EPESO 5 - PIPÏLIA

¹ Alïkuna nyu cho orïpöy Tororöt, ompöwölo ochikwa monechi cho le chaman.

² Akanya kuntöghoghchï chomnyogh otöptinekwa, le wölo kichamtecha Kristo* tökïkonecha söpontanyi kïlïkwï tïsöwon nyo ngutoy nyo anyïm, akïlïkwï amöros nyo karam ngörökyini Tororöt.

³ Ato kalïkukwa pipö Tororöt, kï makany nyu kelïmchokwa cheporesnan, anta sïmnyontön anta sïköynön, anta pïrchin,

⁴ mömïchininye ngat kelïmchokwa ngala arasï anta cho pö sölwontön anta kimölöto kegh, wölo mïchini oyokyinökwa Tororöt sörö.

⁵ Onkïtï nyoman lö, möminye chi nyo le cheporesyan anta nyo le sïmnyon anta nyo pïrchini tïpö pich (ompöwölo pïrchin kï saghata körkeyïntin), nyo nyoru kïgh ompö Pöyunöto Kristo nko nyo pö Tororöt.

⁶ Makany kïlïsenak chi ngal cho pö kwïle, ompöwölo nyoru pich cho le penyï nörekyo Tororöt ompö ngal cho lata choni. Kïlenyona

⁷ moghömö nko pich cho lata choni.

⁸ Kyomitekwa tïkwïl ato le tagh tuwïn, wölo kyalïkukwa ye pipö löpoyïn otini kyolinyekwa nko Echotyon. Otïpinö nyu le monïngo löpoyïn,

⁹ ompöwölo löpoyïnoni nyo ighöy pich kwïgh anka tïkwïl nyo karam, nyo tenate akï pö man

¹⁰ amukyï onkïtï kïyinö chömöy Echotyon.

¹¹ Moghömechï ighisyewut pö tuwïn cho meyinöcha akwa, wölo anganytena tïkuchoni.

¹² Ompöwölo pö arasï tïkuchoni igho chane tuwïn nyo mölentönye chi ompö tangalana.

¹³ Wölo ato lïwchï löpoyïn kïgh anka tïkwïl, kesïwïyi,

¹⁴ ompöwölo ighöy löpöyïn kïgh anka tïkwïl kïrumï. Nka nyay mwoghöy Kikirut lö, “Chïkana, nyi nyo irïwöy, aitutunö ngwen, atökulïwchin Kristo!”

¹⁵ Orip kegh nyu lasiny wölo otöptoy, motïpï le sölwöy, wölo otïpinö le pich cho ngöghomöch.

¹⁶ Opöghisyeghenö pöroyïn nyo otïngetö, lasiny, ompöwölo ghach osiswechï.

¹⁷ Kïlenyono malïkwï sölwöy, wölo onkïtunö lö ne nyo le machata Echotyon.

¹⁸ Motömesyeghö kumïn, ompöwölo wonyokwa, wölo akanya kenyïghitak Mïkulögh nyo Tïlil.

¹⁹ Otinö ongölonchinekwa kegh opöghisyeghö ngala sölut nko tumwöy nko tumwöyi mïkulögh. Otumchinö Echotyon tum nyo rïröy ompö mïkuliskökwo.

²⁰ Oyokyinö Tororöt Paponyo sörö kïtenö osis ompö kïgh anka tïkwïl, ompö kaynata Echotyontenyo Yeso Kristo.

Kor nko santokökwa

²¹ Oterchinö kegh akwane ompö kiwaghata Kristo.

²² Oterchinö korï santokökwo, le ato orterchinekwa Echotyon.

²³ Ompöwölo pöytoy ngetat korkenyi le Kristo nyinö pöytoy kanisa, akï nyinte nyo le Ghetinto kanisa nyoni kï portanyi.

²⁴ Le otini terchini kanisa Kristo, kïmïchini kïterchï korï tïkwïl santokökwa ompö kïgh anka tïkwïl.

²⁵ Achama mïrön korukwo, le wölo kichamta Kristo kanisa, akutötö söpontanyi kutö kanisa.

²⁶ Kigh lenyoni atökïmwat akutïlilchï Tororöt kanisa otini kikikuwany kuwunö pögh nko ngölyontenyi,

²⁷ atökumïtyï kegh kanisa nyo tïng töroryö nyo mötïngnye kemeryan anta nyömpïghöt.

²⁸ Mïchini nyu kïcham mïrön korukwa le wölo chömtoy chane porwöyikwa. Mïrön nyo chömöy korkenyi kïchömöy kegh nyinte.

²⁹ (Möminye chi nyo ghöchini portanyi, wölo pöghöy akïrip lasiny, le wölo idoy Kristo kanisa,

³⁰ ompöwölo kichicha ngichayayiko portanyi.)

³¹ “Kïlenyono nyu pïstoy chi kwanta nko kame akïnomnyotö nko korkenyi akïlïkwï chane kwodeny por akonga.”

³² Mi ngölyonto man nyo wïnyate yeteyi wölo pköchinanïn lö ngölono nyete Kristo nko kanisenyi.

³³ Wölo mïchini chi anka tïkwïl nyo le ngetat kïcham korkenyi le wölnö chömtoy kegh nyinte, kïmïchini korka kïtekï santenyi.