EPRANIA 4 - PIPÏLIA

¹ Kïlenyona nyu kewagha, otete tökïmi kiyomisötö nyo kïlïto kimïnytanyi, atömötöp chi anka tïkwïl ompö akwa ntökïrörchï pöroyïn nyo nyoruno kiyomisötononi pö kimïny.

² Kikyomwecha nyoman Lökoy cho Karamach le wölo kikyomtochï chane tïkwïl. Kilïm pïchoni ngalechoni, wölo kimengaraknye chane, ompöwölo otini kilïm kïmelö kitach chane ompö kighanat.

³ Kïpetecha ye nyu chona kikeghan kenyoru kimïnynoni le wölo kiyomiswecha Tororöt nyinte lö, “Kyanarekan, aman muma lö, ‘Mölïtöcha chane kimïnytönyan.’ ” Kïrkegh kikikuwany ighisyenyi otini kitor kwigh ngwïny.

⁴ Mwoghöy Kikirut ompö kareran ngala asispa mut nko odeny lö, “Kimuny Tororöt asispa mut nko odeny akïpïstö ighisyewutkachi lapay.”

⁵ Kïmwa ompö atoni ngat lö, “Mölïtöcha chane nyonikïny kimïnytönyan.”

⁶ Ompö atoni kïtökïni pöroyïn kïlït pikö walaka. Pïchinö kinya kïlïm Lökoy cho Karamach kyomtoy kï kimachamcha kïlït ompö tighintön.

⁷ Kitat ngat Tororöt asis anka nyo kïlentöy “Asisete.” Kingalana asisoni kïmwagha kuti Daudi ato le lötï kï kikuwer könyiswö cho chang ompö Kikirutchay pö tagh lö, “Ato alïm kuti Tororöt asisete, kïmakany kwoghïghitu mïkuliskökwo.”

⁸ Ontökitö Yoswö pïchoni kimïny kitömökïminye asistanka nyo kitötökïngölono Tororöt ngat.

⁹ Ay, kedong ye nyu, kimïny nyo pipö Tororöt le wölini kimungtö nyinte asispa mut nko odeny.

¹⁰ Ompöwölo chi anka tïkwïl nyo lïtöy kimïny pö Tororöt, kumungöy ompö ighisyewutkachi löwïr le wölo kimungtö Tororöt ompö ighisyewutkachi.

¹¹ Kekilö nyu kegh kelïtö kimungötononi atömötöp ntökïchïnta chi nyonikïny ompö akwa nyo pïstoy kimungötononi le wölo kitagh pïchoni ompöwölo kimötïngcha kighanat.

¹² Satate ngölyonto Tororöt akïchongchong, ngatip kïsir chok anka tïkwïl nyo lïtate wölini nko wölini. Akïmutöy kurelït ato ryomo söpon nko mïkulögh akurelchï wölo ryomechini ngichayayi por nko mwagh. Sïku ngölyontononi möchut nko kinonut pö mïkulis pö pich.

¹³ Möminye kïgh nyonikïny nyo kikigh nyo mösïwïyinye Tororöt, rumu kïgh anka tïkwïl ompö tawunyi akï nyinte nyo kiyokyinecha ngaleko ighisyewutköcho löwïr.

Tïsin nyo Wow* Yeso

¹⁴ Mïchinecha nyu kenama lasiny kighanatenyo. Ompöwölo kïtïngetecha Tïsin nyo Wow nyo kiwö ntökwit wölo mi Tororöt Yeso, Wero Tororöt.

¹⁵ Ompöwölo kïtïngetecha Tïsin nyo Wow nyo muköy ntökungarakecha ompö nyörkölelyenyo, nka nyoni kikïtyam nyinte ompö or anka tïkwïl le acha, akimeghnye ngokï.

¹⁶ Kerikyinö nyu ngacharu Tororöt nyo pö ororyö ompö nyakanat, atökenyorunö pöropchö. Kïsïkonecha nyinte kisyonöt nko pöropchö nyo ngörokecha ompö asispa machat.