn akïmang kwenu koronini.

¹³ Lenchininyi nyu pipö Syepa nko Dedan nko mïnchïrïs pö Tarsis nko kanastinekwa löwïr, “Kengwïnanyi techenga pöröw aighamït pipö lïk, ap silpa nko koltin, arang tuka nko tïku cho möngörï le pöröw?” ’ ”

¹⁴ Kïlenyona wero chi ngora ailenchï Kok lentöy Echotyon TORORÖT, “Asisini möngisïyi piköchan Israel ompö kalya inapanyi kegh.

¹⁵ Ingwïna korengu wölo low ompö okumpö löt nko punton cho möngörï cho pegho angoletin nko söpïchis cho möngörï nko lïkos cho makïrar.

¹⁶ Ingwïnanyi ipar piköchan Israel le polta nyo kelum ngwïny. Omïtunyi osiswechoni we Kok nyonö pokyinö korenyan tökunkïtwanïn puntonï otini oporuneninyi tïlilyenyan tökïsïwa chane.”

¹⁷ Lentöy Echotyon TORORÖT, “Nyi so nyay kyangalanan köny ompö kutïwa mötworichan werkoyi Israel? Kingor chane könyisyok lö, omïtunan chi kupokyï chane.”

Sito Tororöt nyo pö Kok

¹⁸ Lentöy Echotyon TORORÖT, “Asisini kepokyï Kok koro Israel, kungetï nörekyenyan.

¹⁹ Omwoghan nyu lö rïngringöy koro Israel asisoni nyoman ompö kililatenyan nko nörekyenyan nöghöy le ma.

²⁰ Potonchot akïmïghyö kaghagh cho mi nanam nko töritwo yïm nko tïpö wuw nko kïgh anka tïkwïl nyo westoy kuchuto kegh ngwïny nko pich löwïr ompö ngwïny kïmïkul, otini kasïwanïn akirulyö kutïngkotï nko komos akurïngring nayat anka tïkwïl.

²¹ Okurunan chok kungwïnchï Kok ompö kutïngtönyan, mwoghöy Echotyon TORORÖT pöröy choko chi anka tïkwïl werïngwa.

²² Omungenan nyinte nko pipö lïkenyi nko koros cho ngöroköy nyinte amal nko mïltaghpa kisön. Oropönchinan takarïs nko ngeset nko ma.

²³ Kïlenyona oporunan owesyenyan nko tïlilyenyan aporchan kegh punton cho möngörï, kunkïtï nyu lö ochan ECHOTYON.”