DANIEL 3 - PIPÏLIA

¹ Kwigh Nepukadnesa körkeyïn pö koltin nyo le miten 27 koghïntanyi kutoch kï miten sömök töpesïntanyi. Akutö tömkö nyo mi Dura koro Papilon.

² Atolapay kïkur Nepukadnesa pöytoghï cho mïnkech nko kighyongtoghi kanastin nko kirurï nko rori ropïyen nko kirwokï cho echön nko cho mïnkech cho mutöy ngal nko yetïntin löwïr cho pö koroswo Papilon. Kïghömïtyï kegh ato kitoröy saghata körkeyïnay kigh Nepukadnesa.

³ Otini kighömïtyï kegh pïchay atoni,

⁴ kuta chi ompö kut nyo wow nyo kimwotïtoy ngal lö, “Kakïmwowekwa, we pipö punton löwïr nko pich walaka cho pö kutïw cho sis lö,

⁵ ‘Nyini kalïmakwa chöghoto kontin nko pkurerun nko pïkantis cho sisinchö nko kari tumwöy walaka. Okïtïng asagh tororötay pö koltin kigh Nepukadnesa.

⁶ Kïwirchini chi anka tïkwïl ma nyo ngwan lö kat nyo mökïtïngnye akïsagh.’ ”

⁷ Kïlenyona nyini kilïm pïchoni chöghöto tïkuchoni kïkïtïng löwïr akïsagh körkeyïn pö koltin nyo kigh Nepukadnesa.

Kakirwokyï kongoti Daniel kï sömök ompö tighintön

⁸ Kïnget nyu pipö Papilonia walaka ompö osiswechoni kurwokyï pipö Yaudi ompö olkösnön.

⁹ Akïlenchï Nepukadnesa, “Isöp kokay we, pöytoghin!

¹⁰ Kimwaghanyi, we pöytoghin lö, chi anka tïkwïl nya kalïm chöghöto kontin nko pkurerun nko pïkantis cho sisinchö nko kari tumwöy walaka, kïkïtïng akïsagh körkeyïnay pö koltin nyo kighanyi.

¹¹ Aimwaghanyi lö kïwirchini chi anka tïkwïl ma nyo ngwan lakat nyo mökïtïngnye akïsagh.

¹² Mi nyu pïchay pö Yaudi walaka le ompö Syadrak, Mesyak nko Apedneko chay kighanyi kuntöghoghchï ngala koro Papilon. Melö terunyi chane we pöytoghin amelö pöghisyechini tororötineku anta sagh körkeyïnay pö koltin kighanyi.”

¹³ Kinarek Nepukadnesa nyoman akïmwatïta kemïtï Syadrak nko Mesyak nko Apedneko. Kemïtï nyu pïchay wölö mi nyinte.

¹⁴ Kïlenchï Nepukadnesa Syadrak nko Mesyak nko Apedneko, “Nyoman nyï kïlentöy melö opöghisyechinekwa tororötinechan anta asagh körkeyïn pö koltin nyo kyaghan?

¹⁵ Ato omitekwa kïpsach ye nyu, otini kalïmakwa chöghöto kontin nko pkurerun nko tokigh nko pïkantis cho sisinchö nko kari tumwöy walaka okïtïng asagh körkeyïnay kyaghan, ato aghakwa lenyoni kïkaram tya. Wölo ato masaghkwanye kewirchinokwa lawel ma nyo ngwan lakat. Olentekwa mi tororöt nyoman nyo muköy kïsörwokwa?”

¹⁶ Kuyokyï Syadrak nko Mesyak nko Apedneko pöytoghin lö, “Möminye kïgh nyo kïmwowuchanyi ompö ngalechoni, we Nepukadnesa.

¹⁷ Ato lïkwï nyoni kumuköy Tororötïncha nyo kïpöghisyechinecha kïsörwecha ompö mayoni ngwan lakat akïsörunenecha moriku, we pöytoghin.

¹⁸ Wölo kïrkegh mösörwechanye, we pöytoghin, inkïtï lö, melö kïpöghisyechinecha nyonikïny tororötineku anta kïsagh körkeyïnï pö koltin kighanyi.”

Kakirwokyï kongoti Daniel kï sömök ketïgh

¹⁹ Kïnyala nyu Nepukadnesa nyoman akulisö kïtuwit ompö ngala Syadrak nko Mesyak nko Apedneko. Kïmwatïta kenoghchï mayay kïnagh tya kïtïl nyay pö su.

²⁰ Akïmwochï pikachi pö lïk cho owesöch kïrat Syadrak nko Mesyak nko Apedneko, akïwirchï chane mayay ngwan lakat.

²¹ Kerat nyu pïchay kïmi nko sïrokökwa nko kopïyenikwa nko sïrokö walaka akewirchï ma.

²² Ompöwölo kimwa pöytoghintö kenoghchï mayay kïnagh tya, kïpel lyopötö pïchay kiwirchini ma Syadrak nko Mesyak nko Apedneko kïmeghö.

²³ Kichïnchini mayay ngwan lakat ompö Syadrak nko Mesyak nko Apedneko kïrötote.

²⁴ Kwotyö Nepukadnesa akïnget lawel akïtep yetïntinechi lö, “Nkolentan kakïwirchï pich sömök ma kïrötote?” Keyokyï nyinte lö, “Nyoman, we pöytoghin.”

²⁵ Kïlö, “Atï osïwïyan pich angwan cho tyokote kïpestegho ma kwen amelö nöghot, akï lentöy chi karkegh nyo pö angwan nko wero tororötin?”

Kakityakta pïchay kï sömök aketotegha

²⁶ Kïwö Nepukadnesa kïrich kuka mayay ngwan lakat akïlö, “Apkana sany Syadrak nko Mesyak nko Apedneko mötwori Tororöt nyo Töror Tya.” Kïpka sany pïchay lawel ompö mayay.

²⁷ Kïghamït kegh nyu pöytoghï cho mïnkech nko kighyongtoghi kanastin nko kiruri pöytoghin akïpka kuros lö melö kida ma kïgh porwöyi pïchay. Mölyopnye ma ompö putekwa amönöghöcha sïrokökwa amöngutöcha chane ighot.

²⁸ Kïlö Nepukadnesa, “Nya kïsala Tororöt pö Syadrak nko Mesyak nko Apedneko nyo kiyokwï malaykayantenyi kungwïn kïsörï mötworichi cho kighönöy nyinte. Kitagh ngalechan akusalta kegh, kïtïl kïpöghisyechï akïsagh tororötin walaka kïpoto Tororötïngwa.

²⁹ “Kïlenyona kamwaghan ye nyu lö, ‘Pipö punton nko pich walaka cho pö kutïw cho sis cho mwoghöy Tororöt pö Syadrak nko Mesyak nko Apedneko ketörotöröy akepar korikwa kïlïkwï kïratis. Ompöwölo möminye tororöt anka nyo muköy kïsoru pich le nyï?’ ”

³⁰ Kïlenyona kutotegha pöytoghintö Syadrak nko Mesyak nko Apedneko kïlïkwï yetïntino koro Papilon.