EPRANIA 11 - PIPÏLIA

¹ Kighanat, kï kenkïtï lö pö man tïkwïn cho kïmi keköngöy, akekïniniö tïkwïn cho melö kïsïwïyi.

² Ompöwölo kicham Tororöt pipö könyisyok ompö kighanatengwa nyo kitïng.

³ Pköchinecha ompö kighanat lö kigh Tororöt yïm kwigha ngölyontenyi atö kïlïkwï lö tïkuchï kïsïwïyi kï kikigha tïkwïn cho mökïsïwïyinye.

⁴ Kigh kighanat Apel kutö Tororöt amöros nyo karam kïtïl nyo pö Kain. Kuyit Tororöt nyinte lö, pö man akwompö kighanatenyi, kïsöwintönchï Tororöt kïcham ropöwechi. Kima Apel wölo mi kïngölonöy akwompö kighanatenyi.

⁵ Kigh kighanat Enok kemït kïwö yïm ka Tororöt atömama amökïsïwanye chï ngat, ompöwölo kimït Tororöt. Mwoghöy Kikirut lö, otini kitomönye kemït Enok kï kinkïtote lö kichömöy Tororöt.

⁶ Akwoto puryö kighanat kïmemukonye kegh Tororöt kïngarak. Ompöwölo mïchini chi nyo wechini Tororöt, kughan lö mi Tororöt akutöni ropöw chane cho yöröy nyinte.

⁷ Kigh kighanata Noa kïlïm rirunata Tororöt ompö ngal cho kitökïpkonöy cho kitomöcha kesïwa. Kïter Noa kuti Tororöt akïtek meli nyo kikuro Sapina tökïsörï kegh nko katanyi. Akwompö ngalechoni kerwokyï ngwïny akïlïkwï nyo kinyorï Noa tïlilyö kungwïna kighanatenyi.

⁸ Kigh kighanata Apraam kïterchï Tororöt otini kikur kïwö kor nyo kiyomisyï Tororöt lö, töni nyinte. Kïwuwö nyinte korenyi akimenkïtnye wölini kiwetöy kutöngöy.

⁹ Kigh kighanat nyinte kïmang le ton kor nyo kiyomisï Tororöt. Kimang emen nko Isak nko Yakopo. Kighömöy chane tïkwïl kiyomisötononi pö Tororöt.

¹⁰ Ompöwölo kimi Apraam kïköngöy kanasyan nyo chïchïmate kanasyan nyo kisyok Tororöt akïtek akï tïngönchï.

¹¹ Kigh kighanata Sara nyo kile sonö kïsïkisyö, kïrkegh kikiyosit kighan Sara lö puntoy Tororöt kiyomisutkachi.

¹² Kiyï Apraam pich cho chang le kokel ompö yïm akïtenö ngayam cho mi nanam, kïrkegh kikiyosit nyinte nyo melö kitötökïyiyöy monïng.

¹³ Kimeghö pïchoni löwïr kïtïng kighanat kïtomö kïtak ngal cho kiyomisyï Tororöt chane kïrkegh kitökïlowöch ngalechoni wölo kimï chane kïsïwa akïngörökyï, akïmwagha tawu pich lö, to akï rutoghot chane ompö ngwïnyinï.

¹⁴ Ompöwölo poru kïrumï pich cho mwoghöy ngal cho lata choni lö mi chane kïyöröy kor nyo le nyingwa kegh.

¹⁵ Amelö kitökunonöy chane ngat ngaleko koroninö kipïstö, ntökile nyo kinonöy kitemuköy kïmïlisyot.

¹⁶ Wölo kimi chane kïyöröy kore anka nyo karam nyo pö mi yïm. Nka nyoni mölolïyönönye Tororöt kïkurö chane nyinte Tororötïngwa, ompöwölo kikwighchï chane kanasyan.

¹⁷ Kigh kighanata Apraam kutötö werïnyi Isak kïlïkwï amöros, otini kimököy Tororöt kïtyömöy nyinte. Ki chichoni le Apraam nyoni kitö Tororöt kiyomisöt, wölo kïrkegh kïlenyoni, kicham kutötö werïnyi nyo le akonga onkït kïlïkwï amöros,

¹⁸ kïrkegh kikinya Tororöt kïlenchï, “Isïkenyi monïng cho chang ompö ara Isak.”

¹⁹ Kughan Apraam lö muköy Tororöt nyinte kwigh Isak kututï. Lenye nyoni nyu wölo kisïktö Apraam ngat werïnyi kïngetunö ngwen.

²⁰ Kigh kighanata Isak kusoyön Yakopo nko Esau, kïnyorï kisoyönöt nyo kitökungwïnöy.

²¹ Kigh kighanata Yakopo kusoyön werpö Yosep lapay otini kirich kïrapas. Kisagh Tororöt otini kimi kïchïchïmo lïkïnyi.

²² Kigh kighanata Yosep kïngalana pipö Israel kïpkono Misri akurur chane wölo idoy koyechi ato rapas nyinte.

²³ Kigh kighanata yiyi Musa kïwïny nyinte aro sömök kïngeta otini kikïyï. Kisïwa chane lö ki mönïng nyo pïchigh akimewaghcha kirurut pö pöytoghin.

²⁴ Kigh kighanata Musa otini kiyetï kïtagh kekurö wero chepö Parao.

²⁵ Kicham nyinte kuwongwï nko pipö Tororöt kïsir kïngörökyï ngokï osis cho ngörï.

²⁶ Kisïwa lö kaykay tya kuwongwï chi nko Kristo* kïsir kenyorï monkornöno koro Misri kïmïkul ompöwölo kimi kukönöy ropöwon nyo mi tagh.

²⁷ Kigh kighanata Musa kïwuwö koro Misri, amewaghnye nörekyo pöytoghin amamlanye lötï, ompöwölo kilata chi nyo kisïwïyi Tororöt nyo mösïwïyinye chi.

²⁸ Kigh kighanata nyinte kwam Pasaka* akïmwochï pich kuchukö kisön kukot, tömengwïn Malaykayanta Meghat kïtïgh poretayi pipö Israel.

²⁹ Kigh kighanata pipö Israel kwoghyö Nanam nyo Pïrir le kor nyo tïyame, wölo otini kimököy pipö Misri kumukyini kwoghsot, kuchut pögh chane.

³⁰ Kigh kighanata nöyet pö Yeriko kïrulyö, otini kiwitwit pipö Israel osis mut nko odeny.

³¹ Kigh kighanata chepores nyo kikuro Raap tömökïpar nko pich cho kipeny ngala Tororöt ompöwölo kitach nyinte pipö Israel cho kile ghotï.

³² Eamwagh ne nyu anka? Motïngetanye pöroyïn nyo omwowuno ngala Kidyon nko Parak nko Samson nko Yepta nko Daudi nko Samwel nko werkoy.

³³ Kirïnta chane pöytoghi koros akwompö kighanat. Kigh chane ngala man ato mi löt kïnyorï tïkwïn cho kiyomisyï Tororöt. Kikar kutïwa ngötuny,

³⁴ akumis mot cho ngwonöch akïchïwïtyeghö ngot. Ki nyörkölöle nyoman, wölo kimï kïrïnta lïkos cho pö pungkökwa.

³⁵ Kikiyokyï kor cho kitïng kighanat poyikwa kïngetunö ngwen kïsötote. Kitagh walaka ketyak kechop kong ntökïmeghö atökumï kïnyorï söpon nyo karam tya otinö ketutunö chane ngwen.

³⁶ Kikïnyernyera walaka ompö chane aketwarï, kerata angwo pö karin aketorchï chela.

³⁷ Kikïwira chane koghïn akemuta mïsïmenen kïlïkwï odeny, kepara walaka chokon. Kimi kulokotoy sïro pö kechir nko cho pö ngaror, kilïkwï chane mey cho kikichop kong akerey.

³⁸ Pich cho kimömïchïcha kïtïpï ngwïnyinete! Kirwötöy chane ompö surkwen nko kutïnkot nko köpönot akimöngöy köpönot anko pïrïmpot cho mi ngwïny.

³⁹ Kiporï kegh pichoni lö nyökon ompö kighanatengwa. Wölo kimönyorïcha tïkwïn cho kiyomisyï Tororöt chane,

⁴⁰ ompöwölo kimököy Tororöt chane kïköngisyö tökumor kïnye ropöw cho karamach cho kikiyomiswecha.