ESEKEL 29 - PIPÏLIA

¹ Kungwïnchanïn ngölyonto ECHOTYON asispa taman nko odeny arawa taman könyi taman.

² Kïlenchanïn, “Wero chi, nya kïngor möt Parao pöytoghinto Misri, lenchinö

³ Lentöy Echotyon TORORÖT, Rosa keghöchinyi nyoman nyi Parao, pöytoghinto Misri. Ichinyi moroy nyo mamïnïng nyo irïwöy lalwatïneku ailentöy, ‘Nyinyan lalwa Nile nyo kyoghchan kegh.’

⁴ Orïtenan sartï kurel kutingu, aghan kaghaghi lalwatïneku kinaminyi lödak, atolapay angwïsuneninyi lalwatïneku ori nko kaghaghi löwïr ompö lalwatïneku cho kinaminyi lödak.

⁵ Atolapay owirchinyi surkwen nko kaghagh cho kömi pögh idongönyi nyu tononi, ipöyitunyi tyonkïn cho pö wuw nko törit, kyotötinyi le omisyengwa.

⁶ “Kunkïtï nyu pipö Misri lö ochan ECHOTYON. Ompöwölo kikilïkunyi tiwöwonto Israel nyo mösöp kïgh.

⁷ Ato lentöy kïnöminyi imïrenyi aikolota chane pughway, kïlö kïtïgho kegh nyi imïrenyi ighanyi kwotyö chane kïrutay,

⁸ Kïlenyona lentöy Echotyon TORORÖT, rosa, opunan pich kïparekwa nko kyaki lömïs,

⁹ kïlïkwï koro Misri kïratyan, kunkïtï nyu pich lö, ochan ECHOTYON. “Ompöwölo ilentenyi nyenyu Nile nyo kyaghan.

¹⁰ Kïlenyona keghöchaninyi akïghochanïn lalwatïneku. Oghan koro Misri kïlïkwï kïratyan, kïngeta Mikdol ntökwit Aswan, rotyo Etopya.

¹¹ Möminye kel pö chi anta kel pö tyony nyo weröy nyonikïny, tuwitu koronona könyis tömönut angwan.

¹² Oghan koro Misri kïlïkwï kïratyan nyo gha tya ompö koros cho le kïratis. Lïku kanastinechi kïratis könyis tömönut angwan. Otoytoyenan pipö Misri kïghömï koros akïpa kïmang kwenu pich cho sisinchö.

¹³ “Lentöy Echotyon TORORÖT, oghömïtunan pipö Misri löwïr ompö sörömu konyi tömönut angwan ompö wölo kyotoytochan.

¹⁴ Atolapay apintitan pipö Misri, akanyan kïmang chane koro Patros nyo kile nyingwa kïngata wïyay. Lïku nyu chane pöyunöt nyo melö tïng owesyö ompö otini.

¹⁵ Nyörkölölitu nyoman kïtïl pöyunötin löwïr. Amelö tökutoku ngat tökwawesit kïtïl punton. Oghan Misri kïlïkwï pöyunöt nyo mïnïng tömökumuköy kïpayta punton walaka.

¹⁶ Melö tökïtïgho kegh pipö Israel ngat Misri, nyo ato nan lelutkökwa otini kiyara chane kingörokut. Nkïtu nyu chane lö ochan Echotyon TORORÖT.”

Pöröy Nepukadnesa Misri

¹⁷ Kungwïnchanïn ngölyonto ECHOTYON asispa tagh arawa tagh könyi 27.

¹⁸ Kïlenchanïn, “Wero chi, kikusetï lïkenyi Nepukadnesa pöytoghinto Papilon kïpar Tiro. Kigh pikachi kïkasan tïkwïn cho nïkisöch ntökïchïrkonisyö mötöwöy nko pöghway, wölo melö nyoru kïgh nyonikïny chane ompö Tiro nyo yoku poryoninö kisïnga.

¹⁹ Kïlenyona lentöy Echotyon TORORÖT, rosa otöninan koro Misri, Nepukadnesa pöytoghinto Papilon tökïcheng kwip sïkönöte nko pöröwe akulölos kore, kïlïkwï ropöwo askarinechi.

²⁰ Kyotönön nyinte koro Misri kïlïkwï mïsyarechi ompö kasinini kïgh nyinte ompöwölo kipöghisyewanïn chane. Mwoghöy Echotyon TORORÖT.

²¹ “Oghan asisoni pipö Israel kïsïch owesyenyi atolapay aghinyi Esekel ngölonchinö chane, tökunkïtï chane lö ochan Echotyon TORORÖT.”