EPRANIA 2 - PIPÏLIA

¹ Kïlenyona mïchinecha kenama lasiny ngalechï löwïr kikelïmacha, atömepoyeghenech.

² Kirumtö lö, pö man ngölyon nyo kikonï malayken akwanka tïkwïl nyo kimarïpnye anta ter ngölyontononi, kï kinyorï chane nyarïl nyo kimïchï lelutyononi.

³ Ekechïwïtyonecha nyu lö ne, ato mökïyangachanye sörunöt nyo wow nyo tenö nyï? Kinya Echotyon nyinte tagh kimwowï sörunötononi, kukïniniewecha pich cho kilïm ngalechoni lö, pö man.

⁴ Kïsöwintönchï Tororöt tïkwïl kighanatengwa kwigh kiporunöt anka tïkwïl nko töngönchin ompö tïkwïn cho chang akïchöghchï chane konut cho pö Mïkulögh nyo Tïlil kïrïp kegh nko chamatenyi.

Nyinte nyo ipkecha sörunöt

⁵ Metönye Tororöt malayken kïpayta ngwïny nyo ngwïnöy, ngwïnyinete kïmitecha ye kengölono ngalechi.

⁶ Le wölo kïmwoghtoy ompö Kikirut kareran lö, “Ne chi nyo kïlentöy inonenyi, akï ne ptangengmöt nyo kïlentöy iyongenyi nya?

⁷ Kighanyi nyinte kwapta kite osis cho ngörï kïtïl malayken, kelokyinyi nyinte tenta ororyö nko konyït,

⁸ aitönönyi kïpayta tïkwïn tïkwïl.” Akwotini kigh Tororöt chi kïpayta tïkwïn löwïr, kïmöminye kïgh nyo kikïpïstö metö nyinte kïpayta le wölini. Wölo lata kïtomönye kesïwenacha kïpayta chi tïkwïn löwïr.

⁹ Wölo kïsïwïyecha Yeso nyo kikigh kwapta kite osis cho ngörï kïtïl malayken kelokyini ororyö nko konyït ompöwölo kiwongunö meghat atökumï ompö pöropcho Tororöt kïmegha chi anka tïkwïl.

¹⁰ Ki mïchinote, ompö Tororöt nyo ighöy akukomönöy tïkwïn löwïr, kwigh Yeso kuten ompö ara kiwongunöt, atökumïtï monïng cho chang akïchagh ororyenyi nko chane. Ompöwölo Yeso nyo ntöghoghchini chane kïnyorï sörunöt.

¹¹ Nyinte nyo tïlilöy nko chane cho kitïlilöy kïtïng löwïr apite akonga nko nyinte. Nka nyoni mösïwïyinye Yeso arasï kïkurö chane tupchenichu.

¹² Mwoghöy nyinte lö, “Omwochinan tupchenichu kaynengu, we Tororöt, osölinyi ompö kwenuto nyoryengwa.”

¹³ Akïmwoghöy ngat lö, “Otöninan kikönötenyan wölo mi Tororöt.” Akïmwoghöy ngat lö, “Omitan yi nko monïng cho kökonanïn Tororöt.”

¹⁴ Akwompöwölo tïng pïchoni kikur lö, monïng, por nko kisön, kïkarkegh nyu Yeso nyinte nko chane kipar otöptöngwa nyo pö ptangengmöt. Kigh lenyoni atökumï ompö areto meghenyi kunyar Onyöt nyo kitïng owesyö ompö paraku meghat,

¹⁵ atökumï kutyak pich cho kile mötwor ompö söpontöngwa kegh ompö kiwaghata meghat.

¹⁶ Poru nyu nyete nyo pö nyoman lö melö malayken chini mi nyinte kïsïngo. Wölo kïle wölini mwoytoy Kikirut lö, “Sïngo nyinte monïngo ara Apraam.”

¹⁷ Kïlenyona, kimïchï egh nyinte kïkarkeyit nko tupchenichi ompö ngal lapay atökumï kïlïkwï tïsintengwa nyo Wow nyo kighönöy, nyo tïng kisyonöt otini pöghisyechini nyinte Tororöt, atökelöstoghchï pich ngokikwa.

¹⁸ Nyo muköy ye nyu kungöroköy pich cho kityömöy, ompöwölo kikïtyam nyinte tïkwïl akechop kong.