ESEKEL 11 - PIPÏLIA

Kakirwokyï Yerusalem

¹ Kïsïtanïn mïkulögh yïm or nyo mi okumpö kongasis ompö Kö pö Tororöt. Kimi pich cho le 25 asïwan Yasania wero Asur nko Pelatia wero Penaya nyo kile yetïn pö pich.

² Kïlenchanïn Tororöt, “Wero chi pïchï chay ighöy tötut cho ghach akurwokyï pich kïrïp or nyo gha ompö kanasyantanï.

³ Chane cho lentöy tomönye kwitïta ato kïteköy korïn, ‘Lenye kanasyanta tör nyo kighoghtoy kelatecha panye.’

⁴ Kïlenyona kanya kïngor möt chane.”

⁵ Kïnamanïn mïkulöwu ECHOTYON akïlenchanïn mwagha lö lentöy ECHOTYON, “Onkïtön kïgh nyo ononekwa nko tötut cho olelekwa we pipö Israel

⁶ kotïghökwa pich cho kighömï ortïna ompö kanasyantanï.

⁷ “Kïlenyona lentöy Echotyon TORORÖT pïchï kaparakwa kïrïkïsus kï töre kanasyanta wölo eyononekwa kanasyan ori.

⁸ Kïrkegh owoyekwa chok, wölo oyonchinokwa chok. Mwoghöy Echotyon TORORÖT.

⁹ Otulenokwa ori, atönokwa mori pipö sany tökurwokwekwa kirwoko meghat.

¹⁰ Owonyenekwa ompö chok aparakwa ompö rotyo Israel ato onkïtunökwa lö ochan ECHOTYON.

¹¹ Melö lïku kanasyantanï törenkwa anta alïkukwa panye ompö ori. Wölo opörokwa ompö rotyo Israel.

¹² Ato onkïtunökwa lö ochan ECHOTYON ompö melö kyarïpakwa kirurutköchan anta agh kiyomisutköchan, kyaghakwa kïrïp kegh nko kiyomisut pö puntonichï kiwitekwa.”

¹³ Otini kyomitan ongorsïyi, kupït akima Pelatia wero Penaya. Opïtyan oköpïghchï kegh ngwïny, ateghan ompö kut nyo wow lö, “Ewo we Echotyon TORORÖT! Imökenyi so wonye lömïs ngötunön pö pipö Israel?”

Ayomis pö Tororöt ompö pïnot

¹⁴ Kungwïnchanïn ngölyonto ECHOTYON kïlenchanïn.

¹⁵ “Wero chi, kangalan pikökwa chini le werkökwa cho möngöy Yerusalem, kïngalaneninyi nko pipö Israel löwïr cho mi pïnotön lö, ‘Ochikwa lowöch nyoman ompö ECHOTYON, akikïpïnchecha ye nyu koronï.’

¹⁶ Kïlenyona lenchinö chona le pïnot, lentöy Echotyon TORORÖT, ‘Kïrkegh kyopön chane koros cho lowöch, atoytoychï wölini, tomitan nyete le ye nko chane ompö koroswechoni kipa chane.’

¹⁷ “Lenchinö lentöy Echotyon TORORÖT, ‘Oghömïtokwa löwïr ompö koroswechoni kyapekwa, akonokwa ngat koro Israel.

¹⁸ Nyini kapka yi kunotegho tïkuchï ghach löwïr nko sïmnyontönengwa.

¹⁹ Otöninan chane mïkulögh akonga atönan mïkulögh nyo rel. Achengan mïkulögh nyo aghïgh ompö chane atolapay otönön mïkulögh nyo tapïlïl.

²⁰ Atökïrïp kirurutköchan akïrïp kiyomisutköchan akïtagh kïlïkwï nyu chane piköchan alïkwan Tororötïngwa.

²¹ Wölo chane cho tökïrïpöy tïkukwa cho ghach nko sïmnyontönengwa, oghchinan chane kïrïp kegh nko otöptinekwa.’ ” Mwoghöy Echotyon TORORÖT.

Köweghö ororyo ECHOTYON Yerusalem

²² Atolapay kïngany kerupimtinechay* köpepoykökwa nko koropetinechay mi kamasungwa, kimi ororyo Tororöt pö Israel parakungwa.

²³ Atolapay kïweghö ororyo ECHOTYON kanasyan ori akughyongö kutïng nyo mi kanasyan okumpö kongasis.

²⁴ Kisïtanïn mïkulögh yïm akwipanïn ompö kirwotïtogh ntatan Papilon wölo mi pïnotï atolapay kïweghenanïn sïwïyaghnay.

²⁵ Omwochan pïnot tïkwïn löwïr cho keporwanïn ECHOTYON.