ESEKEL 19 - PIPÏLIA

Tum pö sönönöt

¹ Kilö ECHOTYON tumö isönönöy, tumenö yetïntino Israel,

² itum lö, Kilenye yongu koko ngötïny ompö ngötuny, Kirïp warechi ompö kwenu ngötuny.

³ Kinet wawenyi akonga kunkïtï kïsakas kïlïkwï wawa ngötïny nyo körom nyoman kunet kegh kïnam kinyi nyo omöy kilïkwï nyu ominto pich.

⁴ Kïrirchï kegh puntonï kerik nyinte kïnama ngöghöp, atolapay kechut kïwö koro Misri.

⁵ Nyini kisïwa kame lö kikupotö nyinte kikönötö, kïcheng wawe anka akwigh kïlïkwï sokosin nyo körom nyoman.

⁶ Nyini kiyetï wawanay pö ngötïny kïwestö nko ngötuny walaka akunet ngötïnynay kwam pich.

⁷ Kingany woptinekwa cho tigho kegh akwigh kanastinekwa kïlïkwï kïratis. Akïmïgh korö otini köporor kïtïl ngötïny.

⁸ Atolapay kutö puntonï nyinte ngöghöptin wop tïkwïl, kughïtö netïngwa kïnam nyinte kenama nyinte pïrïmpengwa.

⁹ Kikïkörchï nyinte santuku wayen akepchï pöytoghinto Papilon, atolapay akïtorchï chela. Sisoy nyu wölni kokay ompö kutïng pö Israel.

¹⁰ Lenye yongu ket pö sapipu nyo kikïkötkötyï wölo mpuyote ompö par kisïl akuyin akwa nyoman ompöwölo kinyorï pögh cho chang.

¹¹ Kilïkwï ketïnyi nyo anger, lïpö pöytoghin, kikoghit tya ompö ket walaka, kikïtopönöy kurelunö ket nko morichi cho chang.

¹² Wölo kingagh sapipunay ompö nörekyö akewirchï ngwïny. Kïkut yomo kongasis kïyam, kïmïrisyö morinkachi, akepela ma kuwonyö.

¹³ Kakinget ye nyu kep surkwen kor wölo tïyam puryö pögh.

¹⁴ Kinaghategha ma ketay ghït kurel morichi nko akwe tömöminye ket nyo anger nyo ngötu amöminye lïpö pöytoghin. Chete kï lok akikïlïkwï lok.