ESEKEL 18 - PIPÏLIA

Chi kegh nko ngalechi

¹ Kungwïnchanïn ngölyonto ECHOTYON lö,

² “Ne ngölyontonï kïmwoghöy ompö koro Israel lö, ‘Kam papotïnö sapipun cho mintïrïl wölo kïngwonchï monekwa.’

³ “Wölo le ato osöpan ante Echotyon TORORÖT, omwoghan lö okïr momwoghe ngat ngölyontonï ompö koro Israel.

⁴ Arose lö chichan söponwö löwïr, söpon nyo pö papo kïnyinan söpon nyo pö weri kïnyinan, wölo meghöy chi anka tïkwïl nyo ighöy ngokï.

⁵ “Ato chi pö man chi, akwighöy man.

⁶ Ato melö kasagh körkeyïntin ompö kutïngkot amamnye tïkwïn cho kikïropchï körkeyïntin amesïmnyon kokochi anta wechï korka nyo kötöpö nayat,

⁷ amalïkwï chi nyo pïröy pich wölo töni pich cho ghoköy nyinte tïkukwa. Chi nyo melö chorin, wölo pöropchon akï pöghöy cho amat kömöy akuyenöy cho melö tïng sïro.

⁸ Chi nyo melö omöy tïpö mïrwos akïrip kegh megh ghöyityö wölo kwigh man ompö pich löwïr.

⁹ Kikaman kirurutköchan akïrïp kiyomisutköchan lasiny, kï pö man nyinte akïsöpöy nyo mötïny. Mwoghöy Echotyon TORORÖT.

¹⁰ “Ato yï chichï worö nyo le chorin akipörisïyi

¹¹ akwigh tïkuchï ghach löwïr. Kwam tïkwïn cho kakïropchï körkeyïntin ompö kutïngkot akusïmnyon kokochi.

¹² Akïpïr pich, akïlïkwï chi nyo le chorin amelö ghoktoy pösön, chi nyo soghöy körkeyïntin kusïmnyonöy kegh.

¹³ Pösöntoy ropïyen tökighach nko yiyöwechi. Söpöy nya wey chi nyo lenye nyoni? Mösöpönye kokay ompö tïkuchï löwïr kikwigh le sïmnyon, meghöy nyo mötïny akwomöy nyinte ngokichi.

¹⁴ “Wölo ato yï chichï worö akïsïwa ngokï löwïr cho kigh kwanta akuwöghisyö marïp kwigh tïkwïn cho kighöy kwanta

¹⁵ akïtagh mam amörostin cho kakïropta ompö kutïngkot anta sagh körkeyïntino pipö Israel, amachamnye kïwö koko chi

¹⁶ amelö ighchini chi ghoghityö akïpöghöy nyo sutyote, chi nyo melö chorin, akutöni sïro pich cho chïrutech

¹⁷ akï chi nyo melö rïmin amelö mongtoy ropïyen tökïghak yiyöw amelö tiritöy kïgh, chi nyo ripöy kiyomisutköchan akïripöy kirurutköchan. Melö meghöy nyu chi nyo lata nyoni ompö ngokiko kwanta, wölo söpöy.

¹⁸ Wölo meghöy kwanta, nyona ompö ngokichi ompöwölo kilïsisyö akïchor werïngwa, akwigh kïgh nyo melö karam ompö pikachi.

¹⁹ “Wölo olentekwa, ‘Ompö ne tömöma weri ompö ngokiko kwanta?’ Melö nyu meghöy weri ato igh kïgh nyo pö man nko nyo karam, akïrïp nyoman kiyomisutköchan löwïr.

²⁰ Meghöy nyo mötïny chi nyo ighöy ngokï, melö omöy weri ngokiko kwanta anta am kwanta ngokiko weri. Rïpotoy man chi pö man kïrïpata ghoghityö chi nyo gha.

²¹ “Wölo ato waghaka chi nyo le mwokïyon ompö ngokichi löwïr cho kigh atolapay kïrïp kiyomisutköchan löwïr akwigh man nko kïgh nyo karam, kï söpöy mömeghönye.

²² Melö tökeyityini nyinte lelutkachi löwïr cho kigh, söpöy nyinte ompö mantanyi nyo kigh.

²³ Melö ongörökyinan megha mwokïyon wölo olentan kötöwöghöko ompö ortïnechi tökïsöp. Mwoghöy ECHOTYON.

²⁴ “Ato pïstö chi pö man mantanyi akwigh ngokï nko sïmnyonton cho ighöy mwokïyon kïmeghöy nyo mötïny, möminye ighisyewutkachi cho pö man cho kinonöy. Meghöy ompö ngokichi nko ghöyïntanyi nyo kigh.

²⁵ “Wölo olentekwa, ‘Melö pö man ortïna Echotyon.’ Atera nyu we pipö Israel ononekwa lö melö karamach ortïnechan? Melö so ortïnekwa cho melö karamach?

²⁶ Ato pïstö chi pö man mantanyi akwigh ngokï kïmeghöy ompö ngokichi cho kegh.

²⁷ Akï ato pïstö chemwokïyon ngokichi cho kikwigh akwigh man nko kïgh nyo karam, kïsöpöy.

²⁸ Ompöwölo kenonchï kegh, akïwaghakegha ortïnechi chï ghach kïmömeghönye, wölo söpöy.

²⁹ Wölo lentöy pipö Israel, ‘Melö pö man ortïna Echotyon.’ Melö so ortïnekwa we pipö Israel cho melö pö man?”

³⁰ “Kïlenyona, orwokyinokwa nyu we pipö Israel, orwokyinan chi anka tïkwïl kïrïp kegh nko ortïnechi. Nyo okötenö apïstö ngokikwo tömowonyö. Mwoghöy Echotyon TORORÖT.

³¹ “Opïstenö ngokï löwïr cho kaghakwa ompö tawunyan acheng mïkulögh nyo rel. Pö ne omeghenö nya we pipö Israel?

³² Akwanyï melö ongörokyinan megha chi anka tïkwïl, kïlenyona owöghökisyenö tosöpchenö.” Mwoghöy ECHOTYON.