ESEKEL 36 - PIPÏLIA

¹ Kïlenchanïn ECHOTYON, “Wero chi, nya kïngor möt kutïngkoti Israel, lenchinö atera ngölyonto Tororöt,

² lentöy pung ompö nyi ikwaryö kïlïkwï chicha kutïngkotiku chï pö könyisyok.

³ Kïlenyona ngora lenchinö lentöy Echotyon TORORÖT, otï kitökisyö chane kïparekwa ompö wop löwïr topöyitukwa punton löwïr, akengalanekwa.

⁴ Kïlenyona we kutïngkoti Israel atera ngölyonto Echotyon TORORÖT, nyo mwochini kutïngkoti Israel nko komoswe nko champilwokö nko tömköyi nko koroskö cho kilïkwï kïratis nko kanastine cho le kïratis cho kikiwir akulölos puntonï cho kimang kuwit.”

⁵ Lentöy Echotyon TORORÖT, “Kyangalanan ompö nörekyo kililat ompö puntonichï walaka löwïr nko Edom kïmïkul, kichöghchï kegh korenyan kïlïkwï nyingwa ompö menotön akulölos.

⁶ “Kïlenyona ngora koro Israel, kutïnkö nko komoswe nko champilwokö nko tömköyi lenchinö lentöy Echotyon TORORÖT, ongölonan ompö nörekyo kililat ompöwölo kyowongukwa nko roröchin pö punton.

⁷ Kïlenyona owolwolan lö wonguno ye nyu puntonï roröchin tïkwïl.

⁸ “Wölo ilentenyi we kutïngkoti Israel, oyinöy akwa cho pö piköchan Israel cho lekït kuyokwï kegh kor.

⁹ Omitan okuntönkwa amökan kengor korenkwa akekatkat

¹⁰ atö atasan pipö Israel kïnyïghï koronï kïmïkul akemang kanastine aketek kor wölo kilïkwï kïratyan.

¹¹ Atösan pich nko kyak kïnyïghï koronï, tösisyot akïyiyö. Oghan koronï kemang le köny, awunyi nyo karam kïtïl atay le tagh, tenkïtunö lö, ochan ECHOTYON.

¹² Okönyan kïpestegha koronï piköchan pipö Israel. Telïkuna mïlatengwa amelö toghekwa chane kïmeghyeghö monïngö ngat.

¹³ Lentöy Echotyon TORORÖT, lentöy pich ochikwa kapömpichtin cho kam pich akwama kore monïng.

¹⁴ Kïlenyona melö tomekwa pich, anta agh korengwo wölo puryö monïng. Mwoghöy Echotyon TORORÖT.

¹⁵ Melö topïswokwa atera roröchin pö punton anta namekwa arasï nyo pö pich amelö toghekwa korenkwa kunyara.” Mwoghöy Echotyon TORORÖT.

Otöp pö Israel nyo rel

¹⁶ Kungwïnchanïn ngölyonto ECHOTYON.

¹⁷ Kïlenchanïn, “Wero chi, kisïmnyon pipö Israel korengwa otini kimöngöy ori, ompö otöptinekwa nko ighisyewutkökwa, kilenye otöptöngwa ompö tawunyan, korka nyo kötöpö yona.

¹⁸ Kïlenyona onörekyan chane nyoman ompö kisön cho kimïltegha koronï kïropchini körkeyïntin ropöw, kilïkwï nyu koronï sïmnyon.

¹⁹ Kïlenyona ochïpön chane akwompö otöptinekwa nko ighisyewutkökwa. Otoytoyan chane kïghömï punton akïghömï koros löwïr.

²⁰ Kitö chane arasï kaynenyan nyo tïlil ompö wölo kipa, ompöwölo kïlö pich, ‘Nko wölo kipïstö korengwa nyo kitö Tororöt.’

²¹ Wölo kyölulön kaynenyan nyo tïlil nyo kitö pö pipö Israel arasï ompö koroswo punton cho kimi chane.

²² “Kïlenyona lenchinö pipö Israel lentöy ECHOTYON Tororöt kïgh nyo omökan oghe kï melö ompö köromnyenkwa wölo oghan ompöwölo kolulön kaynatenyan nyo tïlil nyo kyosïmnyonökwa ompö koroswo punton cho kyapekwa amang.

²³ Oporchinan kaynenyan nyï wow tïlil punton, nyï kyosïmnyonökwa ompö kwenungwa, tökunkïtï nyu chane lö ochan ECHOTYON. Mwoghöy Echotyon TORORÖT.

²⁴ Opunonekwa wölo mi puntonï aghamïtwekwa ompö koros löwïr apkana korengwo.

²⁵ Atolapay opïspisyokwa pögh cho tïlilöch totïlilitunökwa ompö sïmnyontönengwa nyo mamïnïng nyo pö körkeyïntinekwa löwïr.

²⁶ Okonokwa mïkulögh nyo rel nko mïkulöwunyan nyo rel kïtöpö nko akwa. Atolapay ochengenekwa mïkulöwunï aghïgh le kogh akonokwa mïkulögh nyo tapïlïl.

²⁷ Otönan nyu mïkulöwunyan kïtöpö orinkwa tökwighekwa arïpa ngalechan nko kirurutköchan lasiny.

²⁸ Atamanga koronï kyotönön papotïnekwa, talïkuna piköchan alïkwan Tororötïnkwa.

²⁹ Osörwokwa nyu ompö sïmnyontönenkwa asoyönön paghekwa kïrir nyoman amelö tokonokwa kömöy.

³⁰ Oghan akwa ket nko pagh kïrïr ompö paren nyoman tömakïmi kömeywokï cho töni koros arasï.

³¹ Ononekwa nyu ortïnekwa cho ghach nko ighisyewutkökwa cho melö kikaramach, kulilekwa nyu ghöyitwokökwo nko ighisyewutkökwa cho kïkïröy.

³² Ngalechi omochan oghe, kwompö akwa. Mwoghöy Echotyon TORORÖT. Ayo, mololïyönekwanye so we pipö Israel ompö ighisyewutkökwa cho melö pö man?

³³ “Omwoghan ante Echotyon TORORÖT lö, asisini kotïlilokwa ompö ghöyitwokökwa löwïr, aghan nyu kanastinekwa kemang aketek koros wölo kikilïkwï kïratyan.

³⁴ Kïngoröy paren kor wölo kikilïkwï kïratyan, nyinö kötölïku surkwen ompö pich cho weröy ori.

³⁵ Akïlentöy pich, ‘Kalïkwï korö wölo kile kïratyan le para Eden akemang kanastine cho kïle kïratis aketekyï nïyet.’

³⁶ Kunkïtï nyu puntonï cho kingötï nko akwa lö ani ECHOTYON nyo katek wölay kile kïratis, apintit wölo kilïkwï siriron. Ani ECHOTYON nyo kamwagh aghan lenyini kamwaghan.”

³⁷ Lentöy Echotyon TORORÖT, “Oköngan kïtepanïn pipö Israel aghan chane kïtösisyö mïrönkökwa le okwot pö kechir.

³⁸ Le okwot pö amörostin ompö Yerusalem ompö osiswo ichontinekwa, kinyïghï nyu pich kanastin, kunkïtï nyu chane lö, ochan ECHOTYON.”