DANIEL 12 - PIPÏLIA

¹ “Ngwïnöy nyu Mikael malaykayan nyo wow nyo ripöy piköku. Itu atoni nyarïl nyo kitomönye kïmi otini kitor puntonï nko ye, wölo kisöru piköku osiswechoni, chi kïnye nyo kirumunö kaynenyi kitapu Tororöt.

² Akututu pich atoni cho kiruyö, petöy walaka söpon nyo pö kokay, kïnyorï walaka arasï nyo pö kokay.

³ Lïwu cho ngöghomöch le asis. Akulïwu cho ntöghoghchini pich kwigh man le kokel kokay nko kokay.

⁴ “Wölo nyi Daniel, rora ngalechï, aikar kitapu ntökwit asispa söröm ompöwölo ryöghöy cho chang wöl nko wölnö akïtöso chïreryö.”

⁵ Olan arosïta asïwan pich walaka odeny, ghyongo akong lalwa ontökwoghu kughyongo anka lalwa antakwagh.

⁶ Kïlenchï akong ompö chichay kiloköy sïra katani ghyongo pögh parak, “Tökïtya ntökwitïta sörömu ngalechï pö töngönchin?”

⁷ Kïsyol chichay morichi kutang yïm akuwalwal kegh ompö kaynata ECHOTYON nyo söpöy kokay akïlö, “Lïku könyis sömök nko aro mut nko akonga. Ighisyot tïkuchï löwïr ato wonyö kichopata kong nyo pö pipö Tororöt.”

⁸ Kyalïman wölo möpköchanïnye. Olenchan nyinte, “Echotyontenyu, lïku ne sörömu ngalechï?”

⁹ Kïlö, “Wechinö kegh Daniel, ompöwölo kikeror ngalechï, akekar ntökwitïta asispa söröm.

¹⁰ Chang pich cho tïlilöy kegh akwigh kegh kïkaramachitu, wölo ighöy mwokïyis ngokikwa, amöminye ompö akong nyo chïrer, wölo tïng pköchin pich cho ngöghomöch.

¹¹ “Weröy osiswö cho le 1,290 kïngata otini kakïtagh ketötö amörostin cho kïpelöy kïnomnyö aketö körkeyïn nyo pö otyogh ntökwit asispa nyarïl nyo wow.

¹² Soyönote pich cho ghyongtoy ntökuwonyö osiswö cho le 1,335.

¹³ Wechinönyi kegh, we Daniel, ntökwitïta söröm. Itu ato irïwenyi, wölo itutunenyi, ainyorï ropöwontengu asispa söröm.”