ESEKEL 28 - PIPÏLIA

¹ Kungwïnchanïn ngölyonto ECHOTYON

² Kïlechanïn, “Lenchinö pöytoghinto Tiro, lentöy Echotyon TORORÖT, Ikwolenyi kegh nyoman, ompöwölo ilentenyi ochï tororöt nyo töpo ngacharu tororötin ompö kwenu nanamtin akwanyï ichinyi pat chi kwïle melö tororöt kïrkegh ighanyi kegh lö ochï ngöghom le tororöt.

³ Owöy ilenchinenyi kegh ochï ngöghom kïtïl Daniel amöminye kïgh nyo wïngate ompö nyi nyo melö inkïtönyi.

⁴ Kisïkönonenyi ngöghomnyengu nko pköchintöngu. Kisïrïtönyi koltin nko Silpa aitö kaplawachtineku.

⁵ Kitasa sïkönötengu nyoman ompö ngöghomnyengu nyo wow ompö mïnchïrïsnön. Atolapay kïkwol nyu kegh mïkulöwungu ompö mökosyengu.

⁶ Kïlenyona omwoghan ante Echotyon TORORÖT lö, ompöwölo keghanyi kegh lö ochï ngöghom le tororöt,

⁷ opunyi nyu pung cho ghach ompö punton. Pöröy akusïmnyon tïkuku löwïr cho pïchighöch cho kighenyi ngöghomnyengu.

⁸ Wirchininyi chane pïrïm to imeghanyi nyu meghat nyo ngwan nyo gha tya ompö nanam ori.

⁹ Telentenyi ye, ‘Ochï tororöt,’ ompö tawu pïchini kiparinyi, nkïtunö nyu lö ichinyi chi kwïle melö tororöt.

¹⁰ Imeghenyi megha kukiy ompö mori punton.” Mwoghöy Echotyon TORORÖT.

Chïntaghpa pöytoghinto Tiro

¹¹ Kïlenyona kungwïnchanïn ngölyonto ECHOTYON ngat nyo lentöy,

¹² “Ngeta rira pöytoghinto Tiro. Lenchinö nyinte lentöy Echotyon TORORÖT, Kichinyi köny körkeyïn nyo pö tïlilïn aichï ngöghom nyoman aichï pïchigh.

¹³ Kimitenyi Eden para Tororöt, kikïmineninyi koghïn cho pö olyot nyo wow, koghi rupin nko dayamon nko topas nko yaspi, nko almon nko perulo nko soari sapira nko sumaradao nko poreket. Kikïmina tïkuku koltin. Akimi tïkuchoni kïpsach asisini kikighinyi.

¹⁴ Kyotönön kerupim* kïripinyi, ompö kutïng pö Tororöt nyo tïlil, aiwesteghenyi kwenu koghïn cho kwerkwersot.

¹⁵ Kichinyi lïpop ompö ortïneku, kïngeta asisini kikighinyi, ntökïtenö ighanyi ngokï.

¹⁶ Ompö mïnchïrïsnöntengu nyo kilet nyoman, kinetanyi kegh ghöyityö aigh ngokï, kïlenyona atyartinyi le sïmnyon ompö kutïng pö Tororöt, akïyoninyi kerupim nyo kiripinyi ngetena kwenu koghichay kwerkwersot.

¹⁷ Kikwol kegh mïkulöwungu ompö pïchighyengu ainyaranyi ngöghomnyengu ompö pïchighyengu, kïlenyona otyorchinyi ngwïny, akanyan kurosinyi pöytoghï ompö rorchin.

¹⁸ Kisïmnyonönyi wölo kïsogho, ompö ngokiku cho möngörï nko ompö mïnchïrïsnöntengu nyo pö lïs. Kïlenyona kyotyorunyi ma kïpelinyi, inaghanyi lïkuna aryon ompö ngwïny ompö tawu pich löwïr cho kisïwinyi.

¹⁹ Kimïghyö nyi pich löwïr cho nkïtinyi, kalïkwï sörömungu nyo kipölpolöy, akewonyenyi kokay.”

Kangor möt Sidon

²⁰ Kungwïnchanïn ngölyonto ECHOTYON,

²¹ Kïlenchanïn, “Wero chi, waghakena aitopön kanasyanta Sidon aikany kïngor möt lö,

²² lentöy Echotyon TORORÖT, ‘Koghöchanïkwa we pipö Sidon, ongwïnan oporu ororyenyan ompö kwenunkwa. Nkïtu nyu pich lö ochan ECHOTYON otini korwokyan chane akïsïwa tïlilïntanyan.

²³ Otyorchinan chane amal, akuyinta kisön ompö ortïnekwa, ompö porsyö nyo kiwit chane wop löwïr. Nkïtu nyu chane lö ochan ECHOTYON.’ ”

Kisoyönöy Israel

²⁴ Lentöy ECHOTYON, “Möminye chi ompö punton löwïr cho kimang kuwit pipö Israel cho kichopöy kong chane, nyo tökuchopöy kong chane ngat atökunkïtï lö ochan Echotyon TORORÖT.”

²⁵ Kïlenyona lentöy Echotyon TORORÖT, “Otini kaghamïtwan pipö Israel ompö wölini kipa, kunkïtï nyu puntonï lö ochan tïlil. Akïmang nyu pipö Israel korengwa, nyini kyotönön mötworintenyan Yakopo.

²⁶ Möngisïyi nyu ompö kalya akïtek korikwa akïngorsyö. Omungan pöröriskökwa löwïr cho kichop kong chane atökunkïtï lö ochan ECHOTYON Tororötïngwa.”