ESEKEL 20 - PIPÏLIA

Machata ECHOTYON nko penyata ptangengmöt

¹ Kipka poyi Israel walaka kïtepanïn ngala machata ECHOTYON, ompö könyi mut nko odeny arawa mut, asispa taman.

² Kïlenchanïn ECHOTYON.

³ “Wero chi, lenchinö kintöghoghi Israel, olentan Echotyon TORORÖT, kapkanakwa ye atepenanïn ngölyon nya? Kïle ato söpöy Echotyon TORORÖT, melö ochöman atepenanïkwa kïgh.

⁴ “Imukenyi rwokyine chane nya wero chi? Merwokyï nyu. Kïlenyona porchinö chane kunkïtï tïku sïmnyonton cho kigh papotïnekwa.

⁵ Atolapay ilenchï chane, lentöy Echotyon TORORÖT, otini kyakïlan pipö Israel, kyaman muma lö oporchinan kegh chane ompö Misri. Kyowolwolchan kegh chane lö ochan Echotyon TORORÖTïnkwa.

⁶ Kyowolwolchan chane lö opunonan chane koro Misri kïpa kor nyo kyoyörchan chane, kor nyo yintoy chö nko kumat, kor nyo tïng ororyö kïtïl koros löwïr.

⁷ Kyolenchan chane opïstenö tïkuchï ghach sïwïyi konyikwa, amesïmnyonö kegh chi körkeyïntino Misri ompöwölo ochan Echotyon TORORÖTïnkwa.

⁸ Wölo kitaghanïn chane nyoman, amöterwanïcha kokay, amelö kipïstö tïkuchï chi ghach kirosöy konyikwa, amopïstöcha körkeyïntino Misri. Kyanarekan nyoman alan porchinö nörekyengu kïchamcham ompö koro Misri.

⁹ Wölo olulön kaynenyan kegh, tamalïkwï arasï ompö kwenu puntonichï möngöy nko chane kïsïwïyi opunan pipö Israel kïpkana Misri.

¹⁰ “Kïlenyona kyamïtwan chane kipkana Misri kïpa surkwen,

¹¹ kyotönön chane kiyomisutköchan nko kirurutköchan, cho ato ripchi lasiny kïsöpöy.

¹² Kïlïkwï machey ompö kwenunyan nko chane atö kunkïtï lö ani ECHOTYON nyo otïlilöy chane.

¹³ Wölo kipenyanïn pipö Israel ompö surkwen, melö kirip kiyomisutköchan wölo kitagh kirurutköchan cho söpo chi ato rïp, kikyolan ompö nörekyö wanya pïchï ompö surkwen.

¹⁴ Wölo olulön kaynenyu tömösïch arasï ompö tawu punton cho kisïwïyi omïtunan chane ompö koro Misri.

¹⁵ Atolapay owolwolchan chane ompö surkwen lö melö topan chane koronay kyotönön chane, kor nyo yintoy chö nko kumat, kor nyo pïchigh kïtïl koros löwïr.

¹⁶ Ompöwölo kitagh kirurutköchan amarïpcha kiyomisutköchan akusïmnyon Sapatotïnyan* otinö kirïp chane körkeyïntin.

¹⁷ “Wölo kyosyonchan melö kyawangan chane ompö surkwen.

¹⁸ Kyolenchan monekwa ompö surkwen, motöp tarïp kirurutko papotïnekwa anta kiyomisutkökwa, amosïmnyonö kegh körkeyïntinekwa.

¹⁹ Ani ECHOTYON nyo ochï Tororötïnkwa, arïpa kirurutköchan nko kiyomisutköchan.

²⁰ Okïr Sapatotinechan kïtïlilitu, tökïlïkwï machey pö muma* ompö ani nko akwa atonkïtunö lö ochan Echotyon TORORÖTïnkwa.

²¹ “Wölo kipenyanïn monïnge tïkwïl melö kötökïrïp kiyomisutköchan amelö kirïp kirurutköchan cho söpo chi ato rïp, akusïmnyon Sapatotinechan. Anarekan olan wanga lömïs ompö surkwen.

²² Wölo olulan kegh nko kaynenyu, tömetö puntonï kaynenyan arasï, cho kisïwïyi opunan chane ompö Misri.

²³ Kïlenyona awalwalan ompö surkwen lö otoytoyonan chane kïghomï punton akïyasta kïghomï koros.

²⁴ Ompöwölo melö kirïp kinetutköchan, akïtagh kiyomisutköchan akusïmnyon Sapatotinechan akïrïp körkeyïntin cho kisoghöy papotïnekwa.

²⁵ “Atolapay otönön chane kiyomisut cho melö karamach nko kirurut cho melö tïng söpon,

²⁶ asïmnyonön chane ompö ropöwekwa cho kyaghan kïropta poretayikwa ato kwotyö chane tokunkïtï lö ochan ECHOTYON.

²⁷ “Kïlenyona wero chi, lenchinö pipö Israel lentöy Echotyon TORORÖT, kimwaghanïn papotïnekwa lenyoni ato kighwanïn takal.

²⁸ Ompöwölo nyini kyopön chane koronini kyowolwolchan lö otöninan chane, nyini kisiwa kutïng kipa kïropta amörostinekwa ompö wölini nko ompö ket cho tïnkusöch, kwighanïn anarekan nyoman ompö ropöwekwa cho kipelöy nko dipay* cho kïroptoy.

²⁹ Atepan chane lö ne nyï opetekwa oghöy ompö tïkumwok nya? Kekuro atoni Tïkumwok nko ye.

³⁰ Kïlenyona, lenchinö pipö Israel lentöy Echotyon TORORÖT, osïmnyonekwa kegh ye so le papotïnekwa, amostoy arïp tïkwïn cho kïkïröy?

³¹ Kösïmnyonökwa kegh otï kotötekwa konutkökwa aropta monekwo le amörostin ompö ma asïmnyonökwa kegh ompö körkeyïntinekwa löwïr nko ye. Alekwa nyu, nya ketepena ani ngal nya we Israel? Kïle wölo ochan Echotyon TORORÖT nyo satate, melö otepenanïkwa kïgh nyonikïny.

³² Meghonye kïyï mi mötöwekwa, olentekwa, ‘Nya tökelïkuna le pipö punton cho soghöy körkeyïntin cho kakigha ket nko koghïn.’

Konu Tororöt sitöt nko lastagh

³³ “Kïlenyona kïle ato osöpan olïkunan pöytoghintenkwa epöghisyeghonan owesyö nko charut.

³⁴ Opunenokwa wölo mi pich aghamïtekwa apkanena koros chini kyotoytoyechikwa otini kyanarekan, awastekwa ompö charut.

³⁵ Opkwokwa nyu surkwen pö punton arwokwokwa konyïn.

³⁶ Lentöy Echotyon TORORÖT orwokyinokwa le wölo kyorwokyan papotïnekwa ompö surkwen pö koro Misri.

³⁷ “Omungokwa aghekwa arïpa mumenyan.

³⁸ Ochengan pich cho le penyi ompö akwa nko pich cho ighwanïn ngokï, opunenan chane koros cho möngöy, wölo melö lïtöy koro Israel. Onkïtunekwa nyu lö ochan ECHOTYON.”

³⁹ Kïlenyona lentöy Echotyon TORORÖT, “Ape nyu, we pipö Israel asaghatena körkeyïntinekwo kokay ato moterwanïkwanye. Wölo itïtoy ato melö tosïmnyonekwa kaynenyan ompö ropöwekwa nko körkeyïntin.

⁴⁰ “Kïkany akwa we pipö Israel löwïr, opöghisyewanïkwa ompö kutïngtönyan nyo tïlil. Mwoghöy Echotyon TORORÖT. “Ochömokwa nyu ompö atoni apukwa amörostinekwa nko ropöwekwa cho le kïlan nko ropöwe walaka cho tïlilöch.

⁴¹ Ochömokwa nyu le ngutöwon nyo karam, otini kopkokwa apkanena koros cho kikitoytoychekwa aghamïtekwa löwïr, achaman nyu amörostinekwa atolapay oporunenokwa tïlilïntanyan ato kïsïwa puntonï.

⁴² Otini kopkokwa apkana koro Israel nyini kyowolwolchan papotïnekwa lö otöninan chane onkïtukwa nyu lö ochan ECHOTYON.

⁴³ Kïpköchokwa nyu ortïnekwa nko pöghisyewutkökwa löwïr cho kyosïmnyonekwa kegh. Kïghöchokwa nyu ngokï löwïr cho kyaghkwa.

⁴⁴ Pköchinokwa nyu akwa pipö Israel lö, ochan ECHOTYON otini kaghan kïgh ompö konyït pö kaynenyan amelö kïrïp kegh nko ortïnekwa cho ghach.” Mwoghöy Echotyon TORORÖT.

Ma nyo mi okumpö tagh

⁴⁵ Kungwïnchanïn ngölyonto ECHOTYON lö,

⁴⁶ “Wero chi, partene köny okumpö tagh, aikany kïngor möt wuw pö Nekep.*

⁴⁷ Lenchinö wuw pö Nekep, Tera ngölyonto ECHOTYON, lentöy Echotyon TORORÖT onoghan ma ompö nyi nyo pelöy ket anka tïkwïl nyo tïyam nko nyo nyaril. Memukönye tökemis mayoni otini kanagh. Pelöy nyu ma tokoch löwïr kïngeta okumpö tagh ntökwit okumpö löt.

⁴⁸ Nkïtu pich löwïr lö ani ECHOTYON nyo kanagh mat amöminye chi nyo muköy kumisöy.”

⁴⁹ Wölo olan, “We Echotyon TORORÖT, köngwïrngwïronchanïn pïchï kïlentöy, kangalanan tyankoy kwïle.”