ESEKEL 17 - PIPÏLIA

Körkeyïn pö sich nko sapipun

¹ Kingwïnchanïn ngölyonto ECHOTYON kïlenchanïn.

² “Wero chi, ngalana ngötïnyö lenchinö pipö Israel,

³ lentöy Echotyon TORORÖT, kipilchï sich Lepanon nyo mamïnïng nyo tïng köpepoy cho echön nko karor cho koghöch cho tïng muntin löwïr.

⁴ Kipilchï törokwö wal akuriy morïn akwip kor wölo mi pasyara, kutö kanasyanta mïnchïrïs.

⁵ Atolapay kïcheng kösïgho ngwïny akïkötkötyï nyïngwïtyan nyo akwagh, kutö ato chang pögh kïpit nyo tïmtïm.

⁶ Kipit sapipïyontonay akulet morichi kutang wölo mi nyinte kudong tikit otini. Kïlenyona kïlïkwï sapipun akipit akïrul.

⁷ Kimi nyu sichtö anka nyo mamïnïng nyo kitïng kapepoy cho echön nko karor cho chang. Atolapay kïnyakïm sapipu tikitkachi kutang wölo mi sichnay akuyoda tïkwïl sapipu morichi kutang wölini lö tökupïs sichnay ompö wölini kikötkötyï.

⁸ Atolapay kunget akïkotkotyï ato mi pögh cho chang lö tökïpit akuyin akwa akïlïkwï sapipu nyo wow.

⁹ Mwagha lö lentöy Echotyon TORORÖT, pitöy tökïsöp ketoni? Möngöghönye sichnay pö tagh akïpatak mori kïyomö? Melö ompö mököy pich cho chang anta cho owesöch kïngagh nko tikitkö.

¹⁰ Ato kingetyï kareran, kïyomöy ompö yomo kongasis ompö otini kökingetyï.”

Kakïyat ngölyonto ngötïnyö

¹¹ Kungwïnchanïn ngölyonto ECHOTYON lö,

¹² “Lenchinö pïchï pö Israel le penyï: Monkïtökwanye so ngötïnyonï? Lenchinö nyu chane kingwïn pöytoghinto Papilon kïpar Yerusalem akwip pöytoghinte nko yetïntine kutang korenyi.

¹³ Kip nyu chi pö ka pöytoghin anka akïwö kwigh kiyomisöt tïkwïl akwomchï muma yetïntinechini kikip

¹⁴ lö tökwip kegh ngwïny, mökwöl kegh, wölo kïrip kiyomisöto muma pöytoghinto Papilon.

¹⁵ Wölo kipeny pöytoghinto Yuda, kïyonta pich kïpa Misri kïlenchï pöytoghin kutö nyinte angoletin nko pipö lïk. Ekumuköy tökumukta? Ekumuköy kïchïwït chi nyo ighöy ngal cho lenye chï nya? Memukönye kïpeny amam kïgh anta nyorï ngölyon.

¹⁶ “Owolwolan ante Echotyon TORORÖT lö, kïle ato osöpan, meghchini pöytoghintonï koro Papilon ompöwölo kïpeny mis nko kïyomisöt nyo kigh nko pöytoghinto Papilon nyo kitö nyinte kilïkwï pöytoghin.

¹⁷ Melö ngöroköy nyinte Parao nko pikachi pö lïk cho owesöch ompö poryot. Otini kapal pipö Papilon pïrïmpot nko ngötutöy cho pöro pich cho möngörï.

¹⁸ Kipeny nyinte tagh mumanay kyam kïcham kwigh mis wölo makïrïpnye le otini kicham. Möminye nyu wölo chïwïto ompö ngalechï tenö chï kigh löwïr.”

¹⁹ Lentöy Echotyon TORORÖT, “Kïle otini osöpan omöy nyinte kiyomisötenyan nyï kapeny.

²⁰ Otöninan ngöghöpunyan nyinte tökïchïnchï tökïnam nyinte. Opunan nyinte nko Papilon ato orwokyan ompö wölini ompöwölo kapeny kirurut.

²¹ Wonsot pikachi pö lïk lömïs ompö chok ketoytoyö ngötunönkö kïghömï ngwïny atö onkïtunö lö ani ECHOTYON nyo kamwagh.”

Kiyomisöto Tororöt nyo pö kikönöt

²² Lentöy Echotyon TORORÖT ante kegh nyo achengöy walisanyi tarakit cho koghöch. Atolapay okötkötyan kutïng nyo kogh.

²³ Okötkötyinan kutïng pö Israel parak. Tökuyin akwa akïrïr, yetu törokwonini nyoman akumungö ori töritwö nko tïpö wudin.

²⁴ Kunkïtï keti löwïr ompö wuw lö ochan ECHOTYON. Oghan ket cho töngoghöch kïpit kïkoghöchitu, aghan ket cho nyorilöch kïyomö, aghan cho kiyomö kïnyörilöchitu. Kamwaghan ante Echotyon TORORÖT lenyoni, aghan kïgh nyo kamwagh lö oghöy.