EPESO 6 - PIPÏLIA

¹ Akwa monïng, ateka yiyikwo ompö Echotyon, ompöwölo karam lenyoni.

² “Konyïtö kon nko komöt, nyete kirurutye nyo pö tagh nyo tïng kiyomisöt,

³ tenyorunö perur atökïtösisyö könyisweku ompö ngwïny.”

⁴ Kïkany akwa papotïn, magh monekwo kulilisyö, wölo anama chane ompö pïröt nko kinetut pö Echotyon.

Sekey nko echotkökwo

⁵ Akwa sekey, ateka echotkökwo ompö kiwaghat nko potanat, apöghisyö ompö kitenata mïkulögh le ato kötopöghisyechinekwa Kristo.*

⁶ Agha lenyoni amelö otinö rosokwa chane atökïkwolokwa, wölo aghena mïkulöwungwo kïmïkul kïrïp kegh nko machata Tororöt le mötwori Kristo.

⁷ Agha ighisyengwo ompö ngörekyö le pich cho pöghisyechini Echotyon, melö pich.

⁸ Ompöwölo onkïtökwa lö töni Echotyon chi anka tïkwïl ropöwon ompö ighisyo nyo kegh nyinte, ato kö sekeyon anta nyo tyakate.

⁹ Kïnyïl akwa cho le echot, oghchinö sekeykökwo lenyoni tïkwïl, maghapghap chane, ankïtï lö opoyekwa tïkwïl Echotyontonini le akonga mi yïm, amökïlönye pich.

Kari lïko chi pö Kristo

¹⁰ Ngölyonteto löt, omökwokwa lö ghyongtenö ompö Echotyon nko owesyeto kimukatenyi nyo wow.

¹¹ Alaka kari lïk löwïr cho pö Tororöt atamuka olyoktenö lïsut pö Onyöt.

¹² Ompöwölo melö kïporsonecha nko pikö walaka, wölo kïporsonecha nko lïk nyo pö ilot cho ghach cho pö ngwïnyinï cho pöytoy akïtïng kimukat nko owesyö cho pöytoy ngwïnyinï pö tuwïn.

¹³ Kïlenyona nyu alaka kari lïk cho pö Tororöt löwïr, cho kikonokwa aghetena kegh tamuka oghyongtenö ompö asispa ghöyityö akwoto kaghakwa lenyoni atek.

¹⁴ Kïlenyona otïpinö kïpsach, akichena kegh man le angwa mu, alak tïliyö le alakam,

¹⁵ akany kïchöngchöngitu kelyekwo ompö napata kegh nyo pö amtaghata Lökoy cho Karamach.

¹⁶ Ateka kighanat kïnomnyö le longa, ompöwölo nyoni nyo omukekwa olyoktone kotï löwïr cho wutu Mwokïyon.

¹⁷ Atacha sörunöt le körtöwonto möt, atach ngölyonto Tororöt nyo le choko Mïkulögh nyo Tïlil.

¹⁸ Asagha kïnomnyö ompö owesyo Mïkulögh nyo Tïlil. Osomö Tororöt kingarakat. Osyepisyenö moghochö, osoghchinö pipö Tororöt löwïr kïtenö osis

¹⁹ asoghwante tïkwïl kïkonanïn Tororöt ngölyon, töto omökan ongölonöy, amukan amwatïta Lökoy cho Karamach cho wïngote ompö nyakanat.

²⁰ Ompöwölo alatan chi nyo ghyongchini ngaleko korenyi ompö kore anka, ompö Lökoy cho Karamach kïrkegh ochan ratate. Osoghwante atamuk angalan ompö nyakanat le otini mïchinanïn alïkwï.

Takwespa söröm

²¹ Mwowokwa werïnyo Tukiko ngalechan nyo le chaman akï mötworinto Echotyon nyo ghanate atamukakwa nyu onkïtunö wölo alatan.

²² Nka nyoni koyokwokwa nyinte kungwïn kïmwowokwa wölo kïlatecha, atökukil nyinte mïkulöwekwa.

²³ Werköcho akanya kïtöpö kalya nko akwa nko chomnyogh nko kighanat nyo ngwïno Tororöt Paponyo nko Echotyontenyo Yeso Kristo.

²⁴ Nya kïtöpö pöropcho Tororöt nko pich lapay cho chömöy Echotyontenyo Yeso Kristo ompö chomnyogh nyo mewonyotnye.