ESEKEL 25 - PIPÏLIA

¹ Kingwïnchanïn ngölyonto ECHOTYON

² kïlenchanïn, “Wero chi, partena koro Amon aingor ngal parakungwa.

³ Lenchinö pipö Amon, atera ngölyonto Echotyon TORORÖT. Lentöy Echotyon TORORÖT, kyongörechekwa otini kikisïmnyon Konyan nko koro Israel otini kikinyar kilïkwï kïratyan aroröchï pipö Yuda ato kikïrang kipa pïnotön.

⁴ Kïlenyona otoninokwa pipö kongasis alïkuna chikwa. Teköy korikwa akïmang kwenunkwa. Omöy paghekwa akïlï chekökwa.

⁵ Oghan Rapa kïlïkwï acheypa tamasay kïlïkwï kanastina pipö Amon akalpa kechir. Atonkïtunökwa nyu lö, ochan ECHOTYON.

⁶ “Lentöy Echotyon TORORÖT, kïle wölo kyolïlïyisyekwa ongörekyö akwompö koro Israel.

⁷ Kïlenyona okonokwa ye nyu sitöt. Ongetyokwa ompö wölo mi pich oghokwa owonyenö ompö koros, atonkïtunö lö ochan ECHOTYON.”

Kingor möt Moap

⁸ Lentöy Echotyon TORORÖT, “Akwa pipö Moap nko Seir, kolekwa, ‘Arose köny lö karkegh pipö Yuda nko pipö punton walaka.’

⁹ Kïlenyona opïstenan kanastina Moap cho köripöy söröm, kïmi kanastina cho pïchighöch cho lata Pet Yesyimot nko Paal Meon nko Kiryataim.

¹⁰ Otötenan Moap nko Amon otöni pipö kongasis kïlïku nyingwa amelö tökenonöy asïyech kokay ompö punton.

¹¹ Atolapay orwokyan Moap. Atökunkïtï chane lö ochan ECHOTYON.”

Kingor möt Edom

¹² Kïlenchï Echotyon TORORÖT pipö Edom, “Kïle wölo kyoghchikwa nyo gha pipö Yuda, kyaghakwa ghöyïn nyo mamïnïngnye otini kotökisyekwa.

¹³ Kïlenyona lentöy Echotyon TORORÖT, omungan Edom awonyan pich nko tyonkïn, aghan kïlïkwï kïratyan korö kïngeta Teman ntökwit Dedan. Wonyegho pich chok löwïr.

¹⁴ Oghan nyu kitakatenyan ompö mori piköchan srael, takwigh Edom kïrïp kegh nko nörekyenyan nko nyölotyenyan. Atökunkïtï chane kitakatenyan.” Mwoghöy Echotyon TORORÖT.

Kingor möt Pilistia

¹⁵ Lentöy Echotyon TORORÖT, “Kigh Pilisti nyo gha kutökisyö ompö pipö Israel. Kïpar chane ompöwölo pungkökwa cho pö köny.”

¹⁶ Kïlenyona lentöy Echotyon TORORÖT, “Omungan pipö Pilisti, awongan pipö Keret lömïs nko pich walaka löwïr cho mi sörömu nanam.

¹⁷ Orwokyinan chane ompö kitakat nyo wow amungan chane ompö nyolotyenyan. Atö kunkïtï chane lö ochan ECHOTYON otini kotökisyan.”