ESEKEL 26 - PIPÏLIA

¹ Kungwïnchanïn ngölyonto ECHOTYON asispa tagh nyo pö arawa, könyi taman nko akonga.

² Kïlenchanïn, “Wero chi, köroröchï pipö Tiro pipö Yerusalem lö, ‘Kimïrö tekechonto ara pich, kiyata ye nyu tolïtön, tökwighöy ne ye nyu? Melö tökïtïng owesyö nyonikïny.’

³ “Kïlenyona lentöy Echotyon TORORÖT, koghöchan Tiro opïsunan punton cho chang kïpka kïporyegheninyi le wölo ipuntoy puseryonta ket.

⁴ Wurtoy chane nïyetwo Tiro akurultö pchörine tïkwïl. Atolapay angongoghtan nyïngwïtyante kïngotï koghïn kwïle.

⁵ Lentöy Echotyon TORORÖT karkegh nyinte nko wölo kitöni netin ompö nanam. Akïlïku pöröwon ompö punton

⁶ akuwonyö tipichi ompö kor wölo le sany ompö chok tökunkïtï lö ochan ECHOTYON.

⁷ “Kïlenyona lentöy Echotyon TORORÖT opchinan Tiro ompö okumpö löt Nepukadnesa, pöytoghinto Papilon nyo le pöytoghinto pöytoghï nko angoletinechi nko nkaritin nko pich cho pegho angoletin söpïchtino pipö lïk.

⁸ Kïpöröy pich löwïr cho möngöy kor wölo le sany, rikokwa nyinte.

⁹ Akutö pïrompur cho rultegho nïyetkökwa akurulteghö oywöy pchörinekwa cho koghöch.

¹⁰ Pkonöy angoletinechï kïtïpokwa terït. Potonchot nïyetkökwa ompö kïringtino angoletin nko nkaritin cho ipöy tïkwïn nko nkarino lïk otini kölïtï ortïnekwa le pich cho lïtöy kanasyan wölo kinganga.

¹¹ Tyoköy kelyo angoletinechi ortïna kanastinekwa kïsakatan akïpar pikökwa ompö chok, akurultö pchörinekwa cho owesöch.

¹² Lïku sïkönötenkwa pörowechi nko tïku mïnchïrïs löwïr. Akurultö nïyetkökwa akuwurta karikwa cho karamach atolapay kïwirchï koghikwa nko mpawtine nko nyïngwi pögh.

¹³ Owonyan chöghöto tumwöyikwa, amelö tökelïmöy chöghöto pïkantiskakwa asïyech kokay.

¹⁴ Atolapay aghekwa alïkuna ghat nyo tïryal, wölo moyo pich netin, amelö töketeköy kanastinekwa kokay.” Mwoghöy Echotyon TORORÖT.

¹⁵ Kïlenyona kïlenchï Echotyon TORORÖT Tiro, “Rïngringöy koroswö cho mi sörömu nanam otini kerulönyi akïsönöniö cho kakikotön otini kakïpar pich ompö kwenunkwa.

¹⁶ Rökuno pöytoghi punton ngöcherwekwa pö paytagh, akïngwïs sampunekwa nko sïrokökwa cho mirmiryot nko karïn atolapay kïtïpï ngwïny kïpotonchot.

¹⁷ Akitumenyi tum pö pich cho kimeghö kïlentöy, ‘Kikewurinyi we kanasyan nyo oror, kanasyan nyo kipötoy nanamtin. Kiwöghinyi pich cho möngöy sörömu nanam.

¹⁸ Potonchot nyu koroswö cho kikwen nanam asisini kerulönyi. Akimïghyö pikachi ompö kiwurat nyo teno nyï.’ ”

¹⁹ Lentöy Echotyon TORORÖT, “Oghekwa le kanastin cho kikewurta kïlïkwï kïratis cho puryö pich cho möngöy otini kopkokwa puseryon kïtïpokwa.

²⁰ Chutokwa nyu pögh atanga wölo mi pich cho kimeghö wölo kipa pich cho pö köny omönyekwa wölini nko samï. Amelö temöngisyenyi ompö koro pich cho sötot.

²¹ Lïku nyu sörömungu nyoni kïrkegh keyarinyi kïmelö tökenyorunyi kokay.” Mwoghöy Echotyon TORORÖT.