EPRANIA 12 - PIPÏLIA

¹ Kïtïngetecha acha söwï cho chang nyoman cho kiwitwitecha. Kenateghena nyu nïkisyö anka tïkwïl nyo tungecha nko ngokï cho sïkwïrecha, akeryagh ompö nyakanat kanyanyighos nyo mi tawunyo.

² Ketanga wölo mi Yeso, nyinte nyo le kitorinte akï nyinte nyo puntoy kighanatenyo. Kimïkukönö nyinte kimurtöwon akwompö ngörekyö nyo kimi tawunyi. Wölo kimas arasï nyo pö kuwongunöto kimurtöwon, akï mi ye okumpö tagh nyo pö ngacharu paytaghpa Tororöt.

³ Anana lasiny Yeso nyo kimïkukönö kimölöto mwokïyis, atömömeghyok mutïnö.

⁴ Tomönye oporyenökwa tökïtenö kïpeghenakwa kisön otini omitekwa onoghyot nko ngokï.

⁵ Kowutyeghekwa so ngalechay konokwa kikilöt chay mwowokwa Tororöt lö ochikwa monechi? “Werïnyu mesas sito Echotyon, amekany kïmeghïn mu otinö mi nyinte kïchilinyi.

⁶ Ompöwölo mungöy Echotyon chi anka tïkwïl nyo chömöy nyinte, akïmungöy chi anka tïkwïl nyo toköy le werïnyi.”

⁷ Omïkukönö ato onyorï sitöt. Ighwokwa Tororöt le monechi. Ompöwölo monïng ne nyo mömungönye kwanta?

⁸ Akwoto mömungokwanye nyinte, kïmelö ochikwa monechi nyonikïny. Ochikwa monïngo sany.

⁹ Ompö atoni ketïngetecha papotïnecho cho kiyiyech, otini kömungecha, ketekacha chane. Kïlenyona mïchinecha nyu kekonyïtö tya Paponyo nyo pö ara mïkulögh tökesöpchenö!

¹⁰ Kitönecha papotïnecho sitöt cho kiyiyecha osis cho ngörï kïle wölo kisïweghta chane lö roko. Wölo sitöt Tororöt nyo konecha kïtïng kinyiwut, tökemuka kepara tïlilyenyi.

¹¹ Ketö chi sitöt, kïmelö kïgh nyo kïngörökyini, puryö ipu ngwonïn ato mi löt kuyinchï pïchoni kikinet pïröto kegh akwa cho pö ropöwonto kalya nyo pö söpon nyo satate.

Kinetut nko rirchin

¹² Osyolö nyu ewunekwo cho nyörkölöl, achïchim kutïngöyikwo cho oghochot.

¹³ Aleta tagh arïpa or nyo ghïteghote, tömöngwal kel nyo chirate, wölo tökesop.

¹⁴ Okilö kegh, otïpinö ompö kalya nko pich löwïr otïpinö otöp nyo pö tïlilyö nyo ato mötïngnye chi kïmösïwïyinye Echotyon.

¹⁵ Okil kegh lasiny tömötöp chi anka tïkwïl ntökïchïwïta pöropcho Tororöt. Orip kegh tömakarkegh nko ket nyo ngwan nyo ipu nyörilwok cho chang ködöwichi.

¹⁶ Orip kegh tömörumunö chi kwenunkwa nyo ighöy cheporesnan anta chi nyo mewöghönye Tororöt nyo karkegh nko Esau nyo kyalta mïlatenyi nyo pö poretnan omisyö nyo pö asakonga kwïle.

¹⁷ Ato mi lötï otini kilentöy tonyorï ngat kisoyönötonay kile nyenyi, ketagha, ompöwölo kimökïsïchnye pöroyïn nyo kiköteghö, kïrkegh kimar ntökïtörengu lok.

¹⁸ Akimatakwanye kutïng nyo kitötöpöy le ato kit pipö Israel, amelö kyatakwa wölo mi ma nyo nöghöy akïmi polta nyo tuw lömïs akughumo chepkïrïri

¹⁹ nko chöghöto kontï nko ngalanat. Otini kilïm chane kutinoni kïsom lö melö kitökïmököy chane kïlïm ngölyonte anka ngat,

²⁰ ompöwölo kimemïcha kïkömögh ngölyontononi kikïmwowï lö, “Kïwiro köghïn kïgh anka tïkwïl nyo swongöy kutïngoni kïrkegh kö tyony.”

²¹ Ki wow otyogh nyo kimi atoni tya, ntökïlö Musa, “Kowöghisyan apotanan!”

²² Wölo katukwa kutïng pö Sayon* akwa kanasyanta Tororöt nyo satate, Yerusalem nyo pö yïm, wölo nyoryegho malayken cho makïrar.

²³ Katïtekwa wölo nyoryegho Tororöt nko monechi cho le poretay cho kikekir kaynötutkökwa ompö yïm. Kapkanakwa wölo mi Tororöt nyo le kirwokinto pich kïmïkul nko nyo pö mïkulis pö pich tïkwïl cho kikegh kïtïlilöchitu.

²⁴ Kapkanakwa wölo mi Yeso nyo kingwïn kwigh muma* nyo rel akï kïmïlta kisönkachi cho ngölonöy tïkwïn cho karamach kïtïl chanya pö Apel.

²⁵ Arose kegh nyu tömatagh nyinte nyoni ngölonöy. Ompöwölo ato kimöchïwïtyöcha pich cho kitagh kïlïm ngala chichoni kingwïn ngwïnyinï akuyomisï ngala yïm, ekechïwïtyonecha lö ne nyu ato kïghöpönöcha nyinte nyoni rirwecha ompö yïm?

²⁶ Kitimtim kutinyi osiswechoni ngwïny, wölo keyomisï nyinte ye lö, “Totimtiman ngwïny ngat amelö ngwïny onkït wölo otimtiman yïm kïmïkul.”

²⁷ Porwecha ngölyontonï “ngat” lö, kitimtimöy tïkwïn löwïr cho kikigh aketoyö, akenategha, atökudong nyu tïkwïn cho metimtimisyocha.

²⁸ Kesoyönisyenö nyu, ompöwölo kakekonecha pöyunöt nyo metimtimonye. Kesoyönisyenö akesagh Tororöt kïle wölo chömtoy nyinte ompö rïngata kegh nko kiwaghat,

²⁹ ompöwölo ma Tororötïncha nyo pelöy lömïs.