DANIEL 5 - PIPÏLIA

¹ Kwigh asistanka pöytoghin Pelsyasar ichon nyo wow nyo pö kirwokotichi cho le 1,000, akïgheghsyö tïkwïl.

² Nyini kichamcham Pelsyasar dipaychay,* kïmwatïta kepï kari koltin nko silpa cho kipunö kwanta Nepukadnesa Kö pö Tororöt* ompö Yerusalem, atökïgheghsyeghö nyinte nko kirwokotichi nko koruchi nko chemïnïngwenichi.*

³ Kepï nyu karichay pö koltin nko silpa atolapay kïgheghsyeghö chane löwïr.

⁴ Kïgha dipaychay atolapay kïkwol tororötin cho kikigha koltin nko silpa nko taghoy nko karïn nko ket nko koghïn.

⁵ Panini lawel kuchumï ewu chi akukir nayatu kö pö pöytoghin ato kilïwchini ta, kïsïwa pöytoghintö ewunay kukirsïyi.

⁶ Kwotyö pöytoghintö akïmïgh nyoman ntökïpotonchö kelyon.

⁷ Kuta pöytoghintö lö amïtuna chesoköytin nko ponï nko pipö Papilonia cho ngöghomöch ompö ngala kokel. Nyini kitï kïlenchï pïchay, “Ato chi nyo somönöy kikirutchï akuporwanïn waghakatenyi kelokyini nyinte sïra nyo lata akwa lamay nko sïrïmnyonto koltin ompö katïnyi akïlïku rïpöwon nyo pö sömök ompö pöyunöt.”

⁸ Kïlenyona kïpka pipö pöytoghin cho ngöghomöch, wölo kupöl kusomön kikirutchay anta mwochï pöytoghin waghakatenyi.

⁹ Kïmïgh Pelsyasar tya akïwoyö kupöl kirwokotichi kïgh nyo ighöy.

¹⁰ Otini kïlïm koko pöytoghin kiteghata pöytoghin nko kirwokotichi, kungwïn köyay pö ichon akïlö, “Isöp kokay, we pöytoghin! Meotyö amemïgh!

¹¹ Mi chi nyo mi pöyunötengu nyo tïng mïkulöwu tororötin nyo tïlil. Kitïng chichoni chïreryö nko pköchin nko ngöghomnyö nyo lenye nyo pö tororöt ompö osiswo pöytoghin Nepukadnesa. Kwigh papongu nyinte kïyetunö chesoköytin nko ponï nko pipö Papilonia nko cho nkït ngala kokel.

¹² Kitïng nyinte ngöghomnyö nko chïreryö nko pköchin nyo kimuköy kïwaghach kirwotïtoghtin akïngor tyankoy akuwongöy kömpölelut. Kïlenyona kurö chi nyo kïkuro Daniel nyo kimïnchï pöytoghintö lö kïkuro Peltesyasar atökuporunyi waghakatenyi.”

Kömwowï Daniel kikirutchay

¹³ Kïlenyona kemïtï Daniel kungwïn wölö mi pöytoghin, kïlenchï pöytoghintö Daniel, “Nyi nyï kïkuro Daniel nyay le akonga ompö pïnotchay kipkana koro Yuda, cho kimïtï paponyanï?

¹⁴ Kyalïman lö itïngetenyi mïkulöwu tororötin cho tïlilöch, aitïngetenyi chïreryö nko pköchin nko ngöghomnyö nyo pö töngönchin.

¹⁵ Kikupöl nyu pich cho ngöghomöch nko ponï cho kakimïtwanïn lö tökusomönwanïn kikirutkö akïmwowanïn waghakatenyi.

¹⁶ Wölo kyalïman lö imukenyi porune waghakata tïkwïn, aiwongöy kömpölelut, kïlenyona ato imukenyi somöne kikirutchï, aimwowanïn waghakate, kelokunyi sïra nyo lata akwa lamay nko sïrïmnyonto koltin ompö katïngu. Atolapay ilïkunyi rïpöwon nyo pö sömök ompö pöyunöt.”

¹⁷ Kuyokyï Daniel pöytoghin lö, “Rorchinö kegh ropöweku anta itö chitö anka, wölo osomönunyi kikirutkö, amwowunyi waghakatenyi.

¹⁸ “Kitö Tororöt nyo Töror Tya, we pöytoghin, papongu Nepukadnesa paytagh nko owesyö nko ororyö nko konyït.

¹⁹ Kiwagh pich löwïr nko pipö punton nko kutïw nyinte ompöwölo kimuköy kïtïgh nyo nyo kömökö kïtïghöy, kusop nyo kömököy kesopöy. Akï nyo kimököy kutotegha anta kuaptegha, kï kimuköy kwigh lenyini kacham.

²⁰ Wölo kikwol kegh akwaghïghit mïkulöwunyi, kenategha ompö pöyunötenyi akechenga ororye.

²¹ Keyona nyinte wölo mi pich akegh kinonutkachi kïkarkegh nko cho pö työny akïmang nko sïkïröyi wuw. Kyam sus le tany akïnam portanyi röyönto yïm ntökïtenö kunkïtï nyinte lö pöytoy Tororöt nyo Töror Tya pöyunötino pich akutöni paytagh chi nyo kacham.

²² “Nyi Pelsyasar nyo ichï werïnyi, melö kemïnïngitanyi kegh kïrkegh inkïtönyi choni löwïr.

²³ Kisïtönyi kegh yïm kïtïl ECHOTYON nyo pö yïm otini kakipunyi kari Kö pö Tororöt. Igheghsyeghenyi nko chönökopïrtineku nko koruku nko chemïnïngweniku, okwolökwa tororötin cho kikigha silpa nko koltin nko taghoy nko karïn nko ket nko koghi tororötin cho melö rosïtoy anta lïm kïgh anta nkït kïgh. Wölo kimekonyïtönyinye Tororöt nyo mi söpontöngu morichi nko ighisyewutköku löwïr.

²⁴ Kïlenyona nka nyoni kiyonï Tororöt egh kukir kikirutchï.

²⁵ “Chï nyu kï kikirutchay kikikir, ‘MENE MENE TEKELI PERESI!’

²⁶ Nyï kï waghakatenyi nyo pö ngalechoni, MENE kï: kikuyit Tororöt osiswo pöyunötengu lö kikuwonyö.

²⁷ TEKELI kï: kikepiminyi kenyorï lö ichinyi kwïskwïs.

²⁸ PERESI kï: kikïchagha pöyunötengu akiketö pipö Mede nko pipö Pasya.”

²⁹ Kimwatïta Pelsyasar kelokyï Daniel sïranay lata akwa lamay orus nko sïrïmnyonto koltin ompö katïnyi, kegh Daniel kïlïkwï rïpöwon nyo pö sömök ompö pöyunöt.

³⁰ Kepar Pelsyasar pöytoghinto Papilonia aghononi.

³¹ Atolapay kïlïkwï Daryas nyo pö pipö Mede pöytoghin. Kitïng könyis 62.