ESEKEL 21 - PIPÏLIA

Choko ECHOTYON

¹ Kïlenchanïn ECHOTYON,

² wero chi, “Ngora Yerusalem nko wölo sogho pich. Lenchinö pipö Israel

³ lentöy ECHOTYON, ochan punyon ompö akwa. Ongwïsunan chokenyan aparekwa lömïs cho karamach nko cho ghach.

⁴ Opöran chi anka tïkwïl, kïngeta okumpö tagh ntökwit okumpö löt.

⁵ Nkïtu nyu chi anka tïkwïl lö kangwïsunan ante ECHOTYON chokenyu mïlot amelö toyodenan ngat.

⁶ “Kilenyona wero chi, loka, loka ompö ngwonïn kïsïwïyi chi anka tïkwïl.

⁷ Ato tepinyi chi lö ne nyï ilokonenyi, imwochï lö ompö ngal cho pkonöy. Otini ketï, wiröy chane mïghö, akïchïntoy morïn, akïmeghö mutïnö, akïwir kegh kutïngöy ompö potana. Ighisyot ngalechoni nyo mötïny, akikwitï asisoni.” Mwoghöy Echotyon TORORÖT.

⁸ Kungwïnchanïn ngölyonto ECHOTYON kilenchanïn,

⁹ “Wero chi, ngora. Mwochinö pich lö lentöy Echotyon: Anyona chok, anyona chok, kikelit akesit.

¹⁰ Kakïlit tökepörisyeghö, akesït kuryal. Mi nyu so ngörekyö atoni? Ompöwölo kasas piköchan kiruröt nko sitöt.

¹¹ Kïmi kelitöy choke atö kepöghisyeghö. Kikelit akesït atö ketö pörin.

¹² Rira aitegh, we wero chi, ompöwölo pö chokonï piköchan nko kintöghoghi Israel löwïr. Kiketötö chane kepar nko piköchan walaka löwïr. Kïlenyona chala nyu,

¹³ ompöwölo otyöman pikachu. Wölo ato tagh kïkötö ngokikwa, kïnyoru chane sitononi ngwan. Mwoghöy Echotyon TORORÖT.

¹⁴ “Ngorsyenö ye nyu wero chi. Rapaka morïn, nya kwigh kasï chok kïnyïl odeny tökïsönök nyoni kï choko pörsyö nyo kiwit chane lö tïlkwïch.

¹⁵ Kïlenyona kïmïghyö ompö ngalechï, kyotönön ortïna kanasyantengwa chok nyo ryölöy le kiryal akï mi kïpsach kïpörisyö.

¹⁶ Para we chok kutang kumpö tagh niko okumpö löt para wop tïkwïl wölini ketanganyi.

¹⁷ Oröpokan tïkwïl morichan tökuwonyö nörekyenyan. Kamwaghan Echotyon TORORÖT.”

Choko pöytoghinto Papilon

¹⁸ Kungwïnchanïn ngölyonto kïlo wero chi ECHOTYON.

¹⁹ “Igha ortïn odeny nyo weröy pöytoghinto Papilon nko chokenyi. Nya kutorö ortïne kwodeny koronini le akonga. Itö pentera otini sochegho ortïna kutöngöy kanasyan.

²⁰ Ighenyi ara choko pöytoghin nyo wetöy kutöngöy Rapa kanasyanta pipö Amon, kutang are anka kanasyanta Yerusalem nyo tekate nyoman ompö koro Yuda.

²¹ Ghyongo nyu pöytoghinto Papilon atay kisocheghö ortïna akusasak kotichi akïtep körkeyïn Terapi akuros kwanyanta amöros tökunkïtï lö onö wölo töngöy nyinte.

²² Mi ewunyi nyo pö tagh kotï cho kaparta Yerusalem! Lenchini nyinte kïwö kïtek wölo kïghïpchegho akukik, atolapay kusyepisyö ompö ortïn kïsöpchï kïwö pïrïmpot cho ghïpchegho pipö lïk.

²³ Wölo lenye ompö chane sölwontön ngalechï. Ompöwölo kikwam mis. Wölo nonchini nyinte chane ngokikwa tökïnömisyö chane.

²⁴ “Kilenyona omwoghan ante Echotyon TORORÖT lö, kikïrumtö ngokikwa. Kikïsïwa chi anka tïkwïl wölo lata ghöyityenkwa. Koporukwa ngokikwa ompö ighisyewutkökwa. Otönokwa nyu mori pungkökwa.

²⁵ “Kïnyïl nyi we kintöghoghintonï pö Israel, kikwitï asisto söröm nyo pö sitengu.

²⁶ Omwoghan ante Echotyon TORORÖT lö, ngwïsa kopiye nko tenta. Melö tökïlata ngala chay pö su. Syolö nyona mi to, aireyteghö nyona syolote!

²⁷ Kinyarat, kinyarat! Onyoran kanasyante ntökïtenö kungwïn nyinte nyo kakïlan kutö sitöt kanasyante otönön nyu nyinte.

Chok nko pipö Amon

²⁸ “Yeo wero chi, ngorsyenö. Lenchinö pipö Amon lentöy Echotyon TORORÖT, “ ‘Mi chok kïpsach kïpörisyö, kakisït tökuryal le kiryol kapayasakwa ompö sïwïyaghtankwa pö putintön.

²⁹ Otini omwoghekwa sïwïyaghtina putintön nko ngorsyö nyo pö putintön, kï kiketö chok kipsach kïtör kotwoni penyï nko mwokïyis. Kikutomtö asistankwa nyo pö söröm nyo onyorukwa sitöt, kïpörokwa lömïs.

³⁰ “ ‘Nyo oyokyinö chok mïlenyi! Orwokyinokwa ompö koronini kikighenokwa nko wölini kikïyichokwa.

³¹ Omïlwokwa nörekyenyan, akutenekwa kiminy pö nörekyenyan le lyopöto ma. Otönokwa mori pkatis cho nkït kinyarat.

³² Wonyekwa ma. Akemïltegho kisönkökwa korenkwa, amöminye chi nyo tökunonokwa kokay.’ ” Mwoghöy ECHOTYON.