EPESO 4 - PIPÏLIA

¹ Osomokwa nyu ani nyo ochï ratate ompöwölo opöghisyechinan Echotyon lö, otïpinö kïrïp kegh nko kurötononi kikurchokwa Tororöt.

² Alïkuna pich cho opöy kegh ngwïny, pö cho tölose, pö cho mïkukönöy. Otighö kegh ompö chomnyogh ompö ara kingarakata kegh.

³ Okilö kegh akamana ghömïchö nyo kïkonokwa Mïkulöwu Tororöt ompö ara kalya nyo ighokwa alïkuna akonga.

⁴ Mi por akonga nko Mïkulögh akonga, le wölini kikurchokwa Tororöt kikönöt akonga.

⁵ Mi Echotyon akong kighanat akonga nko kipatisanat akonga.

⁶ Mi Tororöt akong akï Papo pich löwïr akï wowö pich löwïr akïpöghisyegho pich löwïr akïmi ori pich löwïr.

⁷ Kiketö chi anka tïkwïl ompö acha pöropchö kïrïp kegh nko ropöwon nyo kitö Kristo* nyinte.

⁸ Le wölo mwoytoy Kikirut lö, “Kimït söpïch pö pich cho kirötote otini kipus kiwö parak tyo, akutö pich ropöw.”

⁹ Poru ne nyu nya otï kïlentöy, “Kipus?” Poru lö kinya kïröytö ngwïny ntökwit ngwïny ori.

¹⁰ Kïlenyona nyu, chichoni kirökwï ngwïnyinï kïnyoni kipus parak tya atö kïghömï nyinte yïm nko ngwïny kïmïkul.

¹¹ Akï nyinte nyo kitö pich ropöw. Kigh nyinte pikö walaka kïlïkwï kiyoktoghï, kwigh walaka kïlïkwï werkoy, kwigh walaka kïlïkwï omtoghï, kwigh walaka kïlïkwï mösöw nko konetï.

¹² Tökumï kwigh pipö Tororöt kï pöghisyö atökïtek por pö Kristo,

¹³ tökïtenö kenyorunö löwïr ghömïchö nyo pö kighanat akonga akenkïtï Wero Tororöt akekilyö töket man pö Kristo.

¹⁴ Melö nyu tolïkunekwa ngat monïng cho kutöy yomöt anka tïkwïl kughegh wölnö nko wölnö nyo pö kinetut pö pich cho pöghisyegho kinetutkökwa ompö lïs atökwigh pikö walaka kupotyö.

¹⁵ Wölo kerïpa ngala man ompö chomnyogh akeyetu ompö or anka tïkwïl tökekarkegh nko Kristo nyini le möt.

¹⁶ Tuyot nyu portö kïmïkul ompö nyinte akïnomnyö ngichayay löwïr kïrïp kegh nko wölo kikighta. Otini kö pöghisyö ngichaya anka tïkwïl le wölo roko, kïnöröy nyu portö kïmïkul akïteka ompö chomnyogh.

Otöp nyo rel ompö Kristo

¹⁷ Orirwokwa nyu ompö kaynata Echotyon lö, motïpinö ngat le pich cho menkïtcha Tororöt, cho kiwöghökisyö kinonutkökwa kïlïkwï sölwontön,

¹⁸ akï mi kinonutkökwa tuwïn, lowöch chane ompö söpon nyo konu Tororöt ompöwölo sölwöy chane akï tighï.

¹⁹ Melö tökï sïwïyi chane arasï nyonikïny. Kicham chane kïpa ara kipotöt, akwigh kïgh anka tïkwïl nyo pö arasï kïsamta.

²⁰ Kimanetekwanye kegh ngal cho lata choni Kristo!

²¹ Kyalïmakwa ngalechi nyoman, kïkany otini kyalïkukwa rïpankachi, kenetokwa ngala man cho mi oripö Yeso.

²² Achala nyu otöptöngwo nyo kipö tagh. Nyoni kï otöp nyo kitïng pïrchin akilïsokwa.

²³ Asata mïkuliskökwo nko kinonutkökwo kïrelachitu,

²⁴ alaka otöp nyo rel, nyo kikigh kïrïp kegh nko körkeyïn pö Tororöt nyo poruno kegh söpon nyo tenate nko tïlilyö.

²⁵ Opïstenö nyu putintön! Nya kïmwochï chi anka tïkwïl pöröryenyi ngala man, ompöwölo kichicha löwïr ngichayayi por pö Kristo.

²⁶ Ato onörekyö, mopïsï nörekyengwo kumïtak wölo mi ngokï, amonörekyö tökwimön.

²⁷ Mopïsï Onyöt pöroyïn.

²⁸ Nya kïpïstö chorin chorsyö akïpöghisyö atökïsïch kïgh nyo poröy nko nyo chopöy.

²⁹ Makany kelïma kwenunkwa ngölyon anka tïkwïl nya gha. Opöghisyeghenö kïnomyö ngal cho tïng tösunöt akïteköy pich atökutö pöropchö pich cho teröy ngalekwa.

³⁰ Orip kegh magh Mïkulögh nyo Tïlil nyo pö Tororöt kïnarek, ompöwölo nyinte kï macheypa Tororöt nyo poru lö ochikwa pikachi akukïniniot lö itu Asis ato tyokokwa Tororöt.

³¹ Opïstenö nyu ngwonïn nko mïrmïryö nko nörekyö, apïstö syala nko chïpö! Opïstenö kinonut anka tïkwïl nyo gha.

³² Osyonchinö kegh, alöstoghchï kegh lelutkökwo le wölo kilöstowekwa Tororöt ompö Kristo.